ខេត្តក្រចេះ៖ ភ្ញៀវទេសចរ នឹងប្រាកដភ្ញាក់ផ្អើល និងកោតសរសើរមិនខាន នៅពេលដែលធ្វើដំណើរទៅដល់សហគមន៍អេកូទេសចរណ៍កោះសាមសិប (៣០) ដែលស្តិតក្នុងភូមិចំនួន៣ នៃឃុំអូរគ្រៀង ស្រុកសំបូរ ខេត្តក្រចេះ។
អ្វីៗដែលមាននៅក្នុងតំបន់នោះ គឺជាតំបន់ធម្មជាតិ ដែលស្រស់បំព្រម មើលទៅជ្រុងណា ក៏ជក់ចិត្ត និងទាក់ទាញមែនទែនតែម្តង។ ហេតុដូច្នេះហើយ ទើបភ្ញៀវទេសចរជាតិ និងអន្តរជាតិ ដែលបានទៅដល់ទីនោះ សុទ្ធតែបង្ហាញនូវអារម្មណ៍ស្រស់ស្រាយ កោតសរសើរ និងចាត់ទុកតំបន់សហគមន៍ទេសចរណ៍កោះសាមសិប ជាដែកឆក់ ថ្ពក់យកបេះដូងភ្ញៀវទេសចរ សម្រាប់ពេលនេះ ក៏ដូចជាទៅថ្ងៃអនាគត។
លោក អ៊ូ សុខា អនុប្រធានសហគមន៍អេកូទេសចរណ៍កោះសាមសិប បានឱ្យដឹងថា សហគមន៍ បង្កើតទើបតែបានប្រហែលជាកន្លះឆ្នាំ ក៏គាប់ជួនផ្ទុះកូវីដ១៩តែម្តង។ ដូច្នេះហើយ ភ្ញៀវទេសចរ ដែលមកដល់សហគមន៍នេះ នៅមានកម្រិតទាបនៅទ្បើយ។ ប៉ុន្តែក្រោយពេល ដែលរាជរដ្ឋាភិបាល សម្រេចបើកប្រទេសទ្បើងវិញ ចរន្តភ្ញៀវទេសចរ ក៏ចាប់ផ្តើមមានជាបណ្តើរៗ។
លោកអនុប្រធានសហគមន៍ បានអះអាងថា មិនយូរនោះទេ តំបន់នេះ នឹងក្លាយជាតំបន់ទេសចរណ៍ ដែលគួរឲ្យទាក់ទាញមិនខាន ឬអាចនិយាយថា វានឹងក្លាយជាដែកឆក់ទាក់ទាញភ្ញៀវទេសចរ សំខាន់ភ្ញៀវទេសចរ ដែលចូលចិត្តសម្រស់ធម្មជាតិពិតៗ ព្រោះនៅតំបន់នេះ គឺជាតំបន់ធម្មជាតិទាំងស្រុង ពុំមានការកែឆ្នៃនោះទ្បើយ។
យ៉ាងណាក៏ដោយ លោកថ្លែងបញ្ជាក់ថា បច្ចុប្បន្ននេះ សហគមន៍អេកូទេសចរណ៍កោះសាមសិប មិនទាន់មានរៀបចំជាផ្ទះសំណាក់ សម្រាប់ទទួលភ្ញៀវទេសចរនៅទ្បើយទេ ប៉ុន្តែភ្ញៀវ អាចបោះតង់ ដេកតាមឆ្នេរខ្សាច់ ដែលលាតសន្ធឹងវែងអន្លាយ លាយទ្បំទៅដោយទឹកថ្លាឈ្វេង និងរុក្ខជាតិពណ៌ខៀវស្រងាត់ មើលទៅត្រជាក់ចិត្តមែនទែនតែម្តង។
លោកបានបន្ថែមថា មូលហេតុដែលយើងមិនទាន់មានផ្ទះសំណាក់ សម្រាប់ភ្ញៀវនោះ គឺដោយសារតែបញ្ហាកូវីដនេះឯង។
យ៉ាងណាក៏ដោយ លោក អ៊ូ សុខា បានផ្តើមនូវការអំពាវនាវភ្ញៀវទេសចរអញ្ជើញទៅកាន់តំបន់សហគមន៍អេកូទេសចរកោះសាមសិប នោះលោកអ្នកនឹងជំពប់ភ្នែកនឹងសម្រស់ធម្មជាតិដ៏ស្រស់ត្រកាលនៅតំបន់នោះមិនខាន។
លោកថ្លែងអំណរគុណដល់ភ្ញៀវទេសចរ ដែលបានទៅសម្រាកកម្សាន្តនៅសហគមន៍របស់លោកជាបន្តបន្ទាប់ បន្ទាប់ពីកូវីដ១៩ ស្ងប់ស្ងាត់ ហើយចំនួនភ្ញៀវទេសចរ កើនទ្បើង គួរឲ្យកត់សម្គាល់។
ផ្តើមពីនោះ លោករំពឹងថា មិនយូរនោះទេ ភ្ញៀវទេសចនឹងទីកាន់តំបន់នេះ កាន់តែច្រើនទ្បើងៗមិនខាន។
លោកអនុប្រធានសហគមន៍រូបនោះបញ្ជាក់ឲ្យដឹងដែរថា សម្រាប់ជីវភាពប្រជាសហគមន៍ សំខាន់គ្រួសារលោកតែម្តង ដែលមុននេះ ប្រកបមុខរបរធ្វើស្រែចំការតែមួយមុខ ដែលធ្វើឲ្យកម្រិតជីវភាពនៅទាប។ ប៉ុន្តែពេលចូលសហគមន៍ គាត់ក៏មានមុខរបរសេវាកម្មទេសចរណ៍បន្ថែមទៀត ហើយអាចនិយាយថា ជីវភាពបានកើនមួយកម្រិតទៀត។
លោកថា គាត់មានទូកដឹកទេសចរណ៍មួយគ្រឿង ហើយនឹងអាចរកកម្រៃបានពីជាង ១០ម៉ឺន ទៅ ២០ម៉ឺនរៀល ក្នុងមួយសប្តាហ៍ ហើយកម្រៃ ដែលលោកទទួលបាននេះ គឺបង់ឲ្យខាងសហគមន៍ប្រមាណ ២០%។
លោកបន្តថា កម្រៃដែលលោកទទួលបាននៅពេលនេះ ហាក់នៅតិចតួចនៅទ្បើយ ព្រោះភ្ញៀវមិនទាន់មានច្រើន តែទៅថ្ងៃខាងមុខ លោកសង្ឃឹមថា ចំណូលទទួលបានពីសហគមន៍ នឹងមានការកើនទ្បើងមិនខាន។
យ៉ាងណាក៏ដោយ កម្រៃខាងលើនេះ ក៏បានរួមចំណែកដល់ការចំណាយក្នុងគ្រួសារលោកផងដែរ ឬអាចនិយាយថា បានសម្រាលការលំបាកក្នុងគ្រួសារ៕ សុខ សារ៉ាយ
ចែករំលែកព័តមាននេះ