ស្ពានអាកាសថ្មើរជើងសន្ធរម៉ុក ស្ថិតក្នុងខណ្ឌទួលគោក គ្រោងនឹងសម្ពោធដាក់ឲ្យប្រើប្រាស់នៅពេលដ៏ខ្លីខាងមុខនេះ ខណៈដែលការដ្ឋានសាងសង់ស្ពានអាកាសថ្មើរជើងមួយនេះ បានស្ថាបនារួចរាល់
រាជធានីភ្នំពេញ ៖ ស្ពានអាកាសថ្មើរជើងសន្ធរម៉ុក ស្ថិតក្នុងខណ្ឌទួលគោក គ្រោងនឹងសម្ពោធដាក់ឲ្យប្រើប្រាស់នៅពេលដ៏ខ្លីខាងមុខនេះ ខណៈដែលការដ្ឋានសាងសង់ស្ពានអាកាសថ្មើរជើងមួយនេះ បានស្ថាបនារួចរាល់១០០%ហើយ ដើម្បីទុកឲ្យបងប្អូនប្រជាពលរដ្ឋ ពិសេសប្អូនៗ កូនក្មួយសិស្សានុសិស្សបានដើរឆ្លងកាត់ ដែលអាចកាត់បន្ថយបាននូវគ្រោះថ្នាក់ចរាចរណ៍។
ប្រធានមន្ទីរសាធារណការនិងដឹកជញ្ជូនរាជធានីភ្នំពេញ លោក សាំ ពិសិដ្ឋ បានឲ្យដឹងនៅព្រឹកថ្ងៃទី២៨ ខែមេសាថា ស្ពានអាកាសថ្មើរជើងសន្ធរម៉ុកនេះ ជាសមិទ្ធផលថ្មីមួយទៀតរបស់ឯកឧត្តម ឃួង ស្រេង អភិបាលរាជធានីភ្នំពេញ។
ការដ្ឋាននេះស្ថាបនាបានរួចរាល់១០០%ហើយ គ្រោងនឹងសម្ពោធដាក់ឲ្យប្រើប្រាស់នៅពេលដ៏ខ្លីខាងមុខនេះ ក្រោមអធិបតីភាពឯកឧត្តម ឃួង ស្រេង អភិបាលរាជធានីភ្នំពេញ ដើម្បីទុកឲ្យបងប្អូនប្រជាពលរដ្ឋ ពិសេសប្អូនៗ កូនក្មួយសិស្សានុសិស្សដើរឆ្លងកាត់ ព្រោះថាស្ពានថ្មើរជើងមួយនេះបានហោះលើមហាវិថីធំៗ២ខ្សែ និងនៅលើចំណុចប្រសព្វផ្លូវបែកជា៤ ដែលមានអ្នកដើរឆ្លងកាត់ច្រើន ។ ដោយមើលឃើញពីបញ្ហានេះ ទើបឯកឧត្តមអភិបាលរាជធានីភ្នំពេញ ណែនាំឱ្យស្ថាបនាស្ពានអាកាសថ្មើរជើងថ្មីនេះឡើង ។
យុវជនម្នាក់ឈ្នោះ ហ៊ុន ពេជ្រធន់នរៈ បានបង្ហាញពីការចាប់អារម្មណ៍ថា បន្ទាប់ពីមានស្ពានមួយនេះហើយ ពួកគេមានភាពងាយស្រួលក្នុងការធ្វើដំណើរឆ្លងកាត់ ដោយជួយកាត់បន្ថយនូវគ្រោះថ្នាក់ជាយថាហេតុ និងមិនបាច់រង់ចាំស្តុបមិនចំណាយពេលយូរដូចជាពេលដែលមិនទាន់មានស្ពានអាកាស ។
ជាមួយគ្នានេះ ប្រជាពលរដ្ឋក៏បានថ្លែងអំណរគុណរាជរដ្ឋាភិបាល និងគណៈអភិបាលរាជធានីភ្នំពេញ ដែលបានកសាង ស្ពានអាកាសនេះ ជាការជួយសម្រួលដល់ការធ្វើដំណើរនៅតំបន់នេះឲ្យកាន់តែមានភាពប្រសើរឡើង ។
សូមបញ្ជាក់ថា ស្ពានអាកាសថ្មើរជើងនៅមុខសាលាបឋមសិក្សាសន្ធរម៉ុក ត្រូវបានសាងសង់នៅលើចំណុចផ្លូវប្រសព្វទាំង៤ទិស គឺសាងសង់កាត់ទទឹងមហាវិថីម៉ៅសេទុង២ខ្សែ និងកាត់ទទឹងមហាវិថីកម្ពុជាក្រោម២ខ្សែ ដើម្បីបង្កលក្ខណៈងាយស្រួលដល់សិស្សានុសិស្សបានឆ្លងកាត់តាមស្ពាននេះដោយសុវត្ថិភាព ទោះពួកគេមកពីទិសខាងណាក៏ដោយ ។
មកដល់ពេលនេះ រាជធានីភ្នំពេញមានស្ពានអាកាសថ្មើរជើងចំនួន៤កន្លែងហើយ ក្នុងនោះរួមមាន នៅតំបន់ជម្ពូវ័ន ខណ្ឌពោធិ៍សែនជ័យ មានចំនួន២កន្លែង នៅតំបន់ភ្លើងស្តុបនាងគង្ហីងមាន១កន្លែង និងនៅផ្សារដើមគមាន១កន្លែងទៀត ដែលបានសម្ពោធដាក់ឲ្យប្រើប្រាស់ជាផ្លូវការកាលពីការចុងកក្កដា ឆ្នាំ២០២០កន្លងមកនេះ ក្រោមវត្តមានឯកឧត្តម ឃួង ស្រេង អភិបាលរាជធានីភ្នំពេញ ៕
ចែករំលែកព័តមាននេះ