ខេត្តកណ្តាល ៖ ប្រជាពលរដ្ឋចំនួន៤គ្រួសារគ្មានទីជម្រកស្នាក់នៅ ហើយបានមកបោះទីតាំងបណ្តោះអាសន្នរស់នៅលើដីក្រុមហ៊ុនផានអ៊ីមិច ដែលមានទីតាំងស្ថិតក្នុងភូមិទួលអំពិល ឃុំពញ្ញាឮ
ខេត្តកណ្តាល ៖ ប្រជាពលរដ្ឋចំនួន៤គ្រួសារគ្មានទីជម្រកស្នាក់នៅ ហើយបានមកបោះទីតាំងបណ្តោះអាសន្នរស់នៅលើដីក្រុមហ៊ុនផានអ៊ីមិច ដែលមានទីតាំងស្ថិតក្នុងភូមិទួលអំពិល ឃុំពញ្ញាឮ ស្រុកពញ្ញាឮ ត្រូវបានក្រុមហ៊ុនពុះដីចែកអោយធ្វើជាម្ចាស់កម្មសិទ្ធិក្នុង១គ្រួសារៗ មានទទឹង៥ម៉ែត្រ បណ្តោយ១២ម៉ែត្រ ដើម្បីសង់លំនៅឋានស្នាក់នៅស្របច្បាប់ចាប់ពីពេលនេះតទៅ ។
នៅក្នុងពិធីចុះកិច្ចសន្យានិងទទួលប្លង់ដីកម្មសិទ្ឋិខាងលើ លោកស្រី ស៊ុយ សុផាន អគ្គនាយកក្រុមហ៊ុនផានអ៊ីមិច បានដាក់ល័ក្ខខណ្ឌដល់ប្រជាពលរដ្ឋទាំង៤គ្រួសារ ត្រូវរុះរើផ្ទះសម្បែងចេញពីលើដីរបស់ក្រុមហ៊ុន ហើយទៅសាងសង់ទីលំនៅ នៅលើដីដែលក្រុមហ៊ុនបានចែកអោយ មានទីតាំងនៅភូមិឃុំជាមួយគ្នាខាងលើ អោយអស់ត្រឹមថ្ងៃទី១០ វិច្ឆិកា ២០១៦ ។
ក្នុងឱកាសនោះ ក្រុមហ៊ុនបានអោយប្រជាពលរដ្ឋទាំង៤គ្រួសារ ធ្វើកិច្ចសន្យាបឈ្ឍប់ការចាប់ដីក្រុមហ៊ុនស្នាក់នៅបន្តទៅទៀត ហើយប្រសិនបើបងប្អូនមិនគោរពតាមកិច្ចសន្យានោះទេ ថ្ងៃក្រោយនឹងត្រូវទទួលខុសត្រូវចំពោះមុខច្បាប់ ។
ប្រជាពលរដ្ឋទាំង៤គ្រួសារ ក៏បានយល់ព្រមហើយថ្លែងអំណរគុណក្រុមហ៊ុន ដែលបានផ្តល់សម្បទានដីជូនពួកគាត់ ដើម្បីស្នាក់នៅជួបជុំក្រុមគ្រួសារ ។ ប្រជាពលរដ្ឋទាំង៤គ្រួសារទទួលស្គាល់ថា ពួកគាត់បានលក់ដីអោយក្រុមហ៊ុនម្តងរួចមកហើយតាំងពីឆ្នាំ១៩៩៦ តែដោយសារពួកគាត់គ្មានកន្លែងស្នាក់នៅ ក៏ចេះតែរស់នៅលើដីក្រុមហ៊ុនតាំងពីពេលនោះមក រហូតដល់ពេលនេះ ហើយត្រូវបានក្រុមសម្បទាដីជូន ជាហេតុធ្វើអោយពួកគាត់មិនអាចបំភ្លេចមហាគុណបំណាច់មនុស្សធម៌ដ៍ធំធេងមួយនេះបានឡើយ ។
សេចក្តីរាយការណ៍បានបន្តថា ក្រៅពីផ្តល់ដីកម្មសិទ្ឋិ ក្រុមហ៊ុនផានអ៊ីមិច ក៏បានឧបត្ថម្ភថវិកា៣០០ដុល្លារ តាមរយៈអាជ្ញាធរមូលដ្ឋាន ដើម្បីយកធ្វើជាសោហ៊ុយក្នុងការរុះរើផ្ទះ និងបានឧបត្ថម្ភប្រាក់២០ម៉ឺនរៀលក្នុងមួយគ្រួសារៗ ។
ដោយឡែកនៅព្រឹកថ្ងៃទី១៧ តុលាដដែលនេះ លោកស្រី ស៊ុយ សុផាន ក៏បានចូលទៅសួរសុខទុក្ខនិងបានផ្តល់ថវិកា៥០០ដុល្លារ ដល់យោធាកងពលលេខ ៩១១ ដែលកំពុងបោះទីតាំងហ្វឹកហាត់ ត្រៀមជួយសង្គ្រោះពលរដ្ឋរងគ្រោះដោយទឹកជំនន់ នៅក្នុងបរិវេណក្រុមហ៊ុនផានអ៊ីមិច ស្ថិតក្នុងទីតាំងស្រុកពញ្ញាឮផងដែរ៕
ចែករំលែកព័តមាននេះ