លោកសម រង្ស៊ី ថានឹងវិលត្រឡប់ចូលស្រុកវិញ អ្នកនាំពាក្យគណបក្សប្រជាជនថា បោកប្រាស់អ្នកគាំទ្រ
រាជធានីភ្នំពេញ ៖ ជាថ្មីម្តងទៀតមេបក្សប្រឆាំងលោក សម រង្ស៊ី ដែលកំពុងនិរទេសខ្លួននៅក្រៅប្រទេសអស់រយៈពេលប្រមាណជាមួយឆ្នាំបានប្រកាសថា
រាជធានីភ្នំពេញ ៖ ជាថ្មីម្តងទៀតមេបក្សប្រឆាំងលោក សម រង្ស៊ី ដែលកំពុងនិរទេសខ្លួននៅក្រៅប្រទេសអស់រយៈពេលប្រមាណជាមួយឆ្នាំបានប្រកាសថា លោកនឹងចូលស្រុកខ្មែរវិញក្នុងរយៈ ពេលសមស្របណាមួយនៅពេលខាងមុខនេះ ។ ប៉ុន្តែមន្ត្រីអ្នកនាំពាក្យគណបក្សកាន់អំណាចថាការលើកឡើងបែបនេះគឺជាការបោកប្រាស់អ្នកគាំទ្រខ្លួនតែប៉ុណ្ណោះ ។
លោក សម រង្ស៊ី ប្រធានគណបក្សសង្គ្រោះជាតិបានសរសេរនៅលើបណ្តាញសង្គមហ្វេសប៊ុករបស់លោកនៅថ្ងៃទី១៤ តុលាថា «ខ្ញុំនឹងវិលត្រឡប់មកប្រទេសកម្ពុជាវិញក្នុងពេលណាមួយសមស្រប ដូចកាលពី៣ដងមុនក្រោយពីការនិរទេសរបស់ខ្ញុំ៣ដងមុន ក្នុងកាលៈទេសៈដូចគ្នាអញ្ចឹងដែរ ដែលតម្រូវឲ្យមានដំណោះស្រាយនយោបាយមួយដោយចៀសមិនផុត» ។
ទោះបីយ៉ាងណា លោក សម រង្ស៊ី មិនបានប្រាប់ឱ្យដឹងថាលោកនឹងមកស្រុកខ្មែរវិញនៅថ្ងៃណាច្បាស់លាស់ឡើយ ។ លោកគ្រាន់តែឲ្យដឹងថា សម្រាប់ប្រធានចលនាតស៊ូរំដោះប្រទេសជាតិ ការតស៊ូពីក្រៅប្រទេសក្នុងរយៈពេលមួយបណ្តោះអាសន្ន អាចជាជម្រើសតែមួយគត់ដើម្បីធានាជោគជ័យនៅទីបញ្ចប់ ។
ទាក់ទងនឹងការលើកឡើងរបស់មេបក្សប្រឆាំងរូបនេះត្រូវបានអ្នកនាំពាក្យគណបក្សប្រជាជនកម្ពុជា (CPP) លោក សុខ ឥសាន ថ្លែងថា លោក សម រង្ស៊ី ប្រធានគណបក្សសង្គ្រោះជាតិ (CNRP) ដែលនិយាយថាបានត្រៀមខ្លួនចូលមកប្រទេសកម្ពុជាវិញនេះគ្រាន់តែជាពាក្យបោកប្រាស់ប្រជាពលរដ្ឋដែលជាអ្នកគាំទ្រប៉ុណ្ណោះ ។
លោក សុខ ឥសាន បញ្ជាក់ថា ៖«លោក សម រង្ស៊ី ថាចូលស្រុកខ្មែរវិញ ក៏ប៉ុន្ដែខ្ញុំយល់ថា នេះគ្រាន់តែជាពាក្យបោកប្រាស់ប្រជាពលរដ្ឋ និងសមាជិកបក្សដែលបានគាំទ្រគណបក្សគាត់ កុំឲ្យបាក់ទឹកចិត្តប៉ុណ្ណោះ តាមពិតគាត់មិនហ៊ានមកកម្ពុជាទេ» ។ លោកបន្ដថា លោក សម រង្ស៊ី ចង់មកកម្ពុជាពេលណាក៏បានដែរគ្មានអ្នកណាហាមឃាត់ទេ ឲ្យតែចង់មក គឺកម្ពុជាស្វាគមន៍ជានិច្ច ។
គួរបញ្ជាក់ថា អ្នកនាំពាក្យគណបក្សប្រជាជនកម្ពុជាធ្លាប់បានលើកឡើងថា ប្រសិនបើលោក សម រង្ស៊ី វិលចូលស្រុកវិញនោះ នឹងមានអ្នកទៅទទួលគាត់នៅព្រលានយន្តហោះតែម្តង ហើយគាត់នឹងជាប់ពន្ធនាគារព្រោះគាត់ត្រូវបានតុលាការកាត់ក្ដីឱ្យជាប់ពន្ធនាគាររួចហើយ។ លោកបញ្ជាក់ថា សម្រាប់ស្ថានការណ៍នយោបាយនាពេលបច្ចុប្បន្នមិនអាចដូចមុននោះទេ ពោលគឺមិនមែនសុំលើកលែងទោសបានឡើយ ។
គួរបញ្ជាក់ថា លោក សម រង្ស៊ី ប្រធានគណបក្សសង្គ្រោះជាតិត្រូវបានតុលាការសាលាដំបូងរាជធានីភ្នំពេញ សម្រេចផ្តន្ទាទោសដាក់ពន្ធនាគារចំនួន២ឆ្នាំ និងពិន័យជាប្រាក់ចំនួន៨លានរៀលតាមអំណាចសាលក្រមព្រហ្មទណ្ឌលេខ៨៩«ច»ចុះថ្ងៃទី១៣ ខែតុលា ឆ្នាំ២០១១ និងសាលដីកាព្រហ្មទណ្ឌលេខ១៧ ក្រ៥.ប ចុះថ្ងៃទី១២ ខែមីនា ឆ្នាំ២០១៣ របស់សាលាឧទ្ធរណ៍រួចហើយ ។
កាលពីពេលកន្លងមកនេះ ប្រធានគណបក្សប្រឆាំងរូបនេះនិងលោក កឹម សុខា ដែលជាអនុប្រធាន បានសរសេរលិខិតថ្វាយព្រះមហាក្សត្រដើម្បីស្នើសុំលើកលែងទោស ប៉ុន្តែលិខិតនោះត្រូវបានប្រមុខរាជរដ្ឋាភិបាលច្រានចោល ដោយបានអះអាងថារឿងទាំងប៉ុន្មានគឺស្ថិតនៅក្នុងអំណាចតុលាការ។
ទាក់ទិននឹងស្ថានការណ៍នយោបាយនៅកម្ពុជាបច្ចុប្បន្ន ក្រុមអ្នកវិភាគនយោបាយបានលើកឡើងថា ទោះបីជាមានការបដិសេធសំណើលើកលែងទោសពីប្រមុខរាជរដ្ឋាភិបាលយ៉ាងណាក្តី នៅថ្ងៃណាមួយនឹងមានដំណោះស្រាយមិនខាន។ ពិសេសនោះនៅពេលគណបក្សទាំងពីរចូលតុជជែកគ្នា ហើយមានការដោះដូរអ្វីមួយដែលភាគីទាំងពីរត្រូវការ ពីគ្នា ៕
ចែករំលែកព័តមាននេះ