ខេត្តបាត់ដំបង ៖ បុរសម្នាក់ត្រូវចរន្តអគ្គីសនីឆក់ស្លាប់ភ្លាមៗ ពេលកំពុងដើរស្រាវខ្សែម៉ូទ័រ ដែលគាត់តបូបទឹកលាងត្រីនៅក្បែរផ្ទះរបស់គាត់ កាលពីវេលាម៉ោង៩ព្រឹកថ្ងៃទី១២ តុលា ស្ថិតក្នុងភូមិពោធិ១ ឃុំគារ ស្រុកមោងឬស្សី។ មន្ត្រីកងរាជអាវុធហត្ថបានរាយការណ៍ថា ជនរងគ្រោះឈ្មោះរៀម សុខគា ភេទប្រុស អាយុ៣៦ឆ្នាំ មានមុខរបលក់ត្រី រស់នៅភូមិ ឃុំកើតហេតុខាងលើ។ មន្ត្រីដដែលបន្តថា អ្នកលក់ត្រីរូបនេះបានតខ្សែម៉ូទ័រដើម្បីបូមទឹកស្រះនៅក្បែរផ្ទះលាងត្រី ប៉ុន្តែទំនងកាន់ប៉ះចំតំណខ្សែភ្លើង ទើបត្រូវចរន្តភ្លើងឆក់បណ្ដាលឲ្យស្លាប់ភ្លាមៗតែម្ដង។
បើតាមការបំភ្លឺពីក្រុមគ្រួសារជនរងគ្រោះបាននិយាយថា ជនរងគ្រោះឈ្មោះ រៀម សុខគា បានយកម៉ូទ័រទៅបូបទឹកលាងត្រី នៅខាងក្រោយផ្ទះ ប៉ុន្តែក្រោយពីលាងត្រីរួច គាត់បានដើរស្រាវខ្សែភ្លើងទុកដាក់វិញ ក៏ស្រាប់តែត្រូវខ្សែចរន្តនោះឆក់សា្លប់តែម្ដង។ ប្រភពដដែលបញ្ជាក់ថា ពេលដែលគាត់ដើរស្រាវខ្សែនោះ គាត់មិនបានដកឌុយខ្សែរម៉ូទ័រទេ ហើយកាន់ប៉ះចំតំណខ្សែភ្លើងទើបត្រូវចរន្តភ្លើងឆក់បែបនេះ។ សមត្ថកិច្ចបានចុះទៅពិនិត្យសាកសពជនរងគ្រោះ និងកន្លែងកើតហេតុភ្លាមៗដែរ ក្រោយពីទទូលបាននូវព័ត៌នេះ។
មន្ត្រីជំនាញបាននិយាយដែរថា សាកសពជនរងគ្រោះពិតជាស្លាប់ដោយចរន្តអគ្គីសនីឆក់មែន ដែលផ្ដើមចេញពីការធ្វេសប្រហែស។ ក្រោយធ្វើការពិនិត្យរួចរាល់ តាមលក្ខណៈបច្ចេកទេស មន្ត្រីជំនាញបានធ្វើកំណត់ហេតុប្រគល់សាកសពជនរងគ្រោះឲ្យទៅក្រុមគ្រួសារធ្វើបុណ្យតាមប្រពៃណីហើយ៕
ចែករំលែកព័តមាននេះ