រាជធានីភ្នំពេញ ៖ ក្រសួងទេសចរណ៍ បង្កើតកម្មវិធីជ្រើសរើសភូមិទេសចរណ៍ឆ្នើម ដំបូងនៅឆ្នាំនេះ ។ គណៈកម្មាធិការជាតិវាយតម្លៃទីក្រុងស្អាត ជាអ្នកជ្រើសរើសភូមិទេសចរណ៍គំរូបនេះ ដែលមកដល់ពេលនេះគេកំពុងពិគ្រោះយោបល់លើសេចក្តីព្រាងស្តង់ដារ «ភូមិទេសចរណ៍ឆ្នើម» នេះ ។
ក្រសួងទេសចរណ៍ឱ្យដឹងថា ការរៀបចំនូវសេចក្តីព្រាងស្តង់ដារ «ភូមិទេសចរណ៍គំរូ» នេះឡើង គឺក្រោមគំនិតផ្តួចផ្តើម ២ ទី ១ គឺអង្គការទេសចរណ៍ពិភពលោក (UNWTO) និងទី ២ គឺយោងទៅតាមគោលនយោបាយទេសចរណ៍ជាតិក្នុងការអភិវឌ្ឍនូវកសិ-ទេសចរណ៍ នៅតាមជនបទចូលរួមក្នុងការធ្វើឱ្យប្រសើរឡើងនូវជីវភាពរបស់ប្រជាពលរដ្ឋនៅតាមមូលដ្ឋានដែលជាគោលដៅយុទ្ធសាស្ត្រនៅក្នុង «ផែនទីចង្អុលផ្លូវ» របស់រាជរដ្ឋាភិបាល ស្តីពីផែនការស្តារ និងលើកស្ទួយវិស័យទេសចរណ៍កម្ពុជា ក្នុង និងក្រោយវិបត្តិជំងឺកូវីត-១៩ ។
គោលបំណងនៅក្នុងស្តង់ដារ «ភូមិទេសចរណ៍គំរូ» មាន ៤ ចំណុចធំៗ ការអភិវឌ្ឍផលិតផលទេសចរណ៍ សំដៅដល់ការជំរុញទាក់ទាញទីផ្សារទេសចរណ៍ក្នុងស្រុក និងអន្តរជាតិ ទាំងក្នុងនិងក្រោយវិបត្តិជំងឺកូវីត-១៩ ។ ផ្តើមចេញពីការអភិវឌ្ឍភូមិទេសចរណ៍ គេអាចទាក់ទាញទាំងទេសចរក្នុងស្រុក ទាំងទេសចរ អន្តរជាតិឱ្យទៅទស្សនា និងកម្សាន្តនៅតាមជនបទ ដែលអាចបង្កើតការងារ និងចំណូលជាច្រើន បន្ថែមទៀតដល់ប្រជាពលរដ្ឋតាមមូលដ្ឋាន ដែលជាកត្តាជួយកាត់បន្ថយភាពក្រីក្រនៅជនបទ ស្របតាមគោលនយោបាយជាតិអភិវឌ្ឍន៍ទេសចរណ៍ ។
ផលបានមកពីការអភិវឌ្ឍ «ភូមិទេសចរណ៍» គឺអាចឱ្យប្រជាពលរដ្ឋចូលរួមចំណែកក្នុងការអភិរក្សវប្បធម៌ និងធម្មជាតិ និងចំណុចទី ៤ ដោយសារការងារ និងចំណូលបានមកពីវិស័យកសិ-ទេសចរណ៍ យើងក៏អាចទទួលជោគជ័យដល់កិច្ចខិតខំប្រឹងប្រែងគាំពារដល់បរិស្ថាន ព្រមទាំងជីវៈចម្រុះផងដែរ ។
តាមក្រសួងទេសចរណ៍ ការរៀបចំចលនាប្រឡងប្រណាំង «ភូមិទេសចរណ៍ឆ្នើម» ទទួលបានការឯកភាពពីសម្តេចតេជោនាយករដ្ឋមន្ត្រី កាលពីខែកក្កដា ឆ្នាំ ២០២១ ។ ក្រោយទទួលបានជ័យលាភី «ភូមិទេសចរណ៍ឆ្នើម» គណៈកម្មាធិការជាតិវាយតម្លៃទីក្រុងស្អាតនឹងជ្រើសរើសយក «ភូមិទេសចរណ៍ឆ្នើម» ចំនួន ៣ ទៅចូលរួមប្រកួតប្រជែងជាលក្ខណៈអន្តរជាតិក្រោមយន្តការអង្គការទេសចរណ៍ពិភពលោក (UNWTO) លើកទី ២ ក្នុងឆ្នាំ ២០២២ នេះ ។
ក្រសួងទេសចរណ៍ អះអាងថា តាមលទ្ធផលពីការប្រកួតប្រជែងថ្នាក់អន្តរជាតិនេះ អាចឱ្យកម្ពុជាធ្វើការផ្សព្វផ្សាយពីវិស័យទេសចរណ៍ តាមរយៈការបង្ហាញនូវវប្បធម៌ ធម្មជាតិ និងប្រពៃណីទៅកាន់សកលលោក ដែលអាចធ្វើការអភិវឌ្ឍសេដ្ឋកិច្ចមូលដ្ឋាននៅ តាមបណ្តាភូមិនានាទូទាំងប្រទេស និងការជំរុញឱ្យមានការនាំចេញនៅនឹងកន្លែងពីប្រជាកសិករខ្មែរផ្ទាល់តែម្តង ៕
ចែករំលែកព័តមាននេះ