រហូតដល់រសៀលថ្ងៃនេះ កំណាត់ផ្លូវចំការដូងនៅតែបិទចរាចរនៅឡើយ
រាជធានីភ្នំពេញ ៖ អាជ្ញាធរបាននិយាយថា គិតរហូតមកដល់រសៀលថ្ងៃទី២០ ខែតុលា ឆ្នាំ២០១៦នេះ កំណាត់ផ្លូវលេខ២១៧ ហៅផ្លូវចំការដូង នៅតែបន្តបិទចរាចរនៅឡើយ …
រាជធានីភ្នំពេញ ៖ អាជ្ញាធរបាននិយាយថា គិតរហូតមកដល់រសៀលថ្ងៃទី២០ ខែតុលា ឆ្នាំ២០១៦នេះ កំណាត់ផ្លូវលេខ២១៧ ហៅផ្លូវចំការដូង នៅតែបន្តបិទចរាចរនៅឡើយ …
រាជធានីភ្នំពេញ ៖ អាជ្ញាធរបាននិយាយថា គិតរហូតមកដល់រសៀលថ្ងៃទី២០ ខែតុលា ឆ្នាំ២០១៦នេះ កំណាត់ផ្លូវលេខ២១៧ ហៅផ្លូវចំការដូង នៅតែបន្តបិទចរាចរនៅឡើយ យានយន្តគ្រប់ប្រភេទត្រូវបានហាមឃាត់មិនឲ្យធ្វើដំណើរឆ្លងកាត់ទៅមកដដែល ដោយសារស្ថានភាពទឹកនៅតែបន្តលិចមិនទាន់ស្រកនៅឡើយ ព្រមទាំងហូរកាត់យ៉ាងខ្លាំង និងមិនអាចមើលដឹងថា ចំណុចត្រង់ណាមានជង្ហុក និងចំណុចត្រង់ណាអត់ជង្ហុកនោះទេ អាចប្រឈមនឹងគ្រោះថ្នាក់គ្រប់ពេលបាន ដូច្នេះដើម្បីការពារសុវត្ថិភាពជូនប្រជាពលរដ្ឋគ្រប់គ្នា ទើបមិនអាចបើកឲ្យធ្វើចរាចរទៅមកតាមផ្លូវនោះបាន ។
កំណាត់ផ្លូវលេខ២១៧ហៅផ្លូវចំការដូងនេះត្រូវបានទឹកជន់លិច និងហូរកាត់ប្រវែងជាង២ពាន់ម៉ែត្រ និងមានជម្រៅរហូរដល់ទៅ១ម៉ែត្រ គឺចាប់ពីត្រង់ចំណុចខាងត្បូងស្ពានព្រែកជ្រៃ ភូមិស្ពានថ្ម សង្កាត់ស្ពានថ្ម រហូតដល់ត្រង់ចំណុចរង្វង់មូលដីក្រហម ស្ថិតក្នុងភូមិប្រធាតុ សង្កាត់រលួស ខណ្ឌដង្កោ មានរយៈពេល៣ថ្ងៃមកហើយ ដោយគិតចាប់ពីល្ងាចថ្ងៃទី១៨ ខែតុលាមក ។
ប្រភពដដែលបានបន្តថា យានយន្តគ្រប់ប្រភេទ និងអ្នកដំណើរទាំងឡាយ ដើម្បីគេចផុតពីគ្រោះថ្នាក់ជាយថាហេតុនោះ គឺបានបង្វែរឲ្យទៅតាមផ្លូវវាងមាន២កន្លែង គឺវាងតាមផ្លូវជាតិលេខ២ ទៅកាន់ផ្លូវលេខ២៧១បានដូចគ្នា ដោយត្រូវចរាចរឆ្លងកាត់តាមមហាវិថីសម្តេចអគ្គមហាសេនាបតីតេជោ ហ៊ុន សែន ឬផ្លូវ៦០ម៉ែត្រក្នុងគម្រោងអភិវឌ្ឍន៍បឹងជើងឯក ។ និងទី២ វាងតាមផ្លូវជាតិលេខ២ ចូលទៅផ្លូវលេខ២៧១ ត្រូវចរាចរឆ្លងកាត់តាមស្ពានព្រែកថ្លឹង និងទៅដល់ត្រង់ចំណុចផ្លូវបំបែកជាបួនខាងជើងគល់ស្ពានព្រែកជ្រៃបានដូចគ្នា ។
ដោយឡែកម្ពស់ទឹកជនន់ស្ទឹងព្រែកត្នោតបានស្រកច្រើនមែនទែនហើយ នៅក្នុងសង្កាត់ផ្នែកខាងលើ ដូចជាសង្កាត់ប្រទះឡាង,សាក់សំពៅ, ក្រាំងពង្រ និង គងនយ ហើយបន្តលិចនៅសង្កាត់ផ្នែកខាងក្រោមដដែលមានដូចជា សង្កាត់ព្រែកកំពឹស, ទៀន,រលួស, ដង្កោ, ជើងឯក ជាដើម ប៉ុន្តែសង្ឃឹមថា ទឹកនឹងឆាប់ស្រកទៅវិញ ប្រសិនបើគ្មានភ្លៀងធ្លាក់បន្តនៅឯតំបន់សំខាន់ៗនៅក្នុងខេត្តកំពង់ស្ពឺទៀតទេនោះ ។
ប្រភពដដែលបានបន្តថា ទាក់ទិនទៅនឹងទឹកជំនន់នោះ មានការយកចិត្តទុកដាក់យ៉ាងខ្លាំងពីថ្នាក់ដឹកនាំកំពូលៗ ជាក់ស្ដែងកាលពីព្រឹកថ្ងៃទី២០ ខែតុលា ឆ្នាំ២០១៦ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា បានអញ្ជើញទៅពិនិត្យដោយផ្ទាល់នៅផ្លូវលំដែលត្រូវទឹកហូរបុកបណ្ដាលឲ្យដាច់ប្រវែងជាង៤០ម៉ែត្រនៅក្នុងភូមិសាលា សង្កាត់ទៀន ខណ្ឌដង្កោ ដែលបានធ្វើឲ្យទឹកស្ទឹងហូរជនលិចដីស្រែចម្ការ ភូមិឋានប្រជាពលរដ្ឋ និងផ្លូវថ្នល់ជាច្រើនខ្សែ ជាពិសេសកំណាត់ផ្លូវលេខ២១៧ហៅផ្លូវចំការដូងរហូតមិនអាចធ្វើចរាចរបាន ហើយនៅក្នុងខណៈចុះពិនិត្យពីស្ថានភាពផ្លូវដាច់នោះ សម្ដេចក៏បានជួបសំណេះសំណាល សាកសួរពីបញ្ហាផ្សេងជាមួយក្រុមអ្នកបច្ចេកទេសរបស់ក្រសួងធនធានទឹក និងឧតុនិយម ព្រមទាំងអាជ្ញាធរមូលដ្ឋាន ដែលប្រចាំការនៅទីនោះ ព្រមទាំងបានឧបត្ថម្ភនូវថវិកាចំនួន២លានរៀលដល់ក្រុមការងារខាងលើនោះផងដែរ ៕
ចែករំលែកព័តមាននេះ