រាជធានីភ្នំពេញ ៖ តារាចម្រៀង ស៊ីម សុវណ្ណដុល្លារ បានចូលមកកាន់សិល្បៈយ៉ាងយូរ ដោយបានពុះពារគ្រប់កិច្ចការទាំងអស់ បើទោះបីជាពេលខ្លះ ស្ទើរតែដួលរហូតចង់ងាកត្រឡប់ក្រោយបែបណាក្តី ។
យ៉ាងណាមិញ ក្តីរំពឹងរបស់លោកបានសម្រេចគោលដៅ បន្ទាប់ពីលោកត្រូវគេជ្រើសតាំងជាតារាចម្រៀងប្រចាំផលិតកម្មផ្ទាល់ លែងតែលតោលដូចមុនទៀត ។ បើទោះបីជាលោក រកបានទ្រនំជាផលិតកម្មថ្មីមួយ សម្រាប់ជ្រកជាទីពេញចិត្ត ក៏លោកចាត់ទុកថា នេះជាសមិទ្ធផលមួយ ដែលជួយឱ្យលោកមានសភាពល្អក្នុងសិល្បៈបន្តទៅមុខទៀត ហើយព្យាយាមខិតខំធ្វើបែបណា ឱ្យការច្រៀងឱ្យកាន់តែលេចធ្លោ ។
បើប្រៀបធៀបពីមុន លោកស៊ីម សុវណ្ណដុល្លារ ហាក់បាក់ទឹកចិត្តខ្លះ ក្នុងនាមជាតួថ្មីថ្មោងដែលដើរទៅណាមកណា រមែងមិនសូវមានគេចាប់អារម្មណ៍ សូម្បីតែនៅក្នុងសង្គមសិល្បៈ ដែលមានរៀមច្បងជាគំរូ លោកតែងតែបង្ហាញកាយវិការគោរពស្រឡាញ់សំពះសួរនាំ បើទោះជាគេមិនស្គាល់បែបណា ។
អ្វីដែលលោកមានការតាំងចិត្ត គឺរំពឹងថ្ងៃណាមួយ ទេពកោសល្យ និងសមត្ថភាពក្នុងការស្រឡាញ់សិល្បៈនឹងជួយឱ្យលោកបានប្រសើរសម្រេចតាមគោលដៅ ។
តារាចម្រៀង ស៊ីម សុវណ្ណដុល្លារ គឺជាអ្នកខេត្តកំពង់ចាម ប្រសិនបើលោកមិនចូលសិល្បៈ ក៏ជាតារាមុខស្រស់កាត់ចិនរូបនេះ មិនសូវជាពិបាកចិត្តឡើយ ព្រោះលោកមានតួនាទី ជាមន្ត្រីរាជការម្នាក់ ក្នុងជួរទាហានលំដាប់ម្នាក់ដែរ ដោយយល់ច្បាស់ពីតិចនិកការងារនេះ ហើយតាមការអះអាងរបស់លោកកិច្ចការរាល់ថ្ងៃ ក៏ល្អម្យ៉ាង ដែលទាក់ទិននឹងមុខតំណែង ។
អ្វីដែលលោកចេះតែប្រឹង គឺចិត្តស្រឡាញ់សិល្បៈ បានជាខំធ្វើការងារនេះ ដើម្បីចង់រក្សាទុកស្នាដៃទៅមុខ ទើបខំពុះពារជាមួយសិល្បៈ ដែលរកប្រាក់ចំណូលបានកាក់ល្អិតតែប៉ុណ្ណោះ ។
ចែករំលែកព័តមាននេះ