រាជធានីភ្នំពេញ ៖ ជនសង្ស័យជាចោរឆក់ចំនួនពីរនាក់ ត្រូវបានកម្លាំងនគរបាលប៉ុស្តិ៍ជ័យជំនះឃាត់ខ្លួន ក្រោយពីពួកគេបានជិះម៉ូតូមួយគ្រឿងធ្វើសកម្មភាពឆក់យកកាមេរ៉ាថតរូបមួយគ្រឿងពីបុរសអ្នកទេសចរណ៍ជនជាតិស្វីស ដែលកំពុងតែស្ពាយជាប់នឹងស្មា អូសបណ្តាលឲ្យដួលទាំងអស់គ្នានោះ។ ហេតុការណ៍នេះបានកើតឡើងកាលពីវេលម៉ោង១និង៤៥នាទីរសៀល ថ្ងៃទី១៩ ខែតុលា ឆ្នាំ២០១៦ នៅផ្លូវលេខ២០០ កែងនឹងផ្លូវលេខ៦៣(ផ្លូវត្រសក់ផ្អែម) ក្នុងសង្កាត់បឹងរាំង ខណ្ឌដូនពេញ។
តាមប្រភពព័ត៌មានពីមន្ត្រីនគរបាលបានប្រាប់ឱ្យដឹងថា បុរសជាជនសង្ស័យទាំងពីរនាក់មានទី១-ឈ្មោះ ស្រេង ឆក អាយុ ២៨ឆ្នាំ មុខរបរមិនពិតប្រាកដ មានទីលំនៅក្នុងសង្កាត់ស្ទឹងមានជ័យ ខណ្ឌមានជ័យ និងទី២-ឈ្មោះ យ៉ាន់ ឆក អាយុ ២៣ឆ្នាំ មុខរបមិនពិតប្រាកដ សង្កាត់ព្រែកកំពឹស ខណ្ឌដង្កោ។ នៅមុនពេលកើតហេតុ ខណៈពេលដែលបុរសជាអ្នកទេសចរណ៍ជនជាតិស្វីសមា្នក់កំពុងតែដើរតាមផ្លូវលេខ២០០តែម្នាក់ឯងក្នុងទិសដៅពីលិចទីកើត នៅពេលទៅដល់ចំណុចកើតហេតុខាងលើដោយបានស្ពាយកាមេរ៉ាថតរូបមួយគ្រឿងម៉ាក Nikon មួយគ្រឿងជាប់នឹងស្មានោះ។
តាមប្រភពដដែលក៏បានប្រាប់បន្តទៀតថា ក៏ស្រាប់តែលេចមុខក្រុមជនសង្ស័យទាំងពីរនាក់បានជិះម៉ូតូម៉ាក ហុងដា សេ១២៥ ពណ៌ខ្មៅ ពាក់ស្លាកលេខ កណ្តាល ១N-៨៩២៧ មួយគ្រឿង មកក្បែរហើយធ្វើសកម្មភាពឆក់យកកាមេរ៉ាពីបុរសជនជាតិស្វីសនោះតែម្តង។ ដោយសាតែខ្សែកាមេរ៉ានៅជាប់នឹងស្មារបស់បុរសជាជនបរទេសរូបនោះក៏បណ្តាលឲ្យអូស និងដួលទាំងអស់គ្នា ហើយក៏មានការភ្ញាក់ផ្អើលទៅដល់ប្រជាពលរដ្ឋនៅក្បែរខាង ក៏រត់ទៅជួយដេញចាប់បានភ្លាមៗទាំងពីរនាក់វាយម្នាក់មួយដៃ មួយជើង បែកក្បាលហូរឈាមទើបប្រគល់ទៅឲ្យកម្លាំងនគរបាលប៉ុស្តិ៍បឹងរាំងតែម្តង។
ក្រោយពេលកើតហេតុ កាមេរ៉ាថតរូបនោះត្រូវបានកម្លាំងនគរបាលប៉ុស្តិ៍បឹងរាំងប្រគល់ឲ្យទៅបុរសបរទេសរងគ្រោះវិញ ចំណែកឯក្រុមជនសង្ស័យជាចោរឆក់ទាំងពីរនាក់ត្រូវបានធ្វើការសាកសួរ និងកត់កំណត់ហេតុដើមម្បីបញ្ជូនខ្លួនទៅកាន់អធិការដ្ឋានខណ្ឌដូនពេញចាត់ការទៅតាមផ្លូវច្បាប់ជាបន្តទៅទៀត៕
ចែករំលែកព័តមាននេះ