រាជធានីភ្នំពេញ ៖ នៅយប់ថ្ងៃសុក្រទី១៤ តុលា ស្អែកនេះ កីឡាករជើងខ្លាំង២រូបគឺ ផាន់ គ្រាន់ និង ឡុង សុភី នឹងឡើងប្រកួតជាមួយកីឡាករថៃ នៅក្នុងព្រឹត្តិការណ៍ប្រដាល់អន្តរជាតិ K-Cementជាថ្មីនៅលើសង្វៀនទូរទស្សន៍
រាជធានីភ្នំពេញ ៖ នៅយប់ថ្ងៃសុក្រ ទី១៤ តុលា ស្អែកនេះ កីឡាករជើងខ្លាំង២រូបគឺ ផាន់ គ្រាន់ និង ឡុង សុភី នឹងឡើងប្រកួតជាមួយកីឡាករថៃ នៅក្នុងព្រឹត្តិការណ៍ប្រដាល់អន្តរជាតិ K-Cementជាថ្មីនៅលើសង្វៀនទូរទស្សន៍អាស៊ីអាគ្នេយ៍ ដើម្បីរំលេចនូវការចាប់អារម្មណ៍ ។ គេមិនទាន់ដឹងថា រវាងកីឡាករកម្ពុជាទាំងពីរនឹងមានវាសនាយ៉ាងដូចម្ដេចនោះទេ ដោយសារតែសមាសភាពថៃដែលត្រូវប៉ះជាមួយក៏មិនមែនជើងថ្មី និងមិនធ្លាប់មានប្រវត្តិស៊ីជើងខ្លាំងរបស់កម្ពុជា ។
កីឡាករ ផាន់ គ្រាន់ ជើងខ្លាំងប្រចាំក្លិបគជសារកីឡា នឹងត្រូវជួបប្រកួតជាមួយកីឡាករថៃឈ្មោះSuper Chhai ដែលល្បីឈ្មោះនៅក្នុងប្រទេសថៃ ។ ជំនួបប៉ះគ្នារវាងអ្នកទាំងពីរត្រូវគេមើលឃើញថានឹងបែកផ្កាភ្លើងនៅលើសង្វៀន ដោយសារតែពួកគេសុទ្ធតែត្រូវការឈ្នះដើម្បីរក្សាមុខមាត់ និងក្រេឌីត ។ គូនេះ កីឡាករកម្ពុជាធ្លាប់ប្រកួតបាន៨១លើក ឈ្នះ៦៧លើក ចាញ់១៣លើក និងស្មើ១លើកក្នុងពេលកីឡាករថៃធ្លាប់ប្រកួតបានដល់១២១លើក ឈ្នះ១០៣លើក ចាញ់១៦លើក និងស្មើ២លើក។ កីឡាករកម្ពុជាបានប្រកាសប្រាប់ថានឹងប្រឹងយកឈ្នះកីឡាករថៃឱ្យខាងតែបាន ដោយសារតែមុនផ្គូផ្គងលោកហ្វឹកហាត់ច្រើននៅលើសង្វៀនក្នុងក្លិប ។ យ៉ាងណាក៏ដោយកីឡាករថៃក៏មានជំនឿចិត្តបែបនេះផងដែរ ដោយសារតែ Super Chhai ក៏មានប្រវត្តិប្រកួតច្រើនជាងផង ។ នេះបើយោងតាមការអះអាងរបស់ថៃ អ៊ូ ជាអ្នកដឹកនាំកីឡាករថៃឱ្យមកប្រកួត និងផ្អែកតាមថ្វីដៃដែលកីឡាករថៃធ្វើបាននាពេលកន្លងមក ។
កីឡាករ ឡុង សុភី ឯណោះវិញនឹងត្រូវជួបប្រកួតជាមួយកីឡាករថៃឈ្មោះ Thai Oulek នៅក្នុងព្រឹត្តិការណ៍នេះដែរ ។ អ្នកទាំងពីរប៉ះគ្នាក្នុងតំណែងគូឯក ដោយកីឡាករម្ខាងៗសុទ្ធតែអួតរៀងខ្លួនថាពួកគេនឹងប្រឹងយកឈ្នះឱ្យបាន។ គេមិនទាន់ដឹងថា អ្នកណានឹងឈ្នះអ្នកណាសម្រាប់ការប្រកួតនេះនៅឡើយទេ ដោយសារតែគេមើលឃើញថា ភាគីម្ខាងៗសុទ្ធតែមានមហាជនទទួលស្គាល់ថា ខ្លាំងដូចគ្នា ។ គាប់ជួនការប្រកួតចុងក្រោយរបស់ឡុង សុភី ជួនក៏បានលទ្ធផលល្អ និងជួនក៏បានលទ្ធផលអវិជ្ជមាននោះផង ទើបការប្រាកដចិត្តថាកីឡាករកម្ពុជានឹងឈ្នះកីឡាករថៃមួយរយភាគរយហាក់ប្រែប្រួល។ កីឡាករថៃ Thai Oulek ត្រូវបានប្រកាសថាជាជើងខ្លាំងម្នាក់នៅក្នុងប្រទេសថៃ ដោយបទពិសោធន៍របស់គេក៏មិនណយណាស់ដែរ ។ ឡុង សុភី ធ្លាប់ប្រកួត១២៩លើក ឈ្នះ៩៧លើក ចាញ់២៤លើក និងស្មើ៨លើក ខណៈកីឡាករថៃជាគូប្រកួតធ្លាប់ឡើងរេញបាន១០៨លើក ឈ្នះ៩០លើក ចាញ់១៦លើក និងស្មើ២លើក ។
លោក ញាណ សុធី អ្នករៀបចំកម្មវិធីប្រដាល់ប្រចាំស្ថានីយទូរទស្សន៍អាស៊ីអាគ្នេយ៍បានអះអាងថា នៅថ្ងៃសុក្រនេះ គូប្រកួតរបស់ទូរទស្សន៍អាស៊ីអាគ្នេយ៍សុទ្ធតែមានកេរ្តិ៍ឈ្មោះ ដូច្នេះលោកមិនអាចប៉ាន់ស្មានថាអ្នកណានឹងឈ្នះនោះទេ ក្នុងពេលដែលកីឡាករថៃដែលលោកផ្គូផ្គងក៏លោកបានដាក់ល្អៗឱ្យពួកគេប៉ះគ្នា ។ លោកមានទំនុកចិត្តលើកីឡាករកម្ពុជាច្រើនជាង ប៉ុន្តែបើឱ្យលោកប្រាកដចិត្តថាកីឡាករផាន់ គ្រាន់ និងឡុង សុភី ពិតជាឈ្នះមួយរយភាគរយក៏លោកមិនហ៊ានជឿជាក់នោះទេ ។ លោកថា មានតែចាំអ៊ុតមើលការប្រកួតជាក់ស្ដែងប៉ុណ្ណោះ ទើបអាចដឹងលទ្ធផលក្នុងជំនួបដ៏ក្ដៅគគុករបស់កីឡាករខ្មែរ និងថៃទាំងពីរ ៕
ចែករំលែកព័តមាននេះ