ប្រជាជនសៀងហៃជាង ១២,៣៨លាននាក់ បច្ចុប្បន្ននេះត្រូវអាជ្ញាធរចាត់បញ្ជូលក្នុងតំបន់មានហានិភ័យទាប មានន័យថាពួកគេអាចចេញក្រៅផ្ទះបាន។ នេះបើយោងតាមការប្រកាសរបស់រដ្ឋាភិបាលកាលពីថ្ងៃសុក្រម្សិលមិញនេះ។
អាជ្ញាធរទីក្រុងសៀងហៃដែលកំពុងតស៊ូទប់ស្កាត់ការរាតត្បាតកូវីដដ៏ខ្លាំងបំផុត បានបានបិទទីក្រុងទាំងមូលនៅដើមខែនេះ និងប្រាប់ឲ្យប្រជាជនស្នាក់នៅតែក្នុងផ្ទះ។ ប៉ុន្តែអាជ្ញាធរបានធ្វើការលុបចោលការរឹតបន្តឹងមួយចំនួននៅក្នុងតំបន់រស់នៅដែលមិនមានករណីឆ្លងថ្មីរយៈពេល ២សប្តាហ៍។
ទីក្រុងដែលមានប្រជាជនសរុបជាង ២៦លាននាក់នេះ បានចាត់ចំណាត់ថ្នាក់លំនៅដ្ឋាននីមួយៗតាមកម្រិតហានិភ័យចំនួន ៣ ដោយកំណត់ថា តំបន់ដែលគ្មានការឆ្លងកូវីដ ១៩រយៈពេល ១៤ថ្ងៃជាតំបន់ការពារ ដោយបានអនុញ្ញាតិឲ្យប្រជាជននៅតំបន់នោះចេញខាងក្រៅផ្ទះបានសម្រាប់ធ្វើសកម្មភាពសមស្រប។
នៅថ្ងៃព្រហស្បតិ៍កន្លងទៅនេះ ចំនួនប្រជាជនរស់នៅក្នុងតំបន់មានហានិភ័យខ្ពស់ដែលក្លាយជាកម្មវត្ថុនៃការរឹតបន្តឹងកាន់តែខ្លាំង មានចំនួន ៥,២៧លាននាក់ ធ្លាក់ចុះពីចំនួន ៦,៦លាននាក់ចាប់តាំងពីមានការកែសម្រួលចុងក្រោយនៅថ្ងៃទី ២០ ខែមេសា។
ប្រជាជនចំនួន ៥,៩៣លាននាក់ផ្សេងទៀតដែលស្ថិតនៅតំបន់មានហានិភ័យមធ្យម បច្ចុប្បន្ននេះត្រូវបានអនុញ្ញាតិជាគោលការណ៍ឲ្យចាកចេញពីផ្ទះរបស់ពួកគេ ប៉ុន្តែនៅតែត្រូវបង្ខាំងនៅក្នុងបរិវេណដែលអាជ្ញាធរកំណត់។
រដ្ឋាភិបាលចិននិយាយថា មនុស្សចំនួន ៥២នាក់បានស្លា.ប់ដោយសារកូវីដ ១៩កាលពីថ្ងៃទី ២៨ ខែមេសា ធៀបទៅនឹងអ្នកស្លា.ប់ចំនួន ៤៧នាក់នៅថ្ងៃទី ២៧ ខែមេសា។
កាលពីថ្ងៃព្រហស្បតិ៍ សៀងហៃរកឃើញអ្នកឆ្លងកូវីដថ្មីដែលមិនទាន់មានរោគសញ្ញាចំនួន ៩,៥៤៥នាក់ និងអ្នកឆ្លងមានរោគសញ្ញាចំនួន ៥,៤៨៧នាក់៕ (យោងតាមប្រភព៖ Reuters)
ចែករំលែកព័តមាននេះ