ជនសង្ស័យពីរនាក់ ក្នុងនោះម្នាក់ជាបុគ្គលិកដឹកអីវ៉ាន់តាមអនឡាញឱ្យក្រុមហ៊ុនមួយ និងបក្សពួកបានធ្វើសកម្មភាពឆក់ទូរស័ព្ទពីយុវតីសិស្សសាលាម្នាក់ តែមិនបានសម្រេច បែរជាត្រូវជាប់ខ្នោះរបស់សមត្ថកិច្ច
ខេត្តកណ្តាល ៖ ជនសង្ស័យពីរនាក់ ក្នុងនោះម្នាក់ជាបុគ្គលិកដឹកអីវ៉ាន់តាមអនឡាញឱ្យក្រុមហ៊ុនមួយ និងបក្សពួកបានធ្វើសកម្មភាពឆក់ទូរស័ព្ទពីយុវតីសិស្សសាលាម្នាក់ តែមិនបានសម្រេច បែរជាត្រូវជាប់ខ្នោះរបស់សមត្ថកិច្ចក្រុងតាខ្មៅទៅវិញ ។ ហេតុការណ៌នេះបានកើតឡើងនៅថ្ងៃទី២៦ ខែមេសា ឆ្នាំ២០២២ វេលាម៉ោង១៣និង៣០នាទីនៅចំណុចរង្វង់មូលគល់ស្ពានព្រែកសំរោង ស្ថិតក្នុងភូមិព្រែកសំរោង១ សង្កាត់តាខ្មៅ ក្រុងតាខ្មៅ ខេត្តកណ្តាល ។
លោកវរសេនីយ៍ឯក យី វណ្ណដា អធិការនគរបាលក្រុងតាខ្មៅ បានប្រាប់ឱ្យដឹងថា ជនរងគ្រោះ២នាក់ ទី១-ឈ្មោះធី លីហួង ភេទស្រី អាយុ១៧ឆ្នាំ នៅភូមិលេខ៣ សង្កាត់ស្វាយរលំ ក្រុងតាខ្មៅ ខេត្តកណ្តាល រងរបួសប្រអប់ជើងខាងស្តាំ ។ ទី២-ឈ្មោះ យ៉ន កន្និកា ភេទស្រី អាយុ១៦ឆ្នាំ មានទីលំនៅភូមិក្បាលកោះ សង្កាត់កោះអន្លង់ចិន ក្រុងតាខ្មៅ ខេត្តកណ្តាល ជាសិស្សវិទ្យាល័យហ៊ុនសែនតាខ្មៅ របួសក្បាលជង្គង់ និងស្មាខាងស្តាំ ។ ពួកគេទាំង២នាក់ជាសិស្សវិទ្យាល័យ ហ៊ុន សែនតាខ្មៅ ។
ចំណែកជនសង្ស័យ២នាក់ គឺម្នាក់ឈ្មោះ ស្រ៊ាងវ៉ិនលី ភេទប្រុស អាយុ១៩ឆ្នាំ មានទីលំនៅភូមិស្រុកចេក ឃុំបឹងខ្យាង ស្រុកកណ្តាលស្ទឹង ខេត្តកណ្តាល មុខរបរជាអ្នកដឹកអីវ៉ាន់អនឡាញ និងម្នាក់ទៀតឈ្មោះ នឿន បញ្ញា ភេទប្រុស អាយុ២២ឆ្នាំ ជនជាតិខ្មែរ មានទីលំនៅភូមិខ្វាន់មាស ឃុំពត់ស ស្រុកបាទី ខេត្តតាកែវ មុខរបរមិនពិតប្រាកដ ។
លោកអធិការបានបញ្ជាក់ទៀតថា នៅវេលាកើតហេតុខាងលើ ខណៈជនរងគ្រោះទាំងពីរនាក់កំពុងតែជិះម៉ូតូទៅសាលារៀន ដល់ចំណុចខាងលើ ស្រាប់តែក្រុមជនសង្ស័យដែលជិះម៉ូតូតាមមកពីក្រោយដល់ទន្ទឹមពួកនាងបានធ្វេីសកម្មភាពឆក់យកទូរស័ព្ទរបស់ជនរងគ្រោះដែលទុកនៅក្នុងហោប៉ៅម៉ូតូខាងមុខ រួចជិះគេចខ្លួន ។
ភ្លាមៗនោះ យុវតីសិស្សសាលាបានស្រែកឆោឡោចោរៗ ហើយបានជិះម៉ូតូដេញតាមពីក្រោយរហូតដល់រោងចក្រដើមត្នោត ក៏បានបុកផ្តួលម៉ូតូចោរឆក់ពីក្រោយ បណ្តាលឱ្យដួលរងរបួសទាំងអស់គ្នាតែម្តង ហើយត្រូវបានប្រជាពលរដ្ឋ និងសមត្ថកិច្ចជួយអន្តរាគមន៍ឃាត់ចោរឆក់បានជាបន្តបន្ទាប់ រួចបញ្ជូនមកកាន់អធិការដ្ឋាននគរបាលក្រុងតាខ្មៅ ដើម្បីធ្វើការសាកសួរ និងកសាងសំណុំរឿងទៅតាមនីតិវិធី ៕
ចែករំលែកព័តមាននេះ