រាជធានីភ្នំពេញ ៖ មនុស្សប្រុសស្រីចំនួន៤នាក់ បានចូលធ្វើការនៅក្នុងក្រុមហ៊ុនសន្តិសុខ LSA ហើយត្រូវបានប្រធានក្រុមហ៊ុនខាងលើនោះចាត់ឲ្យទៅយាមនៅរោងចក្រកាត់ដេរ យូឌីម៉ៅ ដែលមានទីតាំងស្ថិតនៅភូមិជម្ពូវ័ន សង្កាត់ចោមចៅ ខណ្ឌពោធិ៍សែនជ័យ ដោយសន្យាឲ្យប្រាក់ខែក្នុងម្នាក់ៗ១ខែចំនួន១៣០ដុល្លារ ។
នៅពេលយាមបាន១ខែ ក្រុមហ៊ុននោះបានបើកឲ្យជាធម្មតាមិនមានបញ្ហានោះឡើយ លុះចូលដល់ខែទី២ ពួកគាត់បានយាមពេញមួយខែទៀត ស្រាប់តែប្រធានក្រុមហ៊ុនមិនបើកលុយឲ្យ ។ ម្យ៉ាងទៀត ពួកគាត់ទាមទារយកសៀវភៅគ្រួសារ និងអត្តសញ្ញាណប័ណ្ណមកវិញ ដើម្បីយកទៅចុះឈ្មោះបោះឆ្នោត តែប្រធានសន្តិសុខមិនព្រមប្រគល់ឲ្យទៀត ទើបនៅវេលាម៉ោង៤រសៀល ថ្ងៃទី១៣ តុលា ពួកគាត់បាននាំគ្នាទៅប្ដឹងឲ្យអាជ្ញាធរសង្កាត់ចោមចៅ ជួយអន្តរាគមន៍ ។
ជនរងគ្រោះទាំង៤នាក់នោះ ១-ឈ្មោះ ចាន់ ណារ៉ុង ភេទប្រុស អាយុ៣៨ឆ្នាំ ស្នាក់នៅផ្ទះជួលក្នុងភូមិជម្ពូវ័ន សង្កាត់ចោមចៅ និង មានស្រុកកំណើត ស្រុកកំពង់លាវ ខេត្តព្រៃវែង។ ២-ឈ្មោះ ឆាន ពុធ ភេទស្រី អាយុ៣៦ឆ្នាំ ស្នាក់នៅផ្ទះជួលក្នុងភូមិជាមួយគ្នា និងមានស្រុកកំណើត ភូមិស្ទឹងថ្មី ឃុំចែងរោង ស្រុកបរិបូរណ៍ ខេត្តកំពង់ឆ្នាំង ។ ៣-ឈ្មោះ សែត សារុំ ភេទស្រី អាយុ៤៨ឆ្នាំ ស្នាក់នៅភូមិជាមួយគ្នា និង មានស្រុកកំណើតភូមិព្រែកជ្រៃ ឃុំជ្រោយស្នោ ស្រុកកោះធំ ខេត្តកណ្តាល និង៤-ឈ្មោះ សុឹម ម៉ាស់ ភេទស្រី អាយុ៤២ឆ្នាំ ស្នាក់នៅជាមួយគ្នា និងមានស្រុកកំណើតនៅក្នុងភូមិត្រពាំងខ្ទុំ ឃុំឈូកស ស្រុកកំពង់ត្រឡាច ខេត្តកំពង់ឆ្នាំង ។
ជនរងគ្រោះទាំងនោះ បានប្រាប់ឲ្យអាជ្ញាធរដឹងថា ដោយសារតែជីវភាពខ្វះខាត ពួកគាត់បាននាំគ្នាចាកចេញពីស្រុកកំណើតមកភ្នំពេញរកការងារធ្វើ ហើយបានសម្រេចចិត្តចូលធ្វើជាកងសន្តិសុខនៅក្នុងក្រុមហ៊ុនLSAនោះ ដោយនៅពេលដាក់ពាក្យចូលត្រូវបានប្រធានក្រុមហ៊ុននោះតម្រូវឲ្យយកអត្តសញ្ញាណប័ណ្ណ និងសៀវភៅគ្រួសារទៅតម្កល់ទុកនៅក្នុងក្រុមហ៊ុន។ ខណៈនោះពួកគាត់ក៏បានធ្វើតាម បន្ទាប់មកខាងក្រុមហ៊ុនខាងលើបានចាត់ឲ្យទៅយាមនៅ រោងចក្រកាត់ដេរខាងលើ ហើយពេលយាមបាន១ខែដំបូង គឺក្រុមហ៊ុនបានបើកប្រាក់ខែឲ្យពេញជាធម្មតា គ្មានបញ្ហាអ្វីឡើយ ។
ពេលនោះពួកគេមានទឹកចិត្តធ្វើការខ្លាំងណាស់ និងបានបន្តយាមនៅក្នុងខែទី២ជាខែបន្ទាប់ទៀត ដោយសង្ឃឹមថា នឹងទទួលបានប្រាក់ខែដូចខែមុនទៀតដែរ ប៉ុន្តែមិននឹកស្មានថា ក្ដីសង្ឃឹមត្រូវរលាយខ្សុល ។ លោកចៅសង្កាត់ដែលបានទទួលពាក្យបណ្ដឹងហើយនោះ ក៏បានឲ្យមន្ត្រីសាលាសង្កាត់ ធ្វើលិខិតកោះហៅប្រធានសន្តិសុខនោះ ដើម្បីជួបដោះស្រាយគ្នាហើយ។ មិនអាចស្វែងរកការបំភ្លឺបានទេពីក្រុមហ៊ុនសន្តិសុខ SLA ។
ចែករំលែកព័តមាននេះ