ខេត្តក្រចេះ ៖ អាជ្ញាធរខេត្តក្រចេះបានចេញសេចក្ដីជូនដំណឹងជាបន្ទាន់មួយ កាលពីថ្ងៃទី៤ ឧសភា ឆ្នាំ២០២២ ដោយចុះហត្ថលេខាលោក វ៉ា ថន អភិបាលខេត្តក្រចេះ ជម្រាបជូនសាធារណជន មន្ទីរអង្គភាព អាជ្ញាធរមូលដ្ឋាន និងប្រជាពលរដ្ឋដែលមានការពាក់ព័ន្ធ។
សេចក្ដីជូនដំណឹងរបស់សាលាខេត្តក្រចេះបានឲ្យដឹងថា កន្លងមក ក្រុមការងារចម្រុះថ្នាក់ ខេត្ត ស្រុក ឃុំ រួមជាមួយក្រុមការងាររបស់ក្រសួងកសិកម្មរុក្ខាប្រមាញ់ និងនេសាទបានចុះវាស់និងកាត់ចេញនូវផលប៉ះពាល់ដីស្រែចម្ការរបស់បងប្អូនប្រជាពលរដ្ឋក្នុងទីតាំងដីក្រុមហ៊ុនសម្បទានសេដ្ឋកិច្ចCHPB ក្នុងឃុំកំពងចាម ឃុំវឌ្ឍនះ ស្រុកសំបូរ និងឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ ព្រមទាំងអនុញ្ញាតឲ្យក្រុមហ៊ុនកាយក្រវ៉ាត់ព្រំ ដែលនៅសេសសល់ ដើម្បីចុះបញ្ជីជាដីឯកជនរបស់ក្រុមហ៊ុន ។ក៏ប៉ុន្តែនៅពេលថ្មីៗនេះ មានមេខ្យល់បានចុះទៅឃោសនាកៀងគរអូសទាញប្រជាពលរដ្ឋឲ្យចូលទន្ទ្រានបោះបង្គោលដីរដ្ឋ នៅក្នុងក្រវ៉ាត់ដីដែលបានកាយរួចយ៉ាងអនាធិបតេយ្យ ។
ជាក់ស្ដែង កាលពីថ្ងៃទី៥ ឧសភា ឆ្នាំ២0២២ លោកកៅ ម៉ាឌីឡែន ប្រធានមន្ទីរនគរូបនីយកម្ម សំណង់ និងសុរិយោដីខេត្តក្រចេះ បានដឹកនាំក្រុមការងារចុះដល់ទីតាំងដែលកំពុងមានវិវាទ ។
លោកកៅ ម៉ាឌីឡែន បានឲ្យដឹងថា ថ្មីៗនេះ មេខ្យល់គៀងគរប្រជាពលរដ្ឋទៅបោះបង្គោលយកដី នៅក្នុងក្រវ៉ាតព្រំដីយ៉ាងអនាធិបតេយ្យ សូមបញ្ឈប់ជាបន្ទាន់។ លោកប្រធានមន្ទីរបានលើកឡើងថា ទង្វើនេះ ជាទង្វើខុសច្បាប់ ហើយអាជ្ញាធរមានសមត្ថកិច្ច និងចាត់ទុកជាសកម្មភាពញុះញង់ បង្កផលប៉ះពាល់ដល់សន្តិសុខសង្គម។
លោក យុន គីម មេឃុំវឌ្ឍៈ បានបញ្ជាក់ថា មនុស្សដ៏សំខាន់ក្នុងការកៀងគរប្រជាពលរដ្ឋឲ្យចូលកាន់កាប់ដីដោយខុសច្បាប់ គឺមានឈ្មោះ គែន អុល រស់នៅឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ។
លោកមេឃុំបន្តទៀតថា បុគ្គលរូបនេះ បានដើរវាស់ដីលក់ឲ្យប្រជាពលរដ្ឋដោយមួយក្បាលដីទំហំ៥០ម៉ែត្រក្នុងតំលៃ១លានរៀល ក្បាល១០០ម៉ែត្រ២លានរៀល ដោយដើរបង្ហាញ និងបោះបង្គោលកំណត់ចំណាំតាមម្ចាស់រៀងៗខ្លួន ។
ព័ត៌មានបន្ថែមកោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ