ខេត្តកណ្តាល ៖ បើតាមសេចក្តីរាយការណ៍បានឱ្យដឹងថា មានហេតុការណ៍គួរអោយសោកស្តាយមួយបានកើតឡើង បង្កអោយមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចស្រុកកៀនស្វាយ បន្ទាប់ពីសិស្សសាលា២នាក់លង់ទឹកស្លា.ប់ ខណៈពេលកំពុងតែស្ទូចត្រី ។ ហេតុការណ៍នេះ បានកើតឡើងនៅថ្ងៃទី០៤ ខែឧសភា ឆ្នាំ២០២២ វេលាម៉ោង៣រសៀល នៅចំណុចក្នុងភូមិព្រែកតាកែវ២ ឃុំសំរោងធំ ស្រុកកៀនស្វាយ ខេត្តកណ្ដាល។
សេចក្តីរាយការណ៍បន្តថា ជនរងគ្រោះទី១- ឈ្មោះ ឃុន សេរីសោភា ភេទប្រុស អាយុ១៤ឆ្នាំ ជនជាតិខ្មែរ មុខរបរសិស្ស មានទីលំនៅភូមិស្ទឹង ឃុំសំរោងធំ ស្រុកកៀនស្វាយ ខេត្តកណ្ដាល និងទី២- ឈ្មោះ សុត ពិសិដ្ឋ ភេទប្រុស អាយុ១៥ឆ្នាំ ជនជាតិខ្មែរ មុខរបរសិស្ស មានទីលំនៅភូមិព្រែកត្រែង២ ឃុំសំរោងធំ ស្រុកកៀនស្វាយ ខេត្តកណ្ដាល។
បើតាមសាក្សីបានប្រាប់អោយដឹងថា នៅថ្ងៃទី០៤ ខែឧសភា ឆ្នាំ២០២២ វេលាម៉ោង៣រសៀល ជនរងគ្រោះឈ្មោះ ឃុន សេរីសោភា និងឈ្មោះសុត ពិសិដ្ឋ បានចេញពីសាលារៀន ហើយក៏បាននាំគ្នាមកស្ទូចត្រីនៅមាត់ទន្លេមេគង្គ រួចក៏ចុះងួតទឹកលេងនៅក្នុងទន្លេ ស្រាប់តែឈ្មោះសុត ពិសិដ្ឋ មុជទឹកក៏បានលង់ទឹក ហើយស្រែកហៅអោយគេជួយ ពេលនោះមិត្តភក្តិដែលរៀនជាមួយគ្នាម្នាក់មិនស្គាល់ឈ្មោះ បានក្រឡេកឃើញមិត្តភក្តិខ្លួនលង់ទឹក ក៏លោតទៅហែលរុញពីក្នុងទឹក ដែលមានចំងាយពីច្រាំងទន្លេប្រហែល៤ម៉ែត្រទៅ៥ម៉ែត្រ លុះពេលជិតដល់មាត់ច្រាំង រួចបានលើកដៃអោយឈ្មោះ ឃុន សេរីសោភា មកជួយចាប់ដៃឈ្មោះសុត ពិសិដ្ឋ ដើម្បីទាយឡើងលើគោកវិញ តែជាកុសលក៏បានរអិលជើងធ្លាក់ទៅក្នុងទឹកដោយអោបគ្នាទាំងពីរនាក់ គឺឈ្មោះ ឃុន សេរីសោភា និងឈ្មោះសុត ពិសិដ្ឋ ហើយក៏លិចចូលទៅក្នុងទឹកទន្លេបាត់តែម្តង ។
សាក្សីបន្តទៀតថា បន្ទាប់មកទៀត មិត្តភក្តិដែលជួយរុញមកខាងនោះ ក៏ខំប្រឹងមុជរាវរកដែរ ប៉ុន្តែនៅតែរកមិនឃើញ ហើយក៏បានបង្កឱ្យមានការភ្ញាក់ផ្អើលដល់ប្រជាពលរដ្ឋភូមិព្រែកតាកែវ បាននាំគ្នាមកជួយសង្គ្រោះអោយហៅរកទូកឆៃរ៉ា មកមុជរាវរកឃើញស.ព ក៏ឃើញឈ្មោះ ឃុន សេរីសោភា និងឈ្មោះសុត ពិសិដ្ឋ បានអោបគ្នាជាប់ស្លា.ប់ទាំងពីរនាក់នៅក្នុងទឹកទន្លេមេគង្គនោះ ។
ក្រោយមកប្រជាពលរដ្ឋក៏បានរាយការណ៍មកសម្ថតកិច្ចប៉ុស្តិ៍នគរបាលសំរោងធំ ហើយបន្ទាប់ពីទទួលព័ត៌មានបានហើយ ប៉ុស្តិ៍នគរបាលសំរោងធំ បានចុះទៅដល់កន្លែងកើតហេតុ ដោយសហការជាមួយជំនាញផ្នែកនគបាលកោសល្យវិច្ច័យស្រុកកៀនស្វាយ ជួលទូកប្រជាជនវៀតណាមមកមុជរាវរកឃើញសាកស.ពជនរងគ្រោះទាំង២នាក់ដែលអោបគ្នាស្លា.ប់នៅក្នុងទឹកទន្លេមេកគង្គ រួចក៏បានយកស.ពទាំងពីរនាក់ឡើងគោកវិញ ។
ក្រោយពេលកើតហេតុ កម្លាំងប៉ុស្តិ៍នគរបាលរដ្ឋបាលប៉ុស្តិ៍សំរោងធំ សហការជាមួយកម្លាំងផ្នែកជំនាញកោសលវិច្ឆ័យ និងបច្ចេកទេស អាជ្ញាធរមូលដ្ឋាន ក្រុមគ្រូពេទ្យ និងចូលរួមដោយក្រុមគ្រួសារជនរងគ្រោះ បានពិនិត្យមើលស្លាកស្នាមជនរងគ្រោះឃើញថា ជនរងគ្រោះមិនមានស្លាកស្នាមអ្វីគួរអោយគត់សំគាល់នោះទេ ហើយជនរងគ្រោះពិតជាបានស្លា.ប់ដោយសារលង់ទឹកពិតមែន បន្ទាប់ពីក្រុមគ្រួសារបានទទួលស្គាល់ សមត្ថកិច្ចក៏បានប្រគល់ស.ពជនរងគ្រោះទាំង២នាក់ជូនទៅក្រុមគ្រួសារ ដើម្បីដឹកយកធ្វើបុណ្យតាមប្រពៃណី។
ចែករំលែកព័តមាននេះ