រន្ធត់ ! ខ្ទេចជើងម្ខាងសន្លប់ស្តូកស្តឹង
រាជធានីភ្នំពេញ ៖ បុរសម្នាក់ត្រូវរងរបួសដាច់ជើងម្ខាងខ្ទេចខ្ទីអស់ បន្ទាប់ពីបើកម៉ូតូយ៉ាងលឿនបុកផ្ទប់រ៉ឺម៉កដឹកទឹកកកទាំងកំរោលនៅចំណុចផ្លូវលេខ៣៦៩ ភូមិអូរអណ្តូង …
រាជធានីភ្នំពេញ ៖ បុរសម្នាក់ត្រូវរងរបួសដាច់ជើងម្ខាងខ្ទេចខ្ទីអស់ បន្ទាប់ពីបើកម៉ូតូយ៉ាងលឿនបុកផ្ទប់រ៉ឺម៉កដឹកទឹកកកទាំងកំរោលនៅចំណុចផ្លូវលេខ៣៦៩ ភូមិអូរអណ្តូង សង្កាត់ព្រែកប្រា ខណ្ឌច្បារអំពៅ កាលពីវេលាម៉ោង១ រសៀល ថ្ងៃទី២០ ខែតុលា ឆ្នាំ២០១៦ ។
បុរសរងគ្រោះពុំត្រូវបានស្គាល់អត្តសញ្ញាណទេ ព្រោះក្រោយកើតហេតុត្រូវបានប្រជាពលរដ្ឋទំនាក់ទំនងទៅរថយន្តសាម៉ុយដឹកយកទៅសង្គ្រោះភ្លាម ។ ដោយឡែកម្ចាស់រ៉ឺម៉ករត់គេចខ្លួនបាត់ស្រមោល ។
ប្រភពព័ត៌មានពីសាក្សីនៅកន្លែងកើតហេតុបានរៀបរាប់ឲ្យដឹងថា មុនពេលកើតហេតុគេសង្គេតឃើញបុរសរងគ្រោះជិះម៉ូតូ១គ្រឿងម៉ាកហុងដាឌ្រីម សេ១២៥ ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ ភ្នំពេញ 1FO-6805 តែម្នាក់ឯងតាមបណ្តោយផ្លូវព្រែកប្រា (ផ្លូវលេខ៣៦៩) ទិសដៅពីជើងទៅត្បូងក្នុងល្បឿនយ៉ាងលឿន និងក្នុងស្ថានភាពស្រវឹងជោក ខណៈមកដល់ចំណុចកើតហេតុ ក៏បានរេចង្កូតជ្រុលទៅបុកផ្ទប់រ៉ឺម៉កដឹកទឹកកក១គ្រឿងក្នុងទិសដៅបញ្ច្រាសគ្នាពេញទំហឹងបណ្តាលឲ្យជើងខាងឆ្វេងបុរសជាម្ចាស់ម៉ូតូត្រូវបុកជាមួយដែករ៉ឺម៉ករងរបួសខ្ទេច សន្លប់ស្តូកស្តឹងភ្លាមៗនៅហ្នឹងកន្លែង ។
ក្រោយពេលកើតហេតុ សមត្ថកិច្ចបានចុះទៅធ្វើការវាស់វែង និងធ្វើកំណត់ហេតុ រួចយកម៉ូតូនិងរ៉ឺម៉កទៅរក្សាទុកនៅអធិការដ្ឋាននគរបាលខណ្ឌច្បារអំពៅ រង់ចាំដោះស្រាយតាមនិតិវិធីនៅពេលក្រោយ ៕
ចែករំលែកព័តមាននេះ