ស្គាល់អត្តសញ្ញាណអ្នកស្លា.ប់តាមរយៈប្រពន្ធទាំង2
រាជធានីភ្នំពេញ ៖ សាកសពបុរសម្នាក់ ដែលត្រូវឃាតករវាយសម្លា.ប់ រួចយកខ្សែនីឡុងចងជើង ព្រមទាំងយកខ្សែគោចងជាប់ចង្កេះ
រាជធានីភ្នំពេញ ៖ សាកសពបុរសម្នាក់ ដែលត្រូវឃាតករវាយសម្លា.ប់ រួចយកខ្សែនីឡុងចងជើង ព្រមទាំងយកខ្សែគោចងជាប់ចង្កេះ
រាជធានីភ្នំពេញ ៖ សាកសពបុរសម្នាក់ ដែលត្រូវឃាតករវាយសម្លាប់ រួចយកខ្សែនីឡុងចងជើង ព្រមទាំងយកខ្សែគោចងជាប់ចង្កេះ សណ្តូននឹងដុំថ្មទម្ងន់ប្រមាណជាង១០គីឡូក្រាមទម្លាក់ពន្លិចចូលទៅក្នុងទឹកប្រឡាយហើយកាយសំរាមកប់ពីលើថែមទៀតនោះ រហូតមកដល់មកដល់ល្ងាចថ្ងៃទី១៥ តុលា ត្រូវបានគេស្គាល់អត្តសញ្ញាណហើយ ។ ស្គាល់ដោយសារប្រពន្ធរបស់ជនរងគ្រោះរូបនោះដល់ទៅពីរនាក់ គឺប្រពន្ធដើម និងប្រពន្ធចុង រួមទាំងកូនផង បានទៅតាមសួរនាំដល់ប៉ុស្ដិ៍ នគរបាលសង្កាត់ចោមចៅ និងបានអះអាងថា សពខាងលើគឺជាប្ដីរបស់ពួកគាត់ ។
ទោះបីជាបែបណា ប្រពន្ធទាំង២មិនបាន ឃើញសាកសពនោះទេ ព្រោះត្រូវបានអាជ្ញាធរបូជាទៅហើយ ដោយសារធុំក្លិនមិនអាចរក្សាទុកបាន ប៉ុន្តែអាជ្ញាធរបានរក្សាទុករបស់មួយចំនួនរបស់សាកសព ដូចជារូបថតសពមុនពេលបូជា រួមជាមួយខ្សែក្រវាត់ និងសម្លៀកបំពាក់ជាដើម ដែលអាចឲ្យប្រពន្ធកូនជនរងគ្រោះស្គាល់ថា ច្បាស់ជាប្ដីនិងឪពុកប្រាកដមែន ។ មានការសង្ស័យថា ការស្លាប់នោះអាចជាការពាក់ព័ន្ធទៅនឹង សកម្មភាពប្លន់យកទ្រព្យសម្បត្តិ ព្រោះជនរងគ្រោះបាន បាត់បង់រថយន្តសាំយ៉ុង១គ្រឿង និងគ្រឿងអលង្ការមាស៥ជីផងដែរ ។
ស្ត្រីជាប្រពន្ធដើមបានប្រាប់នគរបាលថា ប្តីដែលរងគ្រោះនេះឈ្មោះ កៅ ផា អាយុ៤៨ឆ្នាំ ជាអ្នកបើករថយន្តឈ្នួល មានទីលំនៅក្នុងភូមិត្រពាំងរី ឃុំកំពង់អំពិល ស្រុករំដួល ខេត្តស្វាយរៀង ។ តាមប្រភពពីប្រពន្ធដើមថា កន្លងមកប្តីគាត់បើកបររថយន្តឈ្នួលដឹកអ្នកដំណើរពីស្វាយរៀងទៅខេត្តកំពង់ចាម និងរាជធានីភ្នំពេញ ។ បុរសត្រូវគេសម្លាប់នោះមានប្រពន្ធ២នាក់ គឺប្រពន្ធដើមឈ្មោះ សៅ សំអឿន អាយុ៤៦ឆ្នាំ ហើយមានកូនចំនួន៤នាក់ ក្នុងនោះកូនប្រុស៣នាក់ និងកូនស្រីម្នាក់ និងរស់នៅជាមួយប្រពន្ធដើម ។ ចំណែកប្រពន្ធចុងឈ្មោះ ចាប សាម៉េត អាយុ៣៣ឆ្នាំ មុខរបរកម្មការិនីរោងចក្រកាត់ដេរ មានស្រុកកំណើត នៅក្នុងភូមិតាហង់ ឃុំអណ្តូងពោធិ៍ ស្រុករមាសហែក ខេត្តស្វាយរៀង ស្នាក់នៅក្នុងភូមិចុងព្រែក ឃុំកំពង់ព្រែក ស្រុករមាសហែក ខេត្តស្វាយរៀង ។
តាមការអះអាងថា ពេលនេះបានបាត់បង់រថយន្តម៉ាកសាំយ៉ុង១គ្រឿង ពណ៌ស ពាក់ស្លាកលេខភ្នំពេញ 2AB-4728 និងចិញ្ចៀនមាសមួយវង់ទម្ងន់៥ជីផងដែរ ។
សាកសពជនរងគ្រោះត្រូវបានប្រជាពលរដ្ឋប្រទះឃើញ កាលពីវេលាម៉ោង១០និង៤០នាទីព្រឹកថ្ងៃទី១៤ តុលា ក្នុងប្រឡាយទឹក នៅខាងក្រោយសួនឧស្សាហ៍កម្មកាណាឌីយ៉ា ស្ថិតនៅក្នុងភូមិគោកចំបក់ សង្កាត់ចោមចៅ ខណ្ឌ ពោធិ៍សែនជ័យ ។
ប្រភពពីស្ត្រីជាប្រពន្ធដើមបានបន្តថា ប្ដីរបស់ពួកគាត់ត្រូវបានបុរសម្នាក់ឈ្មោះ សូ ផា ហៅ អ៊ូក អាយុ៣០ឆ្នាំ ដែលមានមុខរបរបើកបររថយន្តឈ្នួលដែរ និងមានទីលំនៅក្នុងភូមិជាមួយគ្នានោះជួលរថយន្តប្ដីគាត់ជិះ ដោយប្រាប់ថាទៅកាន់ខេត្តសៀមរាប ទាំងទៅនិងមកក្នុងតម្លៃ២៥០ដុល្លារ ។ បន្ទាប់ពីនិយាយត្រូវរ៉ូវគ្នាហើយក៏បានចាកចេញពីផ្ទះ កាលពីវេលាម៉ោង៤ទៀបភ្លឺ ថ្ងៃទី១២ តុលា ខណៈនោះរូបគាត់ដែលជាប្រពន្ធដើមបានទំនាក់ទំនងសួរនាំប្ដីតាមទូរស័ព្ទជាញឹកញយហើយ បានខលចូលនិងទាក់ទងគ្នាបានរហូតដល់វេលាល្ងាចថ្ងៃដដែល ស្រាប់តែខលលែងចូល ។
ប្រភពខាងលើបានបន្តថា ខណៈនោះគាត់មិនបានដឹងថា ប្ដីមានបញ្ហាអ្វីនោះឡើយ ប៉ុន្តែគាត់បានសង្ស័យក្នុងចិត្តថាប្រហែលជាប្តីមានបញ្ហាអ្វីមិនស្រួលហើយ និងមានការព្រួយបារម្ភយ៉ាងខ្លាំង ព្រមទាំងបានរង់ចាំមើលផ្លូវប្ដីត្រឡប់ទៅផ្ទះវិញរហូត ប៉ុន្តែចិត្តមួយបានគិតថា សៀមរាបមានផ្លូវវែងឆ្ងាយមិនងាយនឹងទៅភ្លាមត្រឡប់វិញភ្លាមៗបានឡើយ ។
ប្រពន្ធនិយាយទៀតថា ចាប់ពីពេលនោះមកទូរស័ព្ទខលលែងចូលរហូតតែម្ដង ។ លុះដល់ថ្ងៃទី១៤ តុលា មានព័ត៌មានផ្សាយថា គេបានប្រទះឃើញសាកសពបុរសម្នាក់មិនស្គាល់អត្តសញ្ញាណ ត្រូវបានសណ្តូនថ្មពន្លិចទឹកប្រឡាយទើបមានការសង្ស័យ ក៏បានធ្វើដំណើរចាកចេញពីផ្ទះមកភ្នំពេញដើម្បីមើលក្រែងជាប្ដីរបស់ខ្លួន គឺពេលនោះមិនទាន់មានការប្រាកដប្រជានៅឡើយទេ ។ ពេលទៅដល់ប៉ុស្ដិ៍ចោមចៅ គាត់បានសាកសួរនគរបាលពីភិនភាគ ហើយនគរបាលបាននាំទៅបង្ហាញពីសម្លៀកបំពាក់ ខ្សែក្រវាត់ និងរូបថតសពពេលមិនទាន់បូជា ទើបគាត់កំណត់បានថាជាប្ដីរបស់គាត់ ដោយសំអាងទៅលើ ខោអាវ ខ្សែក្រវាត់ ទើបស្គាល់ច្បាស់ជាក់ជាប្តីពិតប្រាកដមែន ។
នគរបាលបានឲ្យដឹងថា ដោយឡែកស្ត្រីជាប្រពន្ធចុងក៏បានអះអាងយ៉ាងច្បាស់ថា បុរសដែលត្រូវគេសម្លាប់នោះគឺជាប្ដីរបស់ខ្លួនដែរ ដោយបានចង្អុលលើសម្លៀកបំពាក់ និងខ្សែក្រវាត់ ដែលសមត្ថកិច្ចដោះចេញពីសាកសព ទុកឲ្យមើលនោះក្នុងស្ថានភាពក្ដុកក្ដួល ។
ប្រពន្ធចុងមិនបានប្រាប់ថា គាត់មានកូនជាមួយបុរសជាប្ដីនោះដែរឬអត់នោះឡើយ ។ ក្រោយពេលបានដឹងនិងស្គាល់អត្តសញ្ញាណសាកសព នគរបាលបានធ្វើការសាកសួរប្រពន្ធ និងកូនដើម្បីស្វែងរកពន្លឺខ្លះៗឈានដល់ការតាមចាប់ខ្លួនឃាតករ ។
ច្បាស់ណាស់ថា ខណៈសាកសពជាជនរងគ្រោះត្រូវបានគេស្គាល់អត្តសញ្ញាណហើយការទំនាក់ទំនងមុនពេលស្លាប់ អាចរកឃើញឃាតករមិនខានឡើយ ប្រសិនសមត្ថកិច្ចព្យាយាម ៕
ចែករំលែកព័តមាននេះ