បាល់ទាត់ពានរង្វាន់ KMH Champions League រដូវកាលទី2 ចាប់ផ្ដើមប្រកួតនៅថ្ងៃខានស្អែកនេះ
រាជធានីភ្នំពេញ ៖ ការប្រកួតបាល់ទាត់ ពាក់កណ្ដាលអាជីពធំជាងគេបង្អស់នៅកម្ពុជាដែលមានឈ្មោះថា ការប្រកួតដណ្តើមពាន KMH Champions League
រាជធានីភ្នំពេញ ៖ ការប្រកួតបាល់ទាត់ ពាក់កណ្ដាលអាជីពធំជាងគេបង្អស់នៅកម្ពុជាដែលមានឈ្មោះថា ការប្រកួតដណ្តើមពាន KMH Champions League នឹងចាប់ផ្តើមជាផ្លូវការពីថ្ងៃទី២២ តុលា ឆ្នាំ២០១៦ ដល់ថ្ងៃទី១៦ កក្កដា ឆ្នាំ២០១៧ នៅលើទីលានចំនួន២ គឺទីលាន KMH ក្នុងខណ្ឌដង្កោ និងទីលានវេស្ទើន ឬស្សីកែវ។
លោក កាំង សេន ប្រធានគណៈកម្មការរៀបចំការប្រកួតបានឱ្យដឹងថា ការប្រកួតពានរង្វាន់ KMH Champions League រដូវកាលទី២នេះធ្វើឡើងពេញមួយរដូវកាលដែលមានលក្ខណៈប្រហាក់ប្រហែលនឹងពានបាល់ទាត់អឺរ៉ុប គឺមានការប្រកួតក្នុងទឹកដីនិងក្រៅទឹកដី (Home &Away) ។ អ្វីដែលកាន់តែអស្ចារ្យជាងរដូវកាលមុននោះគឺមានការផ្សាយបន្តផ្ទាល់តាមកញ្ចក់ទូរទស្សន៍ភីអិនអិនពេញមួយរដូវកាលតែម្ដង និងមានប្រាក់រង្វាន់ច្រើនជាងមុន។
ព្រឹត្តិការណ៍បាល់ទាត់ពានរង្វាន់ KMH Champions League រដូវកាល២០១៦-២០១៧ មានក្រុមចំនួន៣២ចូលរួមដោយចែកចេញជា៨ពូលក្នុងមួយពូលមាន៤ក្រុម ធ្វើឡើងនៅរៀងរាល់ថ្ងៃសៅរ៍វេលាម៉ោង៦ល្ងាច ។
ព្រឹតិ្តការណ៍មួយនេះ អនុញ្ញាតឱ្យមានកីឡាករអាជីព២រូបនិងកីឡាករបរទេស៤រូបចូលរួម ប៉ុន្តែបង្ហាញខ្លួនតែ២រូបប៉ុណ្ណោះនៅលើទីលាន ។
KMH Champions League បង្កើតឡើងនៅក្នុងឆ្នាំ២០១៥ ដែលមានការច្របាច់បញ្ចូលគ្នារវាងក្រុមបាល់ទាត់ល្អៗនិងធំក្នុងរាជធានីភ្នំពេញ ។ ព្រឹត្តិការណ៍មួយនេះបង្កើតឡើងក្នុងគោលបំណងចូលរួមចំណែកលើកកម្ពស់ និងអភិវឌ្ឍវិស័យកីឡាបាល់ទាត់នៅកម្ពុជា តាមរយៈការផ្ដល់ឱកាសដល់យុវជនក្នុងការអភិវឌ្ឍទេពកោសល្យនិងបង្ហាញសមត្ថភាពរបស់ខ្លួន ព្រមទាំងប្រមូលថវិកាសប្បុរសធម៌ដើម្បីជួយដល់សង្គម ។ ជាក់ស្ដែងការប្រកួតបាល់ទាត់ពានរង្វាន់ KMH Champions League រដូវកាលទី១ប្រមូលបានថវិកាចំនួន៣ម៉ឺនដុល្លារអាមេរិកជូនដល់មន្ទីរពេទ្យគន្ធបុប្ផា ៕
ចែករំលែកព័តមាននេះ