រាជធានីភ្នំពេញ ៖ ផ្ទះមួយកន្លែងដែលម្ចាស់ជួលទៅឱ្យយអ្នកផ្សេងស្នាក់នៅ ហើយអ្នកជួលស្នាក់នៅនោះបានបិទទ្វារចាក់សោចោល ព្រោះតែរវល់ចេញទៅក្រៅប្រកបរបររកស៊ីបាត់នោះ ក៏ស្រាប់តែមានមានភ្លើងឆាបឆេះនៅខាងក្នុងទាំងព្រឹកតែម្ដង។ខណៈនោះ បានបង្កឲ្យមានការភ្ញាក់ផ្អើលដល់អ្នកជិតខាង រាយការណ៍ជូនអាជ្ញាធរ និងនគរបាលខណ្ឌពោធិ៍សែនជ័យជួយអន្តរាគមន៍ភ្លាមៗដែរ ព្រោះតែខ្លាចឆេះរាលដាលដល់ផ្ទះពួកគាត់ដែលស្ថិតនៅជាប់គ្នានោះដែរ ។
ហេតុការណ៍នេះ បានកើតឡើងកាលពីវេលាម៉ោង៧និង៣៥នាទីព្រឹកថ្ងៃទី៧ ខែឧសភា ឆ្នាំ២០២២ នៅនៅចំណុចផ្ទះលេខ៣១ ស្ថិតនៅក្នុងភូមិតាងួន២ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។
នៅពុំទាន់មានការអះអាងណាមួយបញ្ជាក់ថា អគ្គិភ័យនេះបង្កឡើងដោយសារតែអ្វីច្បាស់លាស់នៅឡើយទេ ប៉ុន្តែតាមការសន្និដ្ឋាននានាសង្ស័យបណ្ដាលមកពីការឆ្លងចរន្តអគ្គិសនី ហើយអីវ៉ាន់និងសម្ភារៈប្រើប្រាស់ផ្សេងៗ ដែលស្ថិតនៅក្នុងផ្ទះនោះត្រូវបានភ្លើងឆាបឆេះអស់ ។
យោងតាមប្រភពពីអ្នករស់នៅជិតខាងផ្ទះខាងលើបាននិយាយថា ផ្ទះនេះត្រូវបានម្ចាស់ជួលទៅឲ្យអ្នកផ្សេងស្នាក់នៅរាល់ថ្ងៃ ហើយអ្នកដែលជួលស្នាក់នៅនោះពេលថ្ងៃពុំសូវនៅទេតែងតែបិទទ្វារចាក់សោចោល ព្រោះគាត់ជាប់រវល់ចេញទៅធ្វើការរកសុីនៅខាងក្រៅ។ ដោយឡែក នៅព្រឹកថ្ងៃកើតហេតុ ក្រោយពេលគាត់ចាកចេញទៅបាត់មិនយូរប៉ុន្មានក៏ស្រាប់តែមានអគ្គិភ័យឆាបឆេះចេញពីខាងក្នុង បង្កជាផ្សែងហុយទ្រលោមតែម្ដង ។
ប្រភពដដែលបានបន្តទៀតថា ខណៈនោះបានបង្កឲ្យមានការភ្ញាក់ផ្អើលទាំងព្រឹក ហើយដោយសារតែផ្ទះនេះបិទទ្វារចាក់សោពុំអាចប្របំពង់ពន្លត់អគ្គិភ័យចូលទៅបាញ់ពន្លត់បាន ហើយមានការព្រួយបារម្ភខ្លាចឆេះរាលដល់ផ្ទះពួកគាត់ដែលស្ថិតនៅជិតនោះទៀត។ ទើបពួកគាត់ដែលជាអ្នកជិតខាងបានរាយការណ៍សុំជំនួយពីអាជ្ញាធរនិងនគរបាលខណ្ឌពោធិ៍សែនជ័យឲ្យជួយអន្តរាគមន៍ភ្លាមៗ ។ ពេលនោះ អាជ្ញាធរបាននាំយករថយន្តពន្លត់អគ្គិភ័យ២គ្រឿង ដែលប្រចាំការ នៅសាលាខណ្ឌពោធិ៍សែនជ័យទៅបាញ់ពន្លត់រហូតរលត់ទៅវិញ និងពុំបណ្ដាលឲ្យមានអ្នកស្លាប់ឬរងរបួសនៅក្នុងហេតុការណ៍នេះឡើយ៕
ចែករំលែកព័តមាននេះ