លក់ដូរទីសាធារណៈសោះក្លាយជាកេររបស់កាស៊ីណូអស់
- ស្វាយរៀង
ខេត្តស្វាយរៀង ៖ បែកធ្លាយករណីកូនស្រីលោកឧកញ៉ា លី ប៉ោយូ ម្ចាស់កាស៊ីណូ«ពិភពថ្មី» ឈ្មោះស៊ូ ស៊ី ភេទស្រី អាយុ២៥ឆ្នាំ…
ខេត្តស្វាយរៀង ៖ បែកធ្លាយករណីកូនស្រីលោកឧកញ៉ា លី ប៉ោយូ ម្ចាស់កាស៊ីណូ«ពិភពថ្មី» ឈ្មោះស៊ូ ស៊ី ភេទស្រី អាយុ២៥ឆ្នាំ នៅភូមិបាវិតកណ្តាលសង្កាត់បាវិតក្រុងបាវិត បាននាំបក្សពួកមានឈ្មោះថន ឈ្មោះប្រុស និងឈ្មោះរ៉ា ទៅយកសម្ភារ និងភេស្ជជៈគេ ត្រូវជាប់ចោទពីបទប្រព្រិត្តអំពើលួច និងប្រើអំណាចកៀបសង្កត់ ហើយត្រូវលោកព្រះរាជអាជ្ញាចេញដីកាកោះហៅឲ្យចូលទៅអយ្យការអមសាលាដំបូងខេត្តស្វាយរៀងនៅខែឧសភាខាងមុខនេះ ។
ទាក់ទិនករណីខាងលើនេះ សមត្ថកិច្ចបានឲ្យដឹងថា កាលពីថ្ងៃទី២១ មេសា ២០២២ វេលាម៉ោង៣និង០០នាទី
រសៀល មានឈ្មោះស៊ូ ស៊ី ភេទស្រី អាយុ២៥ឆ្នាំ ជាកូនស្រីលោកឧកញ៉ា លី ប៉ោយូ ម្ចាស់កាស៊ីណូពិភពថ្មី ក្រុងបាវិត បាននាំបក្សពួកចំនួន០៣នាក់ គឺឈ្មោះ ថន ឈ្មោះរ៉ានិងឈ្មោះប្រុស ទៅលើកយកសម្ភារៈលក់ដូរនិងភេសជ្ជៈ ដូចជា ធុងទឹកកក ធំចំណុះ១០០លីត្រចំនួន ២-ធុងដាក់ទឹកកក ចំណុះ៦០លីត្រចំនួន១ និងភេសជ្ជៈក្នុងធុងមួយចំនួនទៀត ដែលជារបស់ប្រជាពលរដ្ឋលើកដាក់លើរទេះយកទៅស្នាក់ការកាស៊ីណូ ដោយសំអាងថា ឈ្មោះកុយ សុវណ្ណី ភេទស្រី អាយុ៤៨ឆ្នាំ ជនជាតិខ្មែរ មុខរបរលក់ដូរ ទៅលក់នៅចំណតរថយន្តរបស់គេហើយមិនព្រមបង់ប្រាក់ ទើបពួកគេរឹបយកសម្ភារ និងភេសជ្ជៈបែបនេះ។
បើតាមឈ្មោះកុយ សុវណ្ណី ភេទស្រី អាយុ៤៨ឆ្នាំ រស់នៅភូមិតាបិប សង្កាត់បាវិត ក្រុងបាវិត បានឲ្យដឹងថា គាត់ប្រកបមុខរបរលក់ភេសជ្ជៈនៅលើដីសាធារៈរបស់រដ្ឋខាងមុខច្រកទ្វាព្រំដែនអន្តរជាតិបាវិតយូរឆ្នាំមកហើយ លុះដល់ឆ្នាំ២០០៧ ឧកញ៉ាលី ប៉ោយូ ម្ចាស់កាស៊ីណូពិភពថ្មី បានវិនិយោគធ្វើចំណតរថយន្តដោយទទួលបាន
អាជ្ញាប័ណ្ណរយៈពេល៣០ឆ្នាំ «ពីឆ្នាំ២០០៧-ដល់ឆ្នាំ២០៣៧»។
កុយ សុវណ្ណី បន្តថា កាលពីឆ្នាំ២០១៧ គាត់បន្តប្រកបមុខរបរលក់ភេសជ្ជៈនេះ គ្មានអ្នកណាមកឲ្យបង់ប្រាក់ឡើយ រហូតដល់ឆ្នាំ២០១៩ក៏មានឈ្មោះ ស៊ូស៊ី កូនស្រីឧកញ៉ាលី ប៉ោយូ មកទាមទារបង់ប្រាក់ឲ្យពួកគេ ក្នុង១ខែ ៤០០ដុល្លារ រូបគាត់ពុំបានបង់ប្រាក់ឲ្យនោះទេ ពីព្រោះគាត់ប្រកបមុខរបរនៅលើដីសាធារណៈរបស់រដ្ឋ ជិតប៉ុស្តិ៍នគរបាលច្រកទ្វារព្រំដែនអន្តរជាតិបាវិត មិនមែនចំណតរថយន្តលោកឧកញ៉ាលី ប៉ោយូ ទេ។
ទាក់ទិនករណីនេះដែរ ក្រុមអ្នករត់តាក់ស៊ីវិញបានលើកឡើងថា បេនឡាន ក្រុងបាវិត គឺនៅខាងក្នុង លុះដល់ឆ្នាំ២០១២ ស្រាប់តែម្ចាស់បេន លោកឧកញ៉ាលី ប៉ោយូ បានសាងសង់អគារ ធ្វើផ្សាររាត្រី ធ្វើតូបជួល ទៅឲ្យជនបររទេស រហូតមកដល់ឆ្នាំ២០១៥ សង់អគារកាស៊ីណូ ផ្ទះជួលសងខាងនៅសល់ប្រឡោះកណ្តាលតូចប៉ុនថ្នល់ រហូតអស់ទីតាំងចំណតបេនឡាន ។
សព្វថ្ងៃ គឺអ្នកប្រកបមុខរបរត់តាក់ស៊ីត្រូវយកចិញ្ចើមផ្លូវសាធារណៈ ធ្វើចំណតតាក់ស៊ី ហើយកូនឧកញ៉ាលី ប៉ោយូ មកទារឱ្យបង់ថ្លៃបេនរថយន្ត១គ្រឿង១ម៉ឺនរៀលរាល់ថ្ងៃ សូមឲ្យអាជ្ញាធរ ក្រុងខេត្តមេត្តាចុះមកពិនិត្យមើលផង បេនឡានក្លាយជាអគារ កាស៊ីណូ ជួល ផ្ទះជួល តូបជួល ឲ្យជនបររទេសអស់ហើយ។ ជាពិសេស កូនស្រីរបស់លោកឧកញ៉ា កំពុងធ្វើភ្លៀងធ្វើផ្គរដល់ប្រជាពលរដ្ឋក្រុងបាវិតខ្លាំងណាស់ ។
ទាក់ទិនករណីនេះដែរ លោកឧកញ៉ាលី ប៉ោយូ បានបំភ្លឺថា គ្មានរឿងដូចការចោទប្រកាន់នោះទេ ការពិត គឺសន្តិសុខ និងកូនស្រីគាត់បានចុះទៅរៀបចំសណ្តាប់ធ្នាប់ផ្សារ ហើយបានឲ្យក្រុមអាជីវករដែលលក់ដូរតាមចិញ្ចើមថ្នល់ចូលក្នុងផ្សារក៏ប៉ុន្តែឈ្មោះកុយ សុវណ្ណី មិនព្រមចូល ទើបមានទំនាស់បែបនេះ ៕
ចែករំលែកព័តមាននេះ