ជនសង្ស័យចំនួន៣នាក់ ត្រូវបានកម្លាំងនគរបាលនៃអធិការដ្ឋាននគរបាលបឹងកេងកង រាជធានីភ្នំពេញ បានសហការជាមួយកម្លាំងនគរបាលស្រុកបសេដ្ឋ នៃខេត្តកំពង់ស្ពឺធ្វើការឃាត់ខ្លួន បន្ទាប់ពី
ខេត្តកំពង់ស្ពឺ ៖ ជនសង្ស័យចំនួន៣នាក់ ត្រូវបានកម្លាំងនគរបាលនៃអធិការដ្ឋាននគរបាលបឹងកេងកង រាជធានីភ្នំពេញ បានសហការជាមួយកម្លាំងនគរបាលស្រុកបសេដ្ឋ នៃខេត្តកំពង់ស្ពឺធ្វើការឃាត់ខ្លួន បន្ទាប់ពីបានលួចរថយន្ត និងម៉ូតូ១គ្រឿងបានសម្រេច កាលពីល្ងាចថ្ងៃទី២ ខែឧសភា ឆ្នាំ២០២២ ស្ថិតនៅក្នុងភូមិសាស្ត្រនៃស្រុកបសេដ្ឋ ខេត្តកំពង់ស្ពឺ។
លោកវរសេនីយ៍ទោ ចន សុភិត អធិការនៃអធិការដ្ឋាននគរបាលស្រុកបសេដ្ឋ បានឱ្យដឹងថា ជនសង្ស័យដែលបានឃាត់ខ្លួនបានរួមមាន ៖ ទី១- ឈ្មោះ ស៊ិន សុផល ភេទប្រុស អាយុ២៩ឆ្នាំ រស់នៅភូមិត្រពាំងវែង ឃុំផុង ស្រុកបសេដ្ឋ ខេត្តកំពង់ស្ពឺ ទី២- ឈ្មោះ សំ ហឿន ភេទប្រុស អាយុ៣១ឆ្នាំ រស់នៅភូមិទួលឈើនាង ឃុំសង្កែសាទប ស្រុកឱរ៉ាល ខេត្តកំពង់ស្ពឺ និងទី៣- ឈ្មោះ សំ មាន ភេទប្រុស អាយុ២៦ឆ្នាំ រស់នៅភូមិឈើនាង ឃុំសង្កែសាទប ស្រុកឱរ៉ាល់ ខេត្តកំពងស្ពឺ។
លោក អធិការនៃអធិការដ្ឋាននគរបាលស្រុកបសេដ្ឋ បានឱ្យដឹងបន្តថា ជនសង្ស័យទាំង៣នាក់ នេះ ត្រូវបានឃាត់ខ្លួន ក្រោយពេលធ្វើសកម្មភាពលួចយករថយន្តមួយគ្រឿងម៉ាក KIA ពណ៌ខៀវ ពាក់ស្លាកលេខ កំពង់ស្ពឺ ២A-៦៨៣២ នៅព្រឹកថ្ងៃទី២ ខែឧសភា ឆ្នាំ២០២២ របស់ជនរងគ្រោះដែលចតចោលនៅមុខផ្ទះលេខ៣ ផ្លូវលេខ៤៣០ ស្ថិតក្នុងភូមិ២ សង្កាត់ទំនប់ទឹក ខណ្ឌបឹងកេងកង រាជធានីភ្នំពេញ និងម៉ូតូមួយគ្រឿងទៀតម៉ាកឃ្លិក ពណ៌ស ស៊េរី២០១៥ ស្លាកលេខ កំពង់ស្ពឺ ១A-៥៨៦៩។
ប្រភពដដែលបន្តថា ក្រោយពេលលួចបានហើយ ជនសង្ស័យបានយករថយន្តនោះទៅលក់ ហើយក៏បន្តដំណើរទៅកាន់ស្រុកបសេដ្ឋ បន្ទាប់មកក៏ត្រូវសមត្ថកិច្ចចាប់ខ្លួនបានតែម្តង។
បច្ចុប្បន្នក្រុមជនសង្ស័យទាំង៣នាក់ ត្រូវបានប្រគល់ឱ្យទៅលោកវរសេនីយ៍ទោ នាក់ ចាន់សារុន អធិការរងផ្នែកព្រហ្មទណ្ឌនៃអធិការដ្ឋានខណ្ឌបឹងកេងកង នៃរាជធានីភ្នំពេញ ដើម្បីចាត់ការបន្តតាមច្បាប់៕
ចែករំលែកព័តមាននេះ