បកស្បែកមេកន្ទុយលេខដកហូតប្រាក់ជិត៧ម៉ឺនដុល្លារ
រាជធានីភ្នំពេញ ៖ ទីតាំងកត់ឆ្នោតដុះស្លែមួយកន្លែងដ៏ធំនៅតាមផ្លូវបេតុងខាងក្រោយរោងចក្រស៊ីឡាំងហួរ ក្នុងភូមិត្នោតជ្រំ៣ សង្កាត់បឹងទំពុន ខណ្ឌមានជ័យ បានត្រូវ
រាជធានីភ្នំពេញ ៖ ទីតាំងកត់ឆ្នោតដុះស្លែមួយកន្លែងដ៏ធំនៅតាមផ្លូវបេតុងខាងក្រោយរោងចក្រស៊ីឡាំងហួរ ក្នុងភូមិត្នោតជ្រំ៣ សង្កាត់បឹងទំពុន ខណ្ឌមានជ័យ បានត្រូវនគរបាល និងអាជ្ញាធរខណ្ឌ ដឹកនាំដោយលោក ឌី រ័ត្នខេមរុណអភិបាលរងខណ្ឌ និងមានការចូលរួមពីព្រះរាជអាជ្ញារងអមសាលាដំបូងរាជធានីភ្នំពេញ លោក ចែ សុង បានធ្វើការបង្ក្រាបជាក់ស្តែង កាលពីវេលាម៉ោង២និង៤៥នាទីរសៀលថ្ងៃទី១៧ ខែតុលា ដោយធ្វើការឃាត់ខ្លួនមនុស្ស២នាក់ប្តីប្រពន្ធជាមួយលុយដុល្លារនិងលុយខ្មែរសរុបជិត៧ម៉ឺនដុល្លារ ។
មេឆ្នោត២នាក់ប្តីប្រពន្ធដែលត្រូវបានឃាត់ខ្លូននេះ ប្តីឈ្មោះ ញឹម កុសល អាយុ៤៧ឆ្នាំ ប្រពន្ធឈ្មោះ សុខ មួងហេង អាយុ៤៧ឆ្នាំដូចគ្នា ។
លោកអនុសេនីយ៍ឯក ហួរ ម៉េងវ៉ាង អធិការរងនគរបាលខណ្ឌមានជ័យ បានឱ្យដឹងថា មុនឈានដល់ការចុះបង្ក្រាបគឺកម្លាំងសមត្ថកិច្ចបានទទួលដំណឹងពីប្រជាពលរដ្ឋថា ទីតាំងខាងលើបើកលួចកត់ឆ្នោតខុសច្បាប់ ដោយជ្រកក្រោមឆ្នោតខ្មែរដែលមានច្បាប់អនុញ្ញាត។ ដោយហេតុនេះហើយ ទើបនៅថ្ងៃទី១៧ ខែតុលា លោកបានបញ្ជាឱ្យមន្ត្រីក្រោមឱវាទបន្លំខ្លួនចូលទៅចាក់ឆ្នោត ហើយលទ្ធផលបង្ហាញថា ទីតាំងនេះពិតជាមានទទួលកត់ឆ្នោតខុសច្បាប់ប្រាកដមែន។ លុះនៅវេលាម៉ោងជាង២រសៀលថ្ងៃដដែល ដោយមានការចូលរួមពីព្រះរាជអាជ្ញារងអមសាលាដំបូងរាជធានីភ្នំពេញ កម្លាំងសមត្ថកិច្ច រួមទាំងអាជ្ញាធរខណ្ឌផង បានចុះធ្វើការបង្ក្រាបតែម្តង ។
សូមបញ្ជាក់ថា ក្នុងការចុះបង្ក្រាបនេះដំបូងឡើយនៅពេលសមត្ថកិច្ចទៅដល់ម្ចាស់ទីតាំងបានទាញទ្វារផ្ទះចាក់សោពីខាងក្នុងពុំឱ្យសមត្ថ
កិច្ចចូលឡើយ ។ លុះប្រមាណជាង២០នាទីក្រោយមក សមត្ថកិច្ចបានសម្រេចចិត្តយកម៉ូទ័រត្រៀមកាត់សោចូលទៅទើបម្ចាស់ទីតាំងព្រមបើកទ្វារឱ្យចូល ។
ក្នុងការបង្ក្រាបនេះដែរ សមត្ថកិច្ចបានរកឃើញមាន ចុងសន្លឹកឆ្នោតដែលចាក់សល់រាប់រយសន្លឹក ប៊ិកជាច្រើនដើម ម៉ាស៊ីនហ្វាក់១គ្រឿង កាស្យូ១៥គ្រឿង ព្រមទាំងរកឃើញលុយដុល្លារជិត៧ម៉ឺនដុល្លារអាមេរិក និងលុយខ្មែរជាង១០លានរៀលផងដែរ ។
មេឆ្នោតទាំង២នាក់ប្តីប្រពន្ធ រួមទាំងវត្ថុតាង ត្រូវបានបញ្ជូនទៅកាន់ប៉ុស្តិ៍នគរបាលរដ្ឋបាលបឹងទំពុន ដើម្បីកសាងសំណុំរឿងបញ្ជូនទៅសាលាដំបូង ៕
ចែករំលែកព័តមាននេះ