រាជធានីភ្នំពេញ ៖ កម្លាំងសណ្តាប់ធ្នាប់សាលាខណ្ឌដូនពេញដឹកនាំដោយលោកហែម ឫទ្ធី នាយករងរដ្ឋបាលសាលាខណ្ឌដូនពេញបានសហការជាមួយនគរបាលប៉ុស្តិ៍រដ្ឋបាលវត្តភ្នំចុះបង្ក្រាបស្ត្រីរកស៊ីផ្លូវភេទ នៅរមណីយដ្ឋានវត្តភ្នំ សង្កាត់វត្តភ្នំ និងផ្លូវលេខ១៥៤ កែង៥១ សង្កាត់បឹងរាំង ខណ្ឌដូនពេញ កាលពីវេលាម៉ោង១០យប់ថ្ងៃទី២៨ កុម្ភៈ ២០១១ ជាលទ្ធផលឃាត់ខ្លួនស្ត្រីរកស៊ីផ្លូវភេទ និងបុរសហៅម៉ូយចំនួន១៧នាក់។
លោកហែម ឫទ្ធី នាយករងរដ្ឋបាលសាលាខណ្ឌដូនពេញ បានឱ្យដឹងថា យោងតាមការចង្អុលបង្ហាញពីលោកអភិបាលខណ្ឌដូនពេញ កម្លាំងសណ្តាប់ធ្នាប់ខណ្ឌសហការជាមួយនគរបាលប៉ុស្តិ៍រដ្ឋបាលវត្តភ្នំ បានចេញប្រតិបត្តិការនៅជុំវិញរមណីយដ្ឋានវត្តភ្នំឃាត់ខ្លួនស្ត្រីរកស៊ីផ្លូវភេទ និងបុរសហៅម៉ូយចំនួន១៣នាក់ ក្នុងនោះមានស្ត្រីចំនួន៦នាក់ ដោយឡែកនៅកែងផ្លូវលេខ១៥៤ និង៦៣ ឃាត់ខ្លួនបានស្ត្រីរកស៊ីផ្លូវភេទចំនួន៤នាក់ ។ ក្នុងរយៈពេលពីរសប្តាហ៍កន្លងមកនេះ សាលាខណ្ឌដូនពេញបានសហការជាមួយសាលាសង្កាត់ និងប៉ុស្តិ៍រដ្ឋបាលទាំង១១ បើកយុទ្ធនាការឃាត់ខ្លួនស្ត្រីរកស៊ីផ្លូវភេទ ជនអនាថា ក្មេងហិតកាវសរុបចំនួន៦៨នាក់ ប្រគល់ទៅឱ្យមន្ទីរសង្គមកិច្ចរាជធានីភ្នំពេញ ក៏ប៉ុន្តែសង្កេតមើលទៅពួកគេទាំងនោះទៅដល់មន្ទីរសង្គមកិច្ចយ៉ាងយូរពីរ ឬបីថ្ងៃប៉ុណ្ណោះត្រូវគេដោះលែងមកវិញ ហើយប្រកបមុខរបរដដែល ។
គេមិនដឹងថា ក្រសួងពាក់ព័ន្ធចាត់វិធានការយ៉ាងណាទេ រីឯអាជ្ញាធរមូលដ្ឋានបច្ចុប្បន្នឃាត់ខ្លួនស្ត្រីរកស៊ីផ្លូវភេទមុខដដែលៗ មានអ្នកខ្លះចាប់ពីរដង ហើយអ្នកខ្លះទៀតចាប់២ដងឯណោះ ។ ចំណែកស្ត្រីរកស៊ីផ្លូវភេទ និងបុរសហៅម៉ូយខាងលើត្រូវបានសាលាខណ្ឌដូនពេញប្រគល់ទៅឱ្យមន្ទីរសង្គមកិច្ចរាជធានីភ្នំពេញ កាលពីរសៀលថ្ងៃដដែល ៕
ចែករំលែកព័តមាននេះ