អង់គ្លេស ៖ អាវ «Hand of God» ពាក់​ដោយ​ស្តេច​បាល់ទាត់​អា​ហ្ស​ង់​ទី​ន Diego Maradona ប្រកួត​តទល់​នឹង​អង់គ្លេស​នៅ​ពានរង្វាន់ World Cup ឆ្នាំ ១៩៨៦ ត្រូវ​បាន​នៅ​ក្នុង​តម្លៃ ៩,២៩​លាន​ដុល្លារ​អា​មេ​រិ​ក​។ ដែល​ជា​តម្លៃ​ខ្ពស់​បំផុត​មិន​ធ្លាប់​មាន​ពី​មុន​មក សម្រាប់​វត្ថុ​អនុស្សាវរីយ៍​កីឡា​។ នេះ​បើ​យោង​តាម​ប្រភព​ពី BBC ចេញផ្សាយ​កាលពី​ថ្ងៃ​ទី​៤ ខែឧសភា កន្លង​ទៅ​។

អាវ​លេខ​១០ «Hand of God» ឬ «​ដៃ​របស់​ព្រះ​» ពាក់​ដោយ​លោក Maradona ក្នុង​ការ​ប្រកួត​វគ្គ​៨​ក្រុម​ចុង​ក្រោយ​ពាន World Cup ឆ្នាំ ១៩៨៦ នៅ​ម៉ិ​ក​ស៊ិ​ក​។ គ្រា​ដែល​អា​ហ្ស​ង់​ទី​ន​យកឈ្នះ​អង់គ្លេស​លទ្ធផល ២-១​។ ប្រវត្តិ​ល្បី​រន្ទឺ​នៃ​អាវ​នេះ កើតឡើង​ពេល​លោក Maradona យកដៃ​ទះ​បាល់​បញ្ចូល​ទី​នៅ​នាទី​៥៥ ដែល​ជា​គ្រាប់​ទី​២​របស់​គាត់​ក្នុង​ការ​ប្រកួត​នោះ​។ ហើយ​ឆ្នាំ ១៩៨៦ ក៏​ជា​ឆ្នាំ​ដែល​អា​ហ្ស​ង់​ទី​ន​ជា​ម្ចាស់​ពាន World Cup ផង​ដែរ​។ បន្ទាប់​ពី​យកឈ្នះ​អា​ល្លឺ​ម៉​ង់​នៅ​វគ្គ​ផ្តាច់ព្រ័ត្រ​ដោយ​លទ្ធផល ៣-២​។ ខណៈ​លោក​ក៏​ឈ្នះ​ពាន​កីឡាករ​ល្អ​បំផុត​ប្រចាំ​ព្រឹត្តិការណ៍​ផង​ដែរ​។

អាវ «Hand of God» បច្ចុប្បន្ន​កាន់កាប់​ដោយ​លោក Steve Hodge អតីត​ខ្សែបម្រើ​អង់គ្លេស ដែល​បាន​ផ្លាស់​ប្តូរ​អាវ​ជាមួយ​លោក Maradona ក្រោយ​ចប់​ការ​ប្រកួត​នៅ​ឆ្នាំ​នោះ​។ ហើយ​ត្រូវ​បាន​ដាក់​តាំងនៅ​ក្នុង​សារមន្ទីរ​បាល់ទាត់​ជាតិ​អង់គ្លេស​។

ក្រុមហ៊ុន​ដេញថ្លៃ​ដ៏​ល្បី​បំផុត​របស់​ពិភពលោក Sotheby បាន​លក់​អាវ «Hand of God» នៅ​ក្នុង​តម្លៃលើស​ពី​តម្លៃ​ប៉ាន់ស្មាន​របស់​ពួក​គេ ដែល​មាន​ចន្លោះ​ពី​៥​លាន​ដុល្លារ ទៅ​ដល់​៧​លាន​ដុល្លារ​ប៉ុណ្ណោះ​។

សូម​រំលឹក​ថា លោក Diego Maradona បាន​ទទួលមរណភាព​កាលពី​ថ្ងៃ​ទី​២៥ ខែវិច្ឆិកា ឆ្នាំ​២០២០ នៅ​ក្នុង​វ័យ​៦០​ឆ្នាំ ដោយសារ​ជំងឺ​គាំងបេះដូង​៕ (​ប្រភព​ពី BBC)