រាជធានីភ្នំពេញ ៖ ការប្រកួតប្រដាល់ដណ្ដើមខ្សែក្រវាត់គោជល់ក្នុងប្រភេទទម្ងន់៧៥គីឡូក្រាម នៅលើសង្វៀនទូរទស្សន៍ PNN ថ្ងៃអាទិត្យ ទី១៦ តុលា ខាងមុខនេះ ឈានចូលដល់សប្ដាហ៍ទី៣ ។
មាស ភារម្យ មកពីក្លិបបញ្ជាការដ្ឋានកងទ័ពជើងទឹក និង សុខ ទូច មកពីក្លិបដែនសមុទ្រមានរិទ្ធ បានជួបរឿងស៊យបាត់បង់៣ពិន្ទុរួចម្ដងមកហើយដោយសារកីឡាករថៃវាយឱ្យសន្លប់ទាំង២នាក់កាលពីប្រកួតនៅក្នុងជុំទី១ ។ មាស ភារម្យ ត្រូវកីឡាករថៃឈ្មោះ ឌីសែល ឡេត វាយឱ្យសន្លប់នៅក្នុងទឹកទី៤ ចំណែក សុខ ទូច ត្រូវកីឡាករថៃឈ្មោះ កាំឡាយ ផេត វាយឱ្យសន្លប់នៅត្រឹមទឹកទី១ប៉ុណ្ណោះ ។ លើកនេះ គេមិនទាន់ដឹងថា មាស ភារម្យ ដែលត្រូវជួបប្រកួតជាមួយកីឡាករថៃឈ្មោ កាំឡាយ ផេត និង សុខ ទូច ដែលត្រូវជួបប្រកួតជាមួយកីឡាករថៃឈ្មោះ ឌីសែល ឡេត នោះ ទៅរួចឬអត់នោះទេ ។ បើធ្វើការប្រៀបធៀបទៅលើប្រវត្តិប្រកួតរវាងកីឡាករថៃកាំឡាយ ផេត និង មាស ភារម្យ គឺមិនខុសគ្នាប៉ុន្មាននោះទេ។ កីឡាករថៃរូបនេះ ធ្លាប់ប្រកួតបាន១០៣ដង ឈ្នះ៨១ដង ចាញ់២០ដង និងស្មើ២ដង ចំណែក មាស ភារម្យ ធ្លាប់ប្រកួតបាន៩៤ដង ឈ្នះ៨០ដង ចាញ់១១ដង និងស្មើ៣ដង ។ ប៉ុន្តែបើនិយាយពីល្បិចប្រយុទ្ធ និងកម្លាំងវិញឃើញថា កីឡាករថៃមានប្រៀបជាងដាច់ឆ្ងាយ ។ ចាំមើល មាស ភារម្យ អាចតស៊ូជាមួយកីឡាករថៃបានប៉ុន្មានទឹក?
ចំណែក សុខ ទូច វិញកាន់តែយ៉ាប់ថែមទៀត ព្រោះអ្នកដែលគេត្រូវជួបលើកនេះ គឺជាជើងខ្លាំងដែលពិបាកទប់ទល់បំផុត ។ បើធ្វើការប្រៀបធៀបទៅលើប្រវត្តិប្រកួតវិញនោះ ឃើញថា ខុសគ្នាជាងពាក់កណ្ដាលឯណោះ ។ កីឡាករថៃ ឌីសែល ឡេត ធ្លាប់ប្រកួតបានរហូតដល់ទៅ១៥៣ដង ឈ្នះ១២១ដង និងចាញ់៣២ដង ចំណែក សុខ ទូច ធ្លាប់ប្រកួតបានត្រឹមតែ៧២ដង ឈ្នះ៥១ដង ចាញ់១៨ដង និងស្មើ៣ដង ។ សម្រាប់ការប្រកួតរបស់ សុខ ទូច លើកនេះ គេសង្ឃឹមតិចបំផុតថាអាចយកឈ្នះកីឡាករថៃ ។
ក្រៅពីគូដណ្ដើមខ្សែក្រវាត់នេះទៅនៅមានគូដណ្ដើមជើងឯកម៉ារ៉ាតុនចំនួន២គូទៀតគឺ ទិត្យ បូណា មកពីក្លិបសាមគ្គីកីឡា ប្រកួតជាមួយ លីន កុសល មកពីក្លិបបុរីមានរិទ្ធ និង ឡុង រ៉ាមី មកពីក្លិបខ្លារខិនមានរិទ្ធ ប្រកួតជាមួយ ប៉ាន់ សាមឌី មកពីក្លិបពន្លឺវិបុល ៕
ចែករំលែកព័តមាននេះ