រាជធានីភ្នំពេញ ៖ នៅថ្ងៃសៅរ៍ទី២២ តុលា ខានស្អែកនេះ ការប្រកួតដណ្ដើមពិន្ទុក្នុងជុំផ្ដាច់ព្រ័ត្ររវាងកីឡាករកម្ពុជា និងកីឡាករថៃរបស់ព្រឹត្តិការណ៍ដណ្ដើមជើងឯកខ្សែក្រវាត់ខារ៉ាបាវដល់ថ្ងៃកំណត់ហើយ ។ កីឡាករកម្ពុជាដែលស្ថិតក្នុងក្ដីសង្ឃឹមខ្ពស់២រូបគឺ រឿម វណ្ណៈ និងឌុម កែវដា នឹងក្លាយជាគូប្រកួតស្លាប់រស់ដោយចៀសមិនផុតសម្រាប់ព្រឹត្តិការណ៍មួយនេះ។
លោក ញាណ សុធី អ្នករៀបចំការប្រដាល់ប្រចាំស្ថានីយទូរទស្សន៍អាស៊ីអាគ្នេយ៍បានអះអាងថា ការប្រដាល់ដែលមានឈ្មោះថា
«ប្រដាល់អន្តរជាតិជើងឯកខ្សែក្រវាត់ខារ៉ាបាវ» បានឈានដល់ជុំចុងក្រោយក្នុងការសន្សំពិន្ទុហើយ ដោយក្នុងចំណោមកីឡាករកម្ពុជា៤នាក់គឺធ្លាក់២នាក់ដោយស្វ័យប្រវត្តិបាត់ហើយ នៅរង់ចាំអ៊ុតមើលតែកីឡាករកម្ពុជា២នាក់សម្រាប់ថ្ងៃសៅរ៍នេះប៉ុណ្ណោះ ។ លោកថា ការប្រកួតនឹងក្ដៅគគុក ដោយសារតែកីឡាករកម្ពុជា រឿម វណ្ណៈ និងឌុម កែវដា សុទ្ធតែត្រូវការឈ្នះ ហើយកីឡាករថៃដែលត្រូវប៉ះប្រកួតជាមួយពួកគេក៏ត្រូវការឈ្នះដើម្បីបានឡើង។ បើទោះជាគ្មានអ្នកណាទាយថាពួកគេនឹងប្រកួតខ្លាំងកម្រិតណា ប៉ុន្តែការប្រកួតអស់ពីសមត្ថភាពរៀងខ្លួនលោកថានឹងកើតឡើងដោយគ្មានការបង្ខំដោយសារតែកីឡាករម្ខាងៗសុទ្ធតែត្រូវការឈ្នះដើម្បីបានឡើងទៅកាន់វគ្គជើងឯក ។ លោកថា ការប្រកួតនៅរសៀលថ្ងៃសៅរ៍ខានស្អែកនេះ នឹងប្រកួតយកតែកីឡាករកម្ពុជាម្នាក់ដែលមានពិន្ទុខ្ពស់ជាងគេ និងកីឡាករថៃម្នាក់ដែលមានពិន្ទុខ្ពស់ជាងគេឱ្យឡើងប្រកួតផ្ដាច់ព្រ័ត្រ ទើបការប្រកួតកាត់ក្ដីវាច្បាស់ណាស់ថានឹងធ្វើឱ្យជំនួបប៉ះគ្នាកក្រើកញាក់សាច់ ។ ការប្រកួតថ្ងៃខានស្អែក កីឡាកររឿម វណ្ណៈ មិនត្រឹមតែត្រូវការឈ្នះពិន្ទុកីឡាករថៃប៉ុណ្ណោះ គឺត្រូវការផ្ដួលកីឡាករថៃឱ្យសន្លប់ដើម្បីប្រជែងឱកាសក្នុងពេលកីឡាករ ឌុម កែវដា ក្លាយជាអ្នកចាញ់ការប្រកួតកីឡាករថៃ ។ ការប្រកួតសម្រាប់ជុំចុងក្រោយនេះ លោកថាកីឡាករឌុម កែវដា អត់ទាន់ច្បាស់ថានឹងបានទៅវគ្គផ្ដាច់ព្រ័ត្រនិងមានសំណាងឈ្នះកីឡាករថៃទៀតទេ ដោយសារតែកីឡាករថៃដែលត្រូវប៉ះកីឡាកររូបនេះក៏ត្រូវការឈ្នះដើម្បីបាននាំមុខពិន្ទកីឡាករថៃផ្សេងទៀត ប្រជែងយកឱកាសឡើងប្រកួតផងដែរ។
អ៊ីចឹងហើយការប្រកួតមួយនេះលោកថាកីឡាកររឿម វណ្ណៈ នៅមានសង្ឃឹមខ្ពស់ បើទោះជាពិន្ទុរបស់គេនៅក្នុងពេលនេះចាញ់ប្រៀបឌុម កែវដា ក៏ដោយ។ លោកនិយាយថា ឆ្លងកាត់ការប្រកួតចំនួន៣លើក រឿម វណ្ណៈទើបតែមាន៧ពិន្ទុ ហើយកីឡាករឌុម កែវដា គេមាន៩ពិន្ទុ។ រវាងគូទាំងពីរបើកីឡាករកម្ពុជាបានឈ្នះដូចគ្នានោះ រឿម វណ្ណៈ នឹងត្រូវហាលអាវ តែបើរឿម វណ្ណៈឈ្នះ ហើយឌុម កែវដា ចាញ់ នោះពួកគេនឹងមានពិន្ទុស្មើគ្នា ដែលឈានទៅប្រជែងឱកាសឡើងដោយជៀសមិនផុត ។ យ៉ាងណាមិញ លោកថា កីឡាករឌុម កែវដា នៅតែមានប្រៀបល្អជាងដោយសារតែកីឡាកររឿម វណ្ណៈ បើមិនឈ្នះដោយផ្ដួលកីឡាករថៃឱ្យសន្លប់ក្នុងទឹកណាមួយនោះទេ គឺទោះជាមានពិន្ទុស្មើកីឡាករឌុម កែវដា ក៏ឱកាសឈ្នះនៅតែជារបស់ឌុម កែវដានោះដែរ។ អ៊ីចឹងហើយទើបការប្រកួតរវាងកីឡាករ២គូអន្តរជាតិនៅក្នុងព្រឹត្តិការណ៍ខារ៉ាបាវនេះ នឹងក្លាយជាការប្រកួតដែលមិនអាចកីឡាករណាម្នាក់នឹងបោះបង់សមត្ថភាពនោះឡើយ ។
ព្រឹត្តិការណ៍ប្រកួតដណ្ដើមខ្សែក្រវាត់ខារ៉ាបាវនេះមានកីឡាករដំបូងទីចំនួន៨រូបគឺកម្ពុជា៤រូបដូចជាម្ចាស់ខ្សែក្រវាត់ K-Cement ឆៃ សារ៉ា មកពីក្លិបក្រសួងការពារជាតិ កីឡាករម៉ន ចាន់ដារ៉ា មកពីក្លិបការិយាល័យទី៥កងទ័ពជើងគោក កីឡាកររឿម វណ្ណៈ មកពីក្លិបរាជសីហ៍ខេត្តបន្ទាយមានជ័យ និងកីឡាករ ឌុម កែវដា មកពីក្លិបមកុដរាជសីហ៍ ។ កីឡាករថៃរួមមានជើងខ្លាំងAram Boy កីឡាករ Pha Yalek កីឡាករ Pravit និងកីឡាករ Yort Sayam ។ យ៉ាងណាមិញ ក្នុងចំណោមកីឡាករកម្ពុជាគឺមានតែឌុម កែវដា និងរឿម វណ្ណៈ ប៉ុណ្ណោះដែលស្ថិតក្នុងការអ៊ុតមើលពីលទ្ធផល ។
សមាសភាពសម្រាប់រសៀលថ្ងៃសៅរ៍ខានស្អែកនេះរួមមាន កីឡាករ រឿម វណ្ណៈ ប៉ះប្រកួតយក៣ពិន្ទុចុងក្រោយជាមួយកីឡាករថៃឈ្មោះ Pha Yalek ដើម្បីទៅកាន់វគ្គបន្ត ។ មួយគូទៀតគឺកីឡាករកម្ពុជា ឌុម កែវដា ប៉ះជាមួយកីឡាករថៃឈ្មោះ Aram Boy ដែលជាជើងខ្លាំងម្នាក់ក្នុងពូលថៃ ។ ជំនួបរបស់ពួកគេមានការចាប់អារម្មណ៍យ៉ាងពេញទំហឹង ដោយសារតែម្នាក់ៗសុទ្ធតែត្រូវការ៣ពិន្ទុដើម្បីគេចចេញពីការហាលអាវក្នុងពេលគិតពិន្ទុ ។ ជាពិសេសកីឡាករកម្ពុជា បើអ្នកណាចាញ់ថៃជាថ្មីម្ដងទៀត គឺមិនខុសពីធ្លាក់ស្វ័យប្រវត្តិនោះទេ ក្នុងពេលដែលកីឡាករឌុម កែវដា ត្រូវបានសិទ្ធិពិសេស តែក៏មិនអាចចាញ់បានដែរ ។
កីឡាករ រឿម វណ្ណៈ និងកីឡាករឌុម កែវដា សុទ្ធតែអះអាងថា ព្រឹត្តិការណ៍ដណ្ដើមពិន្ទុរបស់ក្រុមហ៊ុន«ខារ៉ាបាវ»សម្រាប់ថ្ងៃខានស្អែកសំខាន់សម្រាប់ពួកគេ ដោយសារជាវគ្គកាត់ក្ដីចុងក្រោយ ថាគេបានឡើងឬមិនបាននៅទីបំផុតនោះ។ កីឡាករទាំងពីរបានអះអាងថា ពួកខ្លួនប្រឹងប្រែងហ្វឹកហាត់សំបើមណាស់ក្នុងរយៈពេលត្រៀមខ្លួន។ យ៉ាងណាមិញ លោកញាណ សុធី ហាក់មិនហ៊ានរំពឹងថាកីឡាករកម្ពុជានឹងឈ្នះទាំង២នោះទេ ដោយសារតែកីឡាករថៃក៏ប្រកាសពីការចង់ឈ្នះឱ្យខាងតែបានដូចគ្នា ៕
ចែករំលែកព័តមាននេះ