ខេត្តពោធិ៍សាត់ ៖ ខេត្តពោធិ៍សាត់ជាខេត្តស្ថិតនៅភាគពាយ័ព្យ មានចំងាយ១៨៦គីឡូម៉ែត្រពីរាជធានីភ្នំពេញ ។ ខេត្តនេះមានស្រុកចំនួន៦គឺស្រុកក្រគរ ភ្នំក្រវាញ បាកាន កណ្តៀង វាលវែង និងក្រុងពោធិ៍សាត់ ហើយសំបូរស្តុកស្តម្ភដោយសម្បត្តិធម្មជាតិមានភ្នំ ព្រៃឈើ ថ្មកែវ ទឹកធ្លាក់ ល្បាក់ទឹក ក្រវាញ និងបឹងទន្លេសាបដែលសំបូរត្រីទឹកសាបចំរុះ ។ នេះជាសក្តានុពលមួយនៃវិស័យទេសចរណ៍ ហើយរមណីយដ្ឋានធម្មជាតិជាច្រើនត្រូវបានបង្កើតឡើងដើម្បីបំរើការកំសាន្តរបស់ភ្ញៀវ ។
លោកញ៉ូវ សុង ប្រធានមន្ទីរទេសចរណ៍ឱ្យដឹងថា នៅខេត្តពោធិ៍សាត់មានកនែ្លងលេងកំសាន្តចំនួន១២ គឺរមណីយដ្ឋានធម្មជាតិទឹកធ្លាក់ច្រកល្អៀង ល្បាក់កំរោញ បូជនីយដ្ឋានវប្បធម៌ប្រវត្តិសាស្ត្រឧកញ៉ាឃ្លាំងមឿង សហគមន៍កំពង់ហ្លួង ទឹកជ្រោះអូរដា ភ្នំលាំងត្រាច ភ្នំបាយឃ្លះ ភ្នំបាក់ត្រា កោះថាស កោះសំពៅមាស ទំនប់ទឹកដំណាក់អំពិល និងទំនប់ឈើតោក ។ កន្លែងដែលគេនិយមទៅលេងខ្លាំងជាងគេ គឺរមណីយដ្ឋានទឹកធ្លាក់ច្រកល្អៀង កំពង់ហ្លួង កោះថាស កោះសំពៅមាស បូជនីយដ្ឋានឧកញ៉ាឃ្លាំងមឿង ល្បាក់កំរោញ ទំនប់ឈើតោក និងទំនប់ទឹកដំណាក់អំពិល ព្រោះនៅទីនោះមានទឹកជ្រោះ ម្លប់ព្រៃព្រឹក្សា ត្រឈឹងត្រឈៃ ជិះទូកកាណូតកំសាន្ត និងស្ពានយោល ។ ខេត្តពោធិ៍សាត់មានសណ្ឋាគារចំនួន៤ ផ្ទះសំណាក់ចំនួន១៧ ភោជនីយដ្ឋានចំនួន២៣ និងខារ៉ាអូខេចំនួន១៧ ។ ខណៈពេលដែលសណ្ឋាគារ ប៉ ជូ របស់លោកឧកញ៉ាទុយ គី ប្រធានសភាពាណិជ្ជកម្មខេត្តកំពស់៧ជាន់ស្មើជាង២០០បន្ទប់សាងសង់មិនទាន់រួច សព្វថ្ងៃនេះមានតែសណ្ឋាគារពោធិ៍សាត់ សេនជូរីទេដែលធំជាងគេមាន៥០បន្ទប់ ឯសណ្ឋាគារភ្នំពេជ្រមាន៣០បន្ទប់ ឋានសួគ៌ថ្មី៣០បន្ទប់ និងវិមានទិព្វ១៦បន្ទប់ ។ ចំពោះតំលៃមិនខុសគ្នាទេ គឺពី១២ដុល្លារទៅ១៥ដុល្លារក្នុងមួយយប់ ។
លោកប្រធានមន្ទីរទេសចរណ៍ខេត្តបញ្ជាក់ឱ្យដឹងថា តាមរយៈស្ថិតិរបស់សណ្ឋាគារ និងផ្ទះសំណាក់ក្នុងរយៈពេល៦ខែដើមឆ្នាំ២០១០នេះមានភ្ញៀវទេសចរបរទេសចូលមកទស្សនាខេត្តពោធិ៍សាត់សរុបចំនួន១.៤៩៩នាក់ ស្រី៥០៥នាក់ ក្នុងនោះមានភ្ញៀវមកពី២៩ប្រទេស ប៉ុន្តែភ្ញៀវដែលច្រើនជាងគេគឺជនជាតិបារាំង បន្ទាប់មកអូស្ត្រាលី និងអង់គ្លេសគឺស្មើនឹង១៧៣,៦៣% បើប្រៀបធៀបទៅនឹងឆ្នាំ២០០៩មានតែ៨៦៣នាក់ ។ ចំណែកភ្ញៀវទេសចរក្នុងស្រុកមាន២០២.៤៧៥នាក់ ស្មើនឹង១១៨,៦៦% បើប្រៀបធៀបទៅនឹងឆ្នាំ២០០៩ មានតែ១៧០.៦២៦នាក់ប៉ុណ្ណោះ ។ ក្នុងឆមាសទី១ ឆ្នាំ២០១០នេះមានគ្រោះថ្នាក់ចរាចរណ៍ក្នុងការដើរលេងកំសាន្តកន្លែងនានាក្នុងខេត្តសរុប១៥៧លើក បណ្តាលឱ្យស្លាប់៣៩នាក់ ស្រី៧នាក់ របួសធ្ងន់១៤៥នាក់ ស្រី៣៣នាក់ និងរបួសស្រាល៧៧នាក់ ស្រី២៥នាក់ ។
បច្ចុប្បន្នមន្ត្រីជំនាញបានសហការជំរុញគណៈកម្មការគ្រប់គ្រងរមណីយដ្ឋាន និងលើកផែនការរៀបចំទទួលភ្ញៀវឱ្យបានល្អ បើកកិច្ចប្រជុំណែនាំដល់ម្ចាស់បំរើវិស័យទេសចរណ៍ និងរមណីយដ្ឋានទេសចរណ៍ ព្រមទាំងបានជំរុញការផ្សព្វផ្សាយបន្ត«កម្ពុជាព្រះរាជាណាចក្រអច្ឆរិយៈ»និងចលនាប្រលងប្រណាំង «ទីក្រុងស្អាត រមណីយដ្ឋានស្អាត សេវាល្អ» ៕
ចែករំលែកព័តមាននេះ