ក្រុងស៊ីប៉ាង-ប្រទេសម៉ាឡេស៊ី ៖ ក្រុមហ៊ុនអាកាសចរណ៍ AirAsia បានធ្វើពិធីផ្តល់ជូននូវការជិះយន្តហោះ ដោយឥតគិតថ្លៃដល់កីឡាករ-កីឡាការិនីពិការអាស៊ាន ដែលទទួលបានជ័យលាភី ក្នុងការប្រកួតកីឡា Paralympic ឆ្នាំ២០១៦ ។
ការប្រគល់ជូននេះ ធ្វើឡើងក្នុងព្រឹត្តិការណ៍ស្រមោល.សមួយ ដែលប្រារព្ធធ្វើនៅមជ្ឈមណ្ឌលឧត្តមភាពនៃអាកាសចរណ៍អាស៊ី ហៅកាត់ថា AACE កាលពីថ្ងៃទី១១ តុលា កន្លងទៅ ។ ក្នុងព្រឹត្តិការណ៍នេះ អ្នកជ័យលាភីមេដាយមាសទទួលបានការជិះយន្តហោះ ដោយឥតគិតថ្លៃអស់មួយជីវិត, មេដាយប្រាក់ទទួលបានការជិះដោយឥតគិតថ្លៃរយៈពេល៥ឆ្នាំ និងមេដាយសំរឹទ្ធិរយៈពេល៣ឆ្នាំ ។
អ្នកជ័យលាភីទាំងនោះ ទទួលបានកាត «Big» ដ៏ពិសេសមួយរបស់ AirAsia ដែលមានទម្រង់ជាមាស ប្រាក់ និងសំរឹទ្ធិ ដែលអនុញ្ញាតឲ្យពួកគេធ្វើដំណើរទៅកាន់ចំណតមួយណាក៏បាន ក្នុងចំណោមចំណតទាំង១២០របស់ AirAsia និងបណ្តាញ AirAsia X ក្នុងតំបន់អាស៊ី អូស្ត្រាលី មជ្ឈិមបូព៌ា និងអាហ្វ្រិក ។
ព្រឹត្តិការណ៍នេះ ក៏មានការចូលរួមពីនាយកប្រតិបត្តិរបស់ AirAsia Group លោក Tony Fernandes, នាយកប្រតិបត្តិរបស់AirAsia X Group លោក Datuk Kamarudin Meranun, នាយកប្រតិបត្តិរបស់ AirAsia Berhad លោកស្រី Aireen Omar, នាយកប្រតិបត្តិរបស់ AirAsia X Berhad លោក Benyamin Ismail និងនាយកប្រតិបត្តិរបស់ AirAsia ប្រចាំប្រទេសដទៃទៀត រួមជាមួយនឹងមន្ត្រីរដ្ឋការ និងកីឡាករផ្សេងទៀតមកពីអាស៊ាន ។
ថ្លែងក្នុងពិធីនោះ លោក Tony Fernandes នាយកប្រតិបត្តិ AirAsia Group បានមានប្រសាសន៍ថា « ជាថ្មីម្តងទៀតហើយដែលកីឡាករអាស៊ានបានធ្វើឲ្យតំបន់យើងមានមោទនភាព ដោយបានបង្ហាញថា ពួកយើងមានកីឡាករដ៏មានសមត្ថភាពនៅលើឆាកអន្តរជាតិ ហើយខ្ញុំពិតជាមានក្តីរំភើបណាស់ក្នុងការផ្តល់ជូននូវការជិះយន្តហោះដោយមិនគិតថ្លៃដល់កីឡាករ និងកីឡាការិនីទាំងអស់ក្នុងការទទួលស្គាល់ពីសមិទ្ធផលរបស់ពួកគេ » ។
លោកបន្ដថា ៖ « កីឡាករទាំងនេះបានបង្ហាញថា ស្មារតីរបស់មនុស្សលោក គឺពិតជាពុំមានដែនកំណត់មែន គ្មានឧបសគ្គអ្វីដែលយើងមិនអាចឆ្លងកាត់ក្នុងការសម្រេចក្ដីសុបិនរបស់យើងបានឡើយ តាមរយៈការផ្ដើមស្មារតី ការខិតខំតស៊ូ និងការខិតខំប្រឹង ប្រែង ពួកគេគឺជានិមិត្តរូបមួយក្នុងតំបន់ និងក្នុងពិភពលោកនេះ » ។
ចែករំលែកព័តមាននេះ