ប្រទេសថៃ ៖ មូលនិធិសកលបានលក់កំណត់ត្រាមូលបត្របំណុលថៃ ចំនួន១ប៊ីលានដុល្លារកាលពីសប្តាហ៍មុន នៅពេលការសោយទិវង្គតរបស់ព្រះមហាក្សត្រ Bhumibol Adulyadej បានបង្ហាញពីការបាត់បង់ឥទ្ធិពលស្ថិរភាពនៅក្នុងទិដ្ឋភាពនយោបាយរបស់ប្រទេសនេះ ។
កាលពីសប្តាហ៍មុន ប្រាក់បាតបានធ្លាក់ថ្លៃចំនួន៥ថ្ងៃជាប់ៗគ្នាក្នុងរយៈពេល១ឆ្នាំ ខណៈរូបិយប័ណ្ណនេះបានធ្លាក់ចុះដល់កម្រិតទាបបំផុតគិតចាប់តាំងពីខែមករា បន្ទាប់ពីការសោយទិវង្គតរបស់ព្រះមហាក្សត្រមានព្រះជន្ម៨៨ វស្សា ដែលទ្រង់បានប្រើពេលអស់៧ទសវត្សរ៍ក្នុងការរួបរួមប្រទេសនេះ ដែលធ្លាប់មានរដ្ឋប្រហារចំនួន១០ដង ។ ចំណែកការលក់នៅប្រទេសថៃបានបន្ថយលំហូរបំណុលក្នុងឆ្នាំនេះចំនួន១០,៧ប៊ីលានដុល្លារអាមេរិក ។ នេះបើយោងតាមទិន្នន័យចងក្រងដោយ Bloomberg ។
លោក Tim Condon ប្រធានផ្នែកស្រាវជ្រាវប្រចាំតំបន់អាស៊ីនៃក្រុមហ៊ុន ING Groep ប្រទេសសិង្ហបុរី ថ្លែងថា ៖ « ការលក់នេះច្រើនហួសហេតុពេក ខ្ញុំគិតថា វានឹងមិនក្លាយជាលទ្ធផលសម្រាប់អភិវឌ្ឍសេដ្ឋកិច្ចថៃទេ ។ វាជាពេលវេលាដ៏ពិសេសមួយសម្រាប់ប្រជាជនថៃ ហើយនេះគឺជាការផ្លាស់ប្តូរដ៏សំខាន់ ។ ប៉ុន្តែខ្ញុំរំពឹងថា នឹងមានភាពរលូនសម្រាប់ទីផ្សារហិរញ្ញវត្ថុ » ។
អ្នកនាំពាក្យរដ្ឋាភិបាល លោក Sansern Kaewkamnerd បានប្រាប់អ្នកកាសែតនៅទីក្រុងបាងកក កាលពីថ្ងៃអាទិត្យថា កិច្ចខិតខំប្រឹងប្រែងអភិវឌ្ឍជាតិនឹងបន្ត ខណៈប្រជាជនថៃកាន់ទុក្ខការសោយទិវង្គតស្តេច ហើយគណៈរដ្ឋមន្ត្រីនឹងជួបប្រជុំតាមការគ្រោងទុកនៅថ្ងៃអង្គារ ។
ប្រាក់បាតបានធ្លាក់ចុះ០,១% ឬស្មើនឹង៣៥.៣៧៥បាតក្នុង១ដុល្លារអាមេរិក នាម៉ោង១០ព្រឹក (ថ្ងៃទី១៧ តុលា) នៅទីក្រុងបាងកក។ នេះបើយោងតាមទិន្នន័យចងក្រងដោយ Bloomberg ។ វាបានបន្តខាតបង់បន្ទាប់ពីកើនឡើងរយៈពេល២ថ្ងៃ នៅពេលរូបិយប័ណ្ណអាស៊ីធ្លាក់ថ្លៃលើការកើនឡើងកំណើនអត្រាការប្រាក់របស់អាមេរិក ហើយបានធ្លាក់ចុះ២% ក្នុងខែតុលា ។
ជនជាតិថៃរាប់ម៉ឺននាក់បានតម្រៀបគ្នាតាមដងផ្លូវនៃទីក្រុងនេះកាលពីចុងសប្តាហ៍ ដើម្បីគោរពដល់ស្ដេច ដែលរាងកាយរបស់ទ្រង់ត្រូវបានបញ្ជូនពីមន្ទីរពេទ្យទៅកាន់ព្រះបរមរាជវាំង។
លោកនាយករដ្ឋមន្ត្រី Prayuth Chan-ocha បានស្តារភាពស្ងប់ស្ងាត់ ដោយនិយាយថា ការសោយទិវង្គតរបស់ព្រះមហាក្សត្រ និងការពន្យារពេលក្នុងការឡើងសោយរាជ្យនៃរាជបុត្ររបស់ទ្រង់ នឹងមិនប៉ះពាល់ដល់ផែនការបោះឆ្នោត ដែលគ្រោងធ្វើនៅចុងឆ្នាំ២០១៧ ទេ ៕
ចែករំលែកព័តមាននេះ