ប្រាសាទស្រីទ្រុឌទ្រោមខ្លាំងទាមទារការជួសជុលថែទាំ
ខេត្តកំពង់ឆ្នាំង ៖ «ប្រាសាទស្រី» គឺជាប្រាសាទមួយមានវ័យចំណាស់ ក្នុងចំណោមប្រាសាទជាច្រើនក្នុងស្រុកកំពង់លែង ។ ប្រាសាទនោះស្ថិតនៅវត្តប្រាសាទ ក្នុងភូមិប្រាសាទ ឃុំដា ស្រុកកំពង់លែង
ខេត្តកំពង់ឆ្នាំង ៖ «ប្រាសាទស្រី» គឺជាប្រាសាទមួយមានវ័យចំណាស់ ក្នុងចំណោមប្រាសាទជាច្រើនក្នុងស្រុកកំពង់លែង ។ ប្រាសាទនោះស្ថិតនៅវត្តប្រាសាទ ក្នុងភូមិប្រាសាទ ឃុំដា ស្រុកកំពង់លែង ខេត្តកំពង់ឆ្នាំង ។ ដោយសារតែវ័យចំណាស់ និងកត្តាធម្មជាតិ ធ្វើឱ្យប្រាសាទកាន់តែទ្រុឌទ្រោមជាលំដាប់ ។
លោកតានត់ នន អាយុ៧៤ឆ្នាំ ប្រធានគណៈកម្មការវត្តប្រាសាទ មានប្រសាសន៍កាលពីពេល ថ្មីៗកន្លងមកថា «ប្រាសាទស្រីមានវ័យចំណាស់ និងមានសភាពទ្រុឌទ្រោមខ្លាំងណាស់ ដូច្នេះហើយបើគ្មានការថែទាំទេ ប្រាសាទនេះអាចនឹងដួលរលំជាពុំខាន ។ ដោយសារបញ្ហានេះ ខ្ញុំនិងគណៈកម្មការវត្តសូមអំពាវដល់មន្ទីរពាក់ព័ន្ធ ពិសេសក្រសួងសូមដាក់ឱ្យមានឆ្មាំប្រាសាទដើម្បីមកជួយថែរក្សាប្រាសាទនេះផង ។ កាលពីមុនធ្លាប់មានឆ្មាំប្រាសាទជួយថែរក្សាដែរ តែពេលនេះគ្មានទេ ។ កាលពីអំឡុងពេលមុនដាក់បិណ្ឌ ថ្មីៗនេះ មានដុះស្មៅ វល្លិ និងដើមឈើក្លាយជាព្រៃស៊ុបទ្រុប តាំងពីក្រោមរហូតដល់លើកំពូលប្រាសាទ ហើយគណៈកម្មការវត្តបានជួលគេឡើងកាប់ព្រៃស៊ុបទ្រុបនោះចេញ ទើបឃើញមានភាពស្រឡះបែបនេះ» ។
លោកតានត់ នន អំពាវនាវចំពោះស្ថាប័នមានសមត្ថកិច្ចឱ្យជួយជួសជុល អភិរក្សប្រាសាទស្រីឱ្យនៅគង់វង្សផង ។
ប្រធានមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង ឱ្យដឹងថា ប្រាសាទស្រីកសាងឡើងក្នុងសតវត្សទី៩ ក្នុងរចនាបថកំពង់ព្រះ គឺជំនាន់ កាលកសាងប្រាសាទកំពង់ព្រះ ស្ថិតក្នុងឃុំឆ្នុកទ្រូ ស្រុកបរិបូណ៌ដែរ ។ ប្រាសាទនេះកសាងឡើងដោយស្តេចស្រី គឺម្ចាស់ក្សត្រីជ័យទេវី ។
ពាក់ព័ន្ធទៅនឹងឆ្មាំប្រាសាទ ប្រភពដដែលបញ្ជាក់ថា ឆ្មាំប្រាសាទ បានដាក់ជិតមួយឆ្នាំមកហើយ ប៉ុន្តែគណៈកម្មការវត្តមិនដឹង ដោយសារតែឆ្មាំទាំងនោះមិនសូវទៅមើល ព្រោះកំពុងផ្តោតជាសំខាន់លើប្រាសាទ ផ្សេងៗ ទៀត ហើយពេលនេះកំពុងកាប់ឆ្ការព្រៃដែលព័ទ្ធជិតប្រាសាទ ។
ប្រាសាទស្រីមានរឿងព្រេងតំណាលថា កាលកសាងប្រាសាទនេះ គឺមានប្រាសាទមួយទៀតឈ្មោះប្រាសាទប្រុស នៅមិនឆ្ងាយប៉ុន្មានពីគ្នាទេ ។ កាលកសាងប្រាសាទទាំងពីរ ពួកស្រីៗនិង ប្រុសៗបានភ្នាល់គ្នាថា បើខាងប្រុសចាញ់ខាងស្រី គឺប្រុសៗត្រូវចូលទៅដណ្តឹងស្រី តែបើប្រុសៗឈ្នះគឺស្រីទៅដណ្តឹងប្រុស។ កាលណោះដោយសារចាញ់កលល្បិច ស្រីៗ ដែលលួចបង្ហោះភ្លើងគោម ប្រុសៗស្មានតែផ្កាយព្រឹករះ ក៏នាំគ្នាឈប់សង់ប្រាសាទ ចំណែកស្រីៗបន្តធ្វើរហូតដល់ព្រឹករហូតរួចរាល់ ដូច្នេះហើយទើបខាងប្រុសចាញ់ខាងស្រី ។ ដោយសាររឿងភ្នាល់នោះហើយ ទើបតំណតមកសព្វថ្ងៃមានប្រពៃណីប្រុសទៅដណ្តឹងស្រីធ្វើជាប្រពន្ធ ៕
ចែករំលែកព័តមាននេះ