អ្នកដំណើរថ្មើជើងតាមច្រកទ្វារអន្តរជាតិប៉ោយប៉ែតខ្លងលឹក បានបើកឲ្យដំណើរការជាធម្មតាវិញហើយ នៅព្រឹកថ្ងៃទី១ ខែឧសភា ឆ្នាំ២០២២នេះ ក្រោយភាគីថៃបិទជាង២ឆ្នាំ ព្រោះតែវិបត្តិកូវីដ១៩ ប៉ុន្តែសម្រាប់តែអ្នកប្រើប្រាស់
ខេត្តបន្ទាយមានជ័យ ៖ អ្នកដំណើរថ្មើជើងតាមច្រកទ្វារអន្តរជាតិប៉ោយប៉ែតខ្លងលឹក បានបើកឲ្យដំណើរការជាធម្មតាវិញហើយ នៅព្រឹកថ្ងៃទី១ ខែឧសភា ឆ្នាំ២០២២នេះ ក្រោយភាគីថៃបិទជាង២ឆ្នាំ ព្រោះតែវិបត្តិកូវីដ១៩ ប៉ុន្តែសម្រាប់តែអ្នកប្រើប្រាស់លិខិតឆ្លងដែន និងប័ណ្ណឆ្លងព្រំដែនតែប៉ុណ្ណោះ។
ហើយអ្នកស្រុកបានចេញ-ចូលទៅមាត់ច្រកទ្វារព្រំដែនអន្តរជាតិប៉ោយប៉ែត មិនដាច់នៅព្រឹកនេះ ព្រោះតែចង់ដឹងពីស្ថានការណ៍ពិតប្រាកដស្តីពីការបើកឲ្យដំណើរការច្រកទ្វារអន្តរជាតិនៃប្រទេសទាំង២ឡើងវិញ។
អ្នកមានប័ណ្ណឆ្លងព្រំដែន Border Pass ហាក់សប្បាយចិត្ត ព្រោះភាគីថៃមិនតម្រូវលក្ខខណ្ឌច្រើនដូចអ្នកប្រើប្រាស់លិខិតឆ្លងដែន Pass Port នោះទេ។ ចំពោះអ្នកប្រើប្រាស់កាតចេញចូលដីថៃព្រឹកវិលល្ងាចទៅប្រកបរបរផ្សេងៗនៅផ្សាររុងក្លឿ Immigration Card ភាគីថៃនៅមិនទាន់មានការអនុញ្ញាតឲ្យឆ្លងច្រកទ្វារអន្តរជាតិខាងលើនៅឡើយ។
បើតាមប្រភពពីមន្ត្រីកម្ពុជា បំរើការងារនៅច្រកទ្វារអន្តរជាតិប៉ោយប៉ែត បានបង្ហើបឱ្យដឹងថា ក្នុងថ្ងៃដំបូងនៃកាបើកច្រកទ្វារព្រំដែនអន្តរជាតិប៉ោយប៉ែតនេះ ភាគច្រើនជាអាជីវករខ្មែរលក់ដូរនៅផ្សាររុងក្លឿ និងប្រើប្រាស់ប័ណ្ណឆ្លងព្រំដែន Border Pass បានឆ្លងព្រំដែនតាមច្រកទ្វារអន្តរជាតិខាងលើតិចតួចមិនដល់១០០នាក់ទេ ហើយក៏គ្មានកម្មករអូសរទេះឆ្លងទៅមកនៅឡើយដែរ ខណៈជនបរទេសឆ្លងព្រំដែនពីថៃមកកម្ពុជា ក៏មានចំនួនតិចតួចដូចគ្នា ព្រោះនេះជាថ្ងៃដំបូង។
មានកាលើកឡើងជាច្រើនពីពលរដ្ឋដែលភាគច្រើនជាកម្មករអូសរទេះ ចង់ឲ្យភាគីថៃមានការសម្របសម្រួលអនុញ្ញាតដល់អ្នកប្រើប្រាស់កាតឆ្លងព្រំដែនផង គឺ Immigration Card ព្រោះភាគច្រើននៃអ្នកចេញ-ចូលទៅប្រកបរបរនៅផ្សាររុងក្លឿ ប្រើប្រាស់ប័ណ្ណនេះ ម្យ៉ាងដោយសារវិបត្តិកូវីដ ពួកគាត់ជួបបញ្ហាជីវភាពខ្លាំងណាស់។
ចំពោះលក្ខខណ្ឌវិញ ៖ គឺអ្នកដំណើរដែលអាចចេញ-ចូលប្រទេសថៃបានតាមច្រកទ្វារអន្តរជាតិប៉ោយប៉ែតខ្លងលឹក ត្រូវមានឯកសារធ្វើដំណើរ និងអនុវត្តន៍តាមលក្ខខណ្ឌដូចខាងក្រោម ៖
១- សម្រាប់អ្នកចាក់វ៉ាក់សាំងគ្រប់ដូស៖
-ត្រូវចុះបញ្ជីក្នុងប្រព័ន្ធ ThAILAND PASS (https://tp.consular.go.th) មុន៤៨ម៉ោង
-ត្រូវមានឯកសារចាក់វ៉ាក់សាំងគ្រប់ដូស
-ត្រូវមានលិខិតឆ្លងដែន (មានសុពលភាព)
-ត្រូវទិញកញ្ចប់ធានារ៉ាប់រងចំនួន១០,០០០ដុល្លារ ស្មើនឹង៥០ដុល្លារ ក្នុង១ខែ (អាចធ្វើដំណើរបានទូទាំងប្រទេសថៃ)។
២- អ្នកដំណើរដែលមិនបានចាក់វ៉ាក់សាំងគ្រប់ដូស ៖
-ត្រូវចុះបញ្ជីក្នុងប្រព័ន្ធ THAILAND PASS តាម (https//tp.consular.go.th) មុន៤៨ម៉ោង
-ត្រូវមានលិខិតឆ្លងដែន PAss Port (មានសុពលភាព)
-ត្រូវទិញកញ្ចប់ធានារ៉ាប់រងចំនួន១០,០០០ដុល្លារ ស្មើនឹង៥០ដុល្លារក្នុង១ខែ។
-ត្រូវធ្វើចត្តាឡីស័កនៅក្នុងប្រទេសថៃចំនួន៥ថ្ងៃ
-ត្រូវមានឯកសារបញ្ជាក់សុខភាពកូវីដ១៩ចេញដោយក្រសួងសុខាភិបាលនៃប្រទេសសាមី មុនធ្វើដំណើរ៧២ម៉ោង (អាចធ្វើដំណើរបានទូទាំងប្រទេសថៃ)។
៣- សម្រាប់អ្នកធ្វើដំណើររយៈពេលខ្លីប័ណ្ណព្រំដែន (Border Pass) ៖
-មិនចាំបាច់ចុះបញ្ជីក្នុងប្រព័ន្ធ THAILAND PASS ទេ
-ត្រូវមានប័ណ្ណព្រំដែន Border Pass (មានសុពលភាព)
-អនុញ្ញាតឲ្យស្នាក់នៅបានតែរយៈពេល៣ថ្ងៃ
-ករណីសង្ស័យមានមេរោគកូវីដ១៩ មិនអនុញ្ញាតឲ្យចូល
-អាចធ្វើដំណើរបានតែក្នុងតំបន់ដែលបានកំណត់នៅក្នុងកិច្ចព្រមព្រៀង MOU (ខេត្តស្រះកែវ-ប្រាជីនបូរី)។
គួរបញ្ជាក់ថា នៅព្រឹកដដែលនេះ អាជ្ញាធរខេត្ត-ស្រុក-ក្រុងជាប់ព្រំដែនបន្ទាយមានជ័យ, ក្រុងប៉ោយប៉ែត និងស្រះកែវ, អារញ្ញ បានជួបចាប់ដៃគ្នាលើស្ពានមិត្តភាពកម្ពុជា-ថៃ នៃច្រកទ្វារអន្តរជាតិប៉ោយប៉ែតខ្លងលឹក ក្នុងការបើកឲ្យដំណើរការច្រកទ្វារព្រំដែនខាងលើ។
អាជ្ញាធរកម្ពុជាក៏បានស្នើសុំឲ្យភាគីថៃឱ្យមានការយោគយល់លើចំណុចមួយចំនួន ជាពិសេសលើបញ្ហាអាជីវករលក់ដូរនៅផ្សាររុងក្លឿ ដែលកន្លងមកបានស្នាក់នៅទីនោះ ហើយភាគច្រើនឯកសារដាច់សុពលភាព។ ដោយឡែកបញ្ហាមួយចំនួនទៀត ដែលថ្នាក់ក្រោមមិនអាចសម្រេចបាន ភាគីថៃថា បាននិងកំពុងប្រជុំដោះស្រាយបន្ថែម និងមួយចំនួនបញ្ជូនទៅថ្នាក់លើ ដើម្បីសម្រេច។
គួរបញ្ជាក់ថា ឆ្លើយតបនឹងសំណើររបស់អាជ្ញាធរកម្ពុជា សុំឲ្យមានកាយោគយល់ដល់អាជីវករលក់ដូរនៅផ្សាររុងក្លឿ ករណីឯកសារផុតសុពលភាពនោះ ភាគីថៃក៏បានលើកឡើងថា ចំពោះអ្នកផុតសុពលភាពមុនបិទព្រំដែន ហើយមិនបានវិលត្រឡប់ គេនឹងផាកពិន័យទៅតាមច្បាប់ ប៉ុន្តែបើក្រោយបិទព្រំដែន អាជីវករផុតសុពលភាព គេនឹងអនុគ្រោះ ហើយថែមទាំងអនុញ្ញាតឲ្យវិលចូលប្រទេសចាប់ពីថ្ងៃទី១ រហូតដល់ថ្ងៃទី៧ ជារៀងរាល់ខែ ដោយមិនយកប្រាក់១បាតឡើយ ដើម្បីឲ្យធ្វើឯកសារថ្មីនៅប្រទេសកំណើត៕
ចែករំលែកព័តមាននេះ