រាជធានីភ្នំពេញ ៖ ស្ត្រីកូន៤នាក់ម្នាក់ ខណៈពេលដែលប្តីក្រោយបានទៅរកស៊ីនៅតាមបណ្តាខេត្តក៏លួចមានប្រុសក្មេង ហើយនាំប្រុសក្មេងនោះទៅដេកនៅផ្ទះ តែត្រូវបានបុរសជាប្តីតាមទាន់ប្តឹងនគរបាលហៅអត់ក្រោក ក៏បានដេកចាំមុខផ្ទះអស់មួយយប់ ព្រឹកទើបនគរបាលប៉ុស្តិ៍ ក្រាំងធ្នង់ចុះទៅហៅនាំខ្លួន មកស្នាក់ការ…
រាជធានីភ្នំពេញ ៖ ស្ត្រីកូន៤នាក់ម្នាក់ ខណៈពេលដែលប្តីក្រោយបានទៅរកស៊ីនៅតាមបណ្តាខេត្តក៏លួចមានប្រុសក្មេង ហើយនាំប្រុសក្មេងនោះទៅដេកនៅផ្ទះ តែត្រូវបានបុរសជាប្តីតាមទាន់ប្តឹងនគរបាលហៅអត់ក្រោក ក៏បានដេកចាំមុខផ្ទះអស់មួយយប់ ព្រឹកទើបនគរបាលប៉ុស្តិ៍ ក្រាំងធ្នង់ចុះទៅហៅនាំខ្លួន មកស្នាក់ការ ដើម្បីដោះស្រាយផ្តាច់និស្ស័យ ។
ហេតុការណ៍នេះបង្កអោយមានការភ្ញាក់ផ្អើល កាលពីវេលាម៉ោងប្រមាណ១២យប់ថ្ងៃទី០៤ ខែឧសភា ឆ្នាំ២០២២ នៅចំណុច ផ្ទះលេខ A21 ផ្លូវលេខ២០ បុរីពិភពថ្មី ភូមិត្រពាំងមៀន សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ។ លុះព្រឹកឡើងវេលាម៉ោងប្រមាណ៧និង៣០នាទីព្រឹក ថ្ងៃទី០៥ ខែឧសភា ឆ្នាំ២០២២ ទើបនគរបាលចុះហៅនាំអ្នកទាំង៣នាក់ មកជួបគ្នាដោះស្រាយគ្នា ។
ស្ត្រីដែលមានប្រុសថ្មីនោះ ឈ្មោះយ.ន ច.ន.ថ អាយុ៤១ឆ្នាំ ស្នាក់នៅផ្ទះកើតហេតុខាងលើ និងមានស្រុកកំណើតភូមិតាកុក ឃុំតានី ស្រុកអង្គរជ័យ ខេត្តកំពត ។ ចំណែកបុរសជាប្តីឈ្មោះ ហ ណ.ន អាយុ២៧ឆ្នាំ មុខរបរជាអ្នកទិញលក់អចលនទ្រព្យទៅរកស៊ី និងប្រកបរបរការងារនៅឯខេត្តមណ្ឌលគិរី មានស្រុកកំណើត ភូមិទ្រាល ឃុំជ្រុងពពេល ស្រុករំដួល ខេត្តស្វាយរៀង ។ ដោយឡែកភាគីខាងប្រុសថ្មី មិនបានឲ្យស្គាល់ឈ្មោះឡើយ មានអាយុប្រមាណជាង២០ឆ្នាំ មានទីលំនៅ ខេត្តព្រះសីហនុ ។
តាមបុរសជាប្តីបានរៀបរាប់អោយដឹងថា ប្រពន្ធរបស់គាត់ជាស្ត្រីមេម៉ាយមានកូនចំនួន៤នាក់ ប្រុស៣នាក់ ស្រី១នាក់ រយៈពេលប្រមាណជាង២ឆ្នាំមកហើយ គាត់ក៏បានស្គាល់ និងចាប់ចិត្តស្រឡាញ់ ហើយបានរៀបការបានចុះសំបុត្រអាពាហ៍ពិពាហ៍ ត្រឹមត្រូវតាមផ្លូវច្បាប់ ។
ការរស់នៅជាមួយគ្នាជាប្តីប្រពន្ធ មិនមានកូននោះទេ ។ រយៈពេលប្រមាណ ៧ថ្ងៃមកហើយគាត់២នាក់ប្តីប្រពន្ធ ក៏បានទៅទិញផ្ទះនៅក្រាំងធ្នង់រស់ជាមួយគ្នា ។ មួយរយៈនេះគាត់តែងទៅរកស៊ី នៅខេត្តមណ្ឌលគិរី ។
តាមបុរសជាប្តីបានអោយដឹងទៀតថា រយៈពេលប្រមាណ៣ខែមកហើយគាត់មានការសង្ស័យថា ប្រពន្ធរបស់ខ្លួនមានអារម្មណ៍ប្លែកៗ ហើយលុយកាក់រាប់ពាន់ ម៉ឺនដុល្លារ មិនដឹងទៅណា ។ តាមរយៈបណ្តាញសង្គមភ្ជាប់គ្នា នៅថ្ងៃទី០២ ខែឧសភា ឆ្នាំ២០២២ គាត់ចាប់ចំណុចបានប្រពន្ធផ្ញើសារទាក់ទងគ្នា ជាមួយប្រុសថ្មី និងបានណាត់គ្នាផឹកស៊ី ។ ចាប់តាំងពីពេលនោះមក នៅពេល ដែលគាត់ធ្វើដំណើរទៅខេត្តក៏បានត្រឡប់មកវិញតាមដានហើយ នៅថ្ងៃទី០៤ខែឧសភានេះ ប្រពន្ធរបស់ខ្លួនក៏បានណាត់ប្រុសម្នាក់បាននាំមកដេកនៅផ្ទះរបស់គាត់ជាហេតុធ្វើអោយគាត់ទ្រាំលែងបាន ក៏បានប្តឹងនគរបាលផ្អើលទាំងយប់ ហើយគោះទ្វារមិនបើកក៏បានដេកចាំរហូតដល់ព្រឹកទើបនគរបាលចុះទៅ ហៅអោយបើកទ្វារនាំទៅប៉ុស្តិ៍ ដើម្បីដោះស្រាយគ្នា ។
តាមបុរសជាប្តី ក៏បានបញ្ជាក់អោយដឹងថា ខ្លួនគ្មាននិស្ស័យជាមួយស្រីលួចនាំប្រុសមកដេកនៅផ្ទះនោះទេ ខ្លួននឹងសុំលែងលះផ្តាច់សង្វាស់ និងចែកលុយគ្នា ។
ទោះបីជាយ៉ាងណា ស្ត្រីជាប្រពន្ធវិញបានឲ្យដឹងថា បុរសម្នាក់នោះគ្រាន់តែជាមិត្តភក្តិ ហៅមកដេកផ្ទះក៏ផ្អើលជ្រួលប្របល់ដែរ ។ ចំនែកប្រុសក្មេងថ្មី ក៏បានអោយដឹងដូចនឹងស្ត្រីជាប្រពន្ធដែរ គ្រាន់តែជាមិត្តភក្តិស្គាល់តាមបណ្តាញសង្គមតែប៉ុណ្ណោះ ៕
ចែករំលែកព័តមាននេះ