រាជធានីភ្នំពេញ ៖ មួយរយៈចុងក្រោយនេះ កីឡាការិនីអេ យ៉ានុត ត្រូវគេឃើញប្រឹងប្រែងហ្វឹកហាត់ប្រដាល់យ៉ាងខ្លាំងនៅស្ដាតអូឡាំពិក ។ ក្នុងមួយថ្ងៃកីឡាការិនីរូបនេះហ្វឹកហាត់ច្រើនម៉ោង ជាពិសេសចាប់តាំងពីនាង
រាជធានីភ្នំពេញ ៖ មួយរយៈចុងក្រោយនេះ កីឡាការិនីអេ យ៉ានុត ត្រូវគេឃើញប្រឹងប្រែងហ្វឹកហាត់ប្រដាល់យ៉ាងខ្លាំងនៅស្ដាតអូឡាំពិក ។ ក្នុងមួយថ្ងៃកីឡាការិនីរូបនេះហ្វឹកហាត់ច្រើនម៉ោង ជាពិសេសចាប់តាំងពីនាងទំនេរពីការសិក្សាគេឃើញនាងប្រឹងប្រែងសំបើមណាស់ ដោយសារក្នុងពេលដ៏ខ្លីខាងមុខនេះ សហព័ន្ធកីឡាប្រដាល់កម្ពុជានឹងធ្វើការជម្រុះបេក្ខភាពជម្រើសជាតិជាថ្មីម្ដងទៀតទើបធ្វើឱ្យនាងមិនអាចប្រហែសបាន ។
ភរិយាលោកអេ ភូថង អ្នកស្រីសុម៉ាលី បានអះអាងថា អេ យ៉ានុត កូនស្រីសំណព្វចិត្តរបស់អ្នកស្រីបានក្លាយជាកីឡាការិនីជម្រើសជាតិផ្នែកប្រដាល់សាកលអាជីពប្រមាណជិតមួយឆ្នាំមកហើយដោយទទួលបានប្រាក់ខែជាប្រចាំផងដែរ ។ តាំងពីជាប់មក នាងចំណាយពេលស្ទើរទាំងស្រុងជាមួយការប្រដាល់ដោយសារតែភាពជាក់ស្ដែង គឺនាងមិនមែនចេញប្រកួតតែប្រភេទប្រដាល់សាកលនោះទេ ។ អ្នកស្រីបន្តថា អេ យ៉ានុត ទើបបញ្ចប់ការប្រកួតផ្នែកកីឡាយុទ្ធសិល្ប៍នៅក្នុងប្រទេសវៀតណាមមុននេះប៉ុណ្ណោះ បើទោះជាការប្រកួតនោះមិនមែនចំជាការប្រដាល់អាជីពក្ដី ។ អ្នកស្រីបញ្ជាក់ថា ការប្រដាល់មានការពាក់ព័ន្ធជាមួយល្បុក្កតោ ប៉ុន្តែមិនមានន័យថានាងក្រោយពីមិនបានប្រដាល់ ក៏ហក់ចូលអាជីពជាកីឡាការិនីផ្នែកល្បុក្កតោនោះទេ ។ ដ្បិតថា នាងទើបតែទទួលបានមេដាយប្រាក់ពីការប្រកួតល្បុក្កតោក្នុងព្រឹត្តិការណ៍កីឡាយុទ្ធសិល្ប៍របស់ប្រទេសវៀតណាម ប៉ុន្តែនាងមិនមានចំណូលចិត្តក្រៅពីអាជីពប្រដាល់សេរី និងសាកលដូចអ្វីដែលអ្នកស្រីបានដៅដូចគ្នានោះទេ។
អ្នកស្រីថា អេ យ៉ានុត ស្រឡាញ់តែអាជីពប្រដាល់តែមួយគត់ ជាក់ស្ដែងក្នុងពេលចូលកង នាងត្រូវចំណាយពេលកន្លះថ្ងៃហ្វឹកហាត់មិនដែលខានដើម្បីក្លាយខ្លួនជាធនធានសំខាន់នៅក្នុងព្រឹត្តិការណ៍ស៊ីហ្គេមពេលកម្ពុជាធ្វើជាម្ចាស់ផ្ទះ។ នាងបាន ជាប់ជាជម្រើសជាតិផ្នែកប្រដាល់សាកលប្រមាណជាងកន្លះឆ្នាំមកហើយដោយខាងសហព័ន្ធកំណត់ឱ្យហ្វឹកហាត់ជាប់លាប់ ដើម្បីប្រែក្លាយនាងពីអ្នកប្រដាល់សេរីឱ្យទៅជាអ្នកប្រដាល់សាកលអាជីពវិញ ។ មុនពេលវ៉ាកង អេ យ៉ានុត មានឱកាសទៅសាលាត្រឹមតែមួយពេលៗក្នុងម៉ោងរដ្ឋប៉ុណ្ណោះ ដោយមិនមានពេលវេលារៀនគួរក្រៅម៉ោងច្រើនទេដោយសារនៅថ្ងៃទី២៥ តុលា ខាងមុខនេះ នាងត្រូវត្រៀមខ្លួនចូលប្រកួតកីឡាជាតិក្នុងអាជីពជាអ្នកប្រដាល់សាកល ។ អ្នកស្រីរំពឹងថា កូនស្រីនឹងទទួលបានតំណែងជើងឯកក្នុងប្រភេទទម្ងន់ដែលខ្លួនប្រឹងប្រែង ដោយសារតែនាងក្នុងមួយរយៈចុងក្រោយនេះ គឺទៅហ្វឹកហាត់ និងដាក់សម្ពាធខ្លួនឯងជាមួយនឹងអាជីពប្រដាល់សាកលយ៉ាងខ្លាំង ដើម្បីត្រៀមខ្លួនចូលប្រកួតក្នុងព្រឹត្តិការណ៍កីឡាជាតិជាលើកដំបូងនៅក្នុងប្រទេសកម្ពុជា ។ អ្នកស្រីបន្តថា ក្រៅពីត្រូវត្រៀមខ្លួនក្នុងព្រឹត្តិការណ៍កីឡាជាតិ នាងក៏ស្ថិតក្នុងបេក្ខភាពប្រកួតយកតំណែងជម្រើសជាតិសម្រាប់ឆ្នាំទី២ផងដែរ ដោយនាងប្រឹងប្រែងហ្វឹកហាត់ក្នុងប៉ុន្មានសប្ដាហ៍ចុងក្រោយជាមួយសហព័ន្ធកីឡាប្រដាល់គឺដើម្បីបន្តតំណែងជាមួយនឹងតួនាទីនេះឯង ។
អ្នកស្រីនិយាយថា៖«យ៉ានុត រាល់ថ្ងៃវាភ័យតែរឿងអត់បានជាប់ជម្រើសជាតិបន្តទេ ទើបនាងខំហាត់ណាស់ដោយសូម្បីតែការហូបចុកក៏មានរបៀបរបបត្រឹមត្រូវដែរ ដើម្បីកុំឱ្យស្រក ឬឡើងទម្ងន់ខុសពី៥៤គីឡូក្រាមដែលខាងជម្រើសជាតិបានកំណត់ ។ នាងចង់ប្រដាល់មែនទែនអត់ដែលហ៊ានឈប់ទេ ព្រោះពេលជាប់ជម្រើសជាតិបានលុយប្រចាំខែក៏ច្រើនគួរសមដែរ តែសំខាន់នាងបានចូលប្រកួតនៅនេះនៅនោះខុសប្លែកពីមុន ទើបរាល់ថ្ងៃនាងភ័យតែរឿងធ្លាក់ពីតំណែងជម្រើសជាតិហ្នឹងទេ!» ។
អ្នកស្រីថា អេ យ៉ានុត រៀនថ្នាក់ទី១០នៅវិទ្យាល័យបាក់ទូក តែបើនិយាយពីការសិក្សា និងការហ្វឹកហាត់គឺនាងងាកមករកអាជីពកីឡាច្រើនជាងចាប់តាំងពីនាងក្លាយជា
ជម្រើសជាតិផ្នែក ប្រដាល់សាកល ។ យ៉ាងណាក៏ដោយអ្នកស្រីថា កូនស្រីរបស់ខ្លួនមិនអាចបោះបង់ចោលការសិក្សានោះទេ បើទោះជានាងស្រឡាញ់ងប់ងុលអាជីពកីឡាក្ដី។ អ្នកស្រីបានទាំងសម្រេចមិនឱ្យកូនស្រីចូលក្លិបផ្ទាល់ខ្លួនបង្វឹកសិស្សនោះផង ដើម្បីឱ្យនាងមានពេលគ្រប់គ្រាន់ក្នុងការត្រៀមខ្លួនសម្រាប់ព្រឹត្តិការណ៍កីឡាជាតិ និងដើម្បីប្រកួតប្រជែងបន្តតំណែងជាជម្រើសជាតិក្នុងឆ្នាំទី២ ។ អ្នកស្រីនៅតែរំពឹងថា អេ យ៉ានុត បន្តជាប់ជាកីឡាការិនីជម្រើសជាតិ ដោយសារតែប្រដាល់សាកលសម្រាប់ប្រភេទទម្ងន់៥៤គីឡូក្រាម មិនសូវមានកីឡាការិនីច្រើន ហើយម្យ៉ាងកូនស្រីរបស់អ្នកស្រីក៏បានប្រឹងប្រែងមិនមែនអាងតែខ្លួនល្បី និងមានសមត្ថភាពមិនសូវចូលក្លិបហ្វឹកហាត់នោះទេ៕
ចែករំលែកព័តមាននេះ