រាជធានីភ្នំពេញ ៖ អាជ្ញាធរខណ្ឌប្ញស្សីកែវ បានដាក់បទបញ្ជាទៅសាលាសង្កាត់កោះដាច់ ធ្វើយ៉ាងណារៀបចំអភិវឌ្ឍឆ្នេរខ្សាច់ក្បាលកោះដាច់ឱ្យក្លាយទៅជាតំបន់ទេសចរណ៍សំរាប់រាជធានីភ្នំពេញ ឱ្យបានមុនថ្ងៃចូលឆ្នាំប្រពៃណីជាតិខាងមុខនេះ។ នេះជាប្រសាសន៍លោកឃ្លាំង ហួត ជំនួយការសម្តេចអគ្គមហាសេនាបតីតេជោ ហ៊ុន សែន និងជាអភិបាលខណ្ឌប្ញស្សីកែវ កាលពីរសៀលថ្ងៃទី៧ ធ្នូ ខណៈពេលរូបលោកដឹកនាំមន្ត្រីរាជការជុំវិញសាលាខណ្ឌប្ញស្សីកែវទៅសំណេះសំណាលជាមួយមន្ត្រីរាជការនៅសង្កាត់កោះដាច់ ដែលទើបត្រូវបានកាត់បញ្ចូលមកក្នុងរាជធានីភ្នំពេញ។
លោកឃ្លាំង ហួត ថ្លែងថា យោងតាមព្រះរាជក្រឹត្យ និងអនុក្រឹត្យក្នុងការកាត់ឃុំកោះដាច់ឱ្យទៅជាសង្កាត់ ក្នុងរាជធានីភ្នំពេញ គឺជានយោបាយថ្មីរបស់សម្តេចអគ្គមហាសេនាបតីតេជោ ហុ៊ន សែន ក្នុងការអភិវឌ្ឍរាជធានីភ្នំពេញ។ នេះជានយោបាយដ៏ត្រឹមត្រូវរបស់រាជរដ្ឋាភិបាលកម្ពុជា ក៏ដូចជាគណបក្សប្រជាជនកម្ពុជា។ វាជាមោទនភាពណាស់ លោកនឹងធ្វើអ្វីមួយដើម្បីឱ្យសង្កាត់កោះដាច់ប្រែមុខមាត់ថ្មី មានការអភិវឌ្ឍក្លាយជាតំបន់ទេសចរណ៍ដ៏មានសោភ័ណភាពដែលទាក់ទាញដល់ភ្ញៀវបរទេស ហើយប្រជាពលរដ្ឋមានជីវភាពធូរធារ។
លោកឃ្លាំងហួត អភិបាលខណ្ឌប្ញស្សីកែវបានឱ្យដឹងថា សង្កាត់កោះដាច់មានឆ្នេរខ្សាច់ មានទឹកថ្លាដូចសមុទ្រ និងខ្យល់អាកាសបរិសុទ្ធសំរាប់ភ្ញៀវទេសចរទៅកំសាន្ត និងហែលទឹកលេងមិនចាញ់ខេត្តទេសចរនានាទេ។ ដោយឡែកចុងកោះដាច់ ចៅសង្កាត់ត្រូវចលនាប្រជាពលរដ្ឋឱ្យបង្កើតជាសមាគមតម្បាញ ហើយបង្កើតកន្លែងសំរាប់តាំងផលិតផលសំរាប់ភ្ញៀវទេសចរ និងមានការបង្ហាញពីប្រវត្តិនៃកីតម្បាញជូនភ្ញៀវទេសចរ។ លោកឃ្លាំង ហួត បានដាក់បទបញ្ជាឱ្យចៅសង្កាត់កោះដាច់ចុះរៀបចំឆ្នេរខ្សាច់ក្បាលកោះឱ្យមានសោភ័ណភាព មានចំណតរថយន្ត បង្គន់អនាម័យ ដើម្បីឱ្យប្រជាជនទៅទស្សនា និងស្រូបយកខ្យល់អាកាសដ៏បរិសុទ្ធ។
លោកឃ្លាំង ហួត បានឱ្យដឹងថា កន្លងមកឆ្នេរខ្សាច់មានការខ្វះខាតច្រើន ហើយត្រូវរៀបចំឡើងវិញធ្វើយ៉ាងណាឱ្យតំបន់នេះក្លាយជាតំបន់ទេសចររបស់រាជធានីភ្នំពេញ ឱ្យបានមុនថ្ងៃចូលឆ្នាំប្រពៃណីជាតិ ហើយប្រជាជនមានជីវភាពធូរធារ។ មុនដំបូងដាក់ផែនការ ហើយមន្ត្រីជំនាញចុះមកសិក្សាធ្វើប្លង់យើងចាត់ចែងសុំយោបល់ពីអភិបាលរាជធានីភ្នំពេញដាក់គ្រឿងចក្រមកធ្វើតែម្តង។ ទោះជាយ៉ាងណាក្តី ជាជំហានដំបូងសាលារាជធានីភ្នំពេញមានគំរោងស្ថាបនាផ្លូវ ព្រោះផ្លូវមានសារសំខាន់ណាស់។
នៅក្នុងឱកាសចុះសំណេះសំណាលនេះ លោកអភិបាលខណ្ឌបានសន្យាធ្វើអគារស្នាក់ការសង្កាត់ និងប៉ុស្តិ៍រដ្ឋបាលនៅពេលឆាប់ៗនេះ ព្រមទាំងនាំអំណោយជាភេសជ្ជៈ និងថវិកាមួយចំនួនទៅឧបត្ថម្ភគណបក្សប្រជាជន សណ្តាប់ធ្នាប់សង្កាត់ នគរបាលប៉ុស្តិ៍ ជាការផ្សារភ្ជាប់ទំនាក់ទំនងឱ្យកាន់តែស្និទ្ធស្នាលជាមួយមូលដ្ឋាន។
សង្កាត់កោះដាច់ជាសង្កាត់ស្ថិតនៅលើកោះ មានភូមិចំនួន៥ ប្រជាពលរដ្ឋរស់នៅចំនួន៣.០៥៤គ្រួសារ មានប្រជាពលរដ្ឋចំនួន១២.៧៦៧នាក់ រស់នៅ។ សង្កាត់នេះមានកំពង់ដចំនួន៥ ដែលកំពង់ដចំនួន២ឆ្លងទៅសង្កាត់ព្រែកលៀប និងកំពង់ដ២ទៀតឆ្លងទៅសង្កាត់បាក់ខែង ខណ្ឌប្ញស្សីកែវ និងកំពង់ដមួយឆ្លងទៅឃុំពុកប្ញស្សី ស្រុកខ្សាច់កណ្តាល។ តាមការឱ្យដឹងពីចៅសង្កាត់ ប្រជាពលរដ្ឋចំនួន៦០% រស់នៅប្រកបមុខរបរតម្បាញ និងមានឆ្នេរខ្សាច់ក្បាលកោះជាតំបន់សំរាប់ភ្ញៀវធ្វើដំណើរទៅទេសចរ និងហែលទឹកលេង៕
ចែករំលែកព័តមាននេះ