ជនសង្ស័យចំនួន២នាក់ ដោយម្នាក់ត្រូវបានសមត្ថកិច្ចធ្វើការឃាត់ខ្លួន និងម្នាក់ទៀតរត់គេចខ្លួនបាត់ស្រមោល បន្ទាប់ពីធ្វើសកម្មភាពកាច់.កម៉ូតូពីប្រជាពលរដ្ឋនៅក្នុងវត្ត តែ
ខេត្តកណ្តាល ៖ ជនសង្ស័យចំនួន២នាក់ ដោយម្នាក់ត្រូវបានសមត្ថកិច្ចធ្វើការឃាត់ខ្លួន និងម្នាក់ទៀតរត់គេចខ្លួនបាត់ស្រមោល បន្ទាប់ពីធ្វើសកម្មភាពកាច់.កម៉ូតូពីប្រជាពលរដ្ឋនៅក្នុងវត្ត តែមិនបានសម្រេច ។ ហេតុកាណ៍នេះបានកើតឡើងនៅថ្ងៃទី៣០ ខែមេសា ឆ្នាំ២០២២ វេលាម៉ោង៧និង១០នាទី នៅចំណុចបរិវេណវត្តប្ញស្សីស្រុក ស្ថិតក្នុងភូមិឬស្សីស្រុក២ ឃុំឈើទាល ស្រុកកៀនស្វាយ ខេត្តកណ្តាល។
បើតាមសមត្ថកិច្ចបានអោដឹងថា ជនរងគ្រោះមានឈ្មោះ លឹង លន ភេទប្រុស អាយុ៤៨ឆ្នាំ ជនជាតិខ្មែរ មុខរបរកសិករ មានទីលំនៅភូមិឈើទាល២ ឃុំឈើទាល ស្រុកកៀនស្វាយ ខេត្តកណ្តាល។ ចំណែកជនសង្ស័យទី១- ឈ្មោះ ហែម រតនា ភេទប្រុស អាយុ៤២ឆ្នាំ មុខរបរមិនពិត មានទីលំនៅភូមិប្រាំ ឃុំព្រែកខ្សាយក ស្រុកពាមរក៍ ខេត្តព្រៃវែង និងទី២- ឈ្មោះ ព្រឿង ភេទប្រុស អាយុប្រហែល៣៧ឆ្នាំ ជនជាតិខ្មែរ មុខរបររត់ម៉ូតូឌុប មិនស្គាល់ទីលំនៅ (រត់គេចខ្លួនបាត់)។
សមត្ថកិច្ចបន្តថា នៅថ្ងៃខែឆ្នាំវេលាម៉ោងកើតហេតុខាងលើ ជនរងគ្រោះបានជិះម៉ូតូមួយគ្រឿងម៉ាក HONDA DREAM ពណ៌ខ្មៅ ស៊េរី២០២០ ពាក់ស្លាកលេខ កណ្ដាល1AH.8882 យកចង្ហាន់ទៅប្រគេនព្រះសង្ឃនៅវត្តឬស្សីស្រុក ដោយទុកម៉ូតូនៅក្បែរសាលាឆាន់ រួចចាក់សោ.ក បន្ទាប់មកយកចង្ហាន់ឡើងទៅប្រគេនព្រះសង្ឃដែលគង់នៅខាងលើសាលាឆាន់ ។ ភ្លាមៗនោះក៏មានជនស្ស័យម្នាក់បានដើរចុះឡើងៗក្បែរម៉ូតូរបស់ជនរងគ្រោះ រួចឡើងជិះលើម៉ូតូហើយក៏ធ្វើសកម្មភាពកាច់សោ.កម៉ូតូតែម្តង ។
ប្រភពដដែលបន្តថា ភ្លាមៗនោះ ក៏មានប្រជាពលរដ្ឋស្រែកឆោឡោថា «ចោៗ» និងនាំគ្នាព័ទ្ធចាប់បានម្នាក់ ចំណែកម្នាក់ទៀតរត់គេចខ្លួនបាត់ បន្ទាប់មកក៏បានរាយការណ៍អោយសមត្ថកិច្ចប៉ុស្តិ៍នគរបាលរដ្ឋបាលឈើទាលតែម្តង។
ក្រោយពីទទួលបានព័ត៌មានភ្លាម កម្លាំងប៉ុស្តិ៍ សហការជាមួយកម្លាំងផ្នែកនគរបាលយុត្តិធម៌ស្រុកកៀនស្វាយ ចុះទៅដល់កន្លែងកើតហេតុ និងឃាត់ខ្លួនជនសង្ស័យខាងលើ យកមកសួរនាំនៅប៉ុស្តិ៍។ ហើយនៅចំពោះមុខសមត្ថកិច្ច ជនសង្ស័យឈ្មោះ ហែម រតនា បានឆ្លើយសារភាពថា «ខ្លួនបានជិះម៉ូតូមួយគ្រឿងម៉ាកសេ១២៥ ពណ៌ខ្មៅ ស៊េរីឆ្នាំ២០១៨ មិនចាំស្លាកលេខ ជាមួយឈ្មោះ ព្រឿង ភេទប្រុស មកធ្វើសកម្មភាពលួចកាច់សោ.កម៉ូតូគេនៅក្នុងវត្តឬស្សីស្រុក ស្ថិតក្នុងភូមិឬស្សីស្រុក២ ឃុំឈើទាល ស្រុកកៀនស្វាយ ខេត្តកណ្ដាល ។
ជនសង្ស័យរូបនេះបានឆ្លើយសារភាពទៀតថា ឈ្មោះព្រឿង ជាអ្នកអូសទាញ និងបង្ហាត់អោយចេះវិធីកាច់សោ.កម៉ូតូ រួមទាំងអោយសម្ភារៈកាច់.កម៉ូតូមកខ្លួនថែមទៀត (ដោយសារខ្លួនគ្មានប្រាក់មើលជំងឺម្ដាយឈឺ ដែលកំពុងសម្រាកព្យាបាលនៅមន្ទីរពេទ្យជ័យជំនះក្រុងតាខ្មៅ»។
ក្រោយពីសួរនាំរួច ជនសង្ស័យ រួមទាំងវត្ថុតាង បញ្ជូនជនសង្ស័យមកកាន់អធិការដ្ឋាននគរបាលស្រុកកៀនស្វាយ ដើម្បីចាត់ការតាមនីតិវិធីច្បាប់។
ចែករំលែកព័តមាននេះ