រាជធានីភ្នំពេញ ៖ អ្នកនាំពាក្យអង្គភាពព័ត៌មាន និងប្រតិកម្មរហ័ស នៃទីស្ដីការគណៈ រដ្ឋមន្ដ្រី ជាថ្មីម្ដងទៀត បានធ្វើការបដិសេធ ទាំងស្រុងនូវការផ្សាយព័ត៌មានតាម ASTV ថ្ងៃទី១៦ មិថុនា ឆ្នាំ២០១០ វេលាម៉ោង៩និង០៣នាទី ព្រឹក ដែលជាការអះអាងតាមរយៈ ព័ត៌មានគ្មានភាពច្បាស់លាស់ ផ្ដល់ឱ្យដោយក្រុមសន្ដិសុខជាតិថៃ ដែលផ្សាយថា ជំនួយការរដ្ឋមន្ដ្រីក្រសួងការបរទេសថៃបានអះអាងថា មេដឹកនាំអាវក្រហមពីររូប គឺលោក Arisman Phong Ruang Rong និងលោក Suphorn Athavong បានភៀសខ្លួនទៅនៅ ក្នុងកាស៊ីណូមួយ ក្នុងក្រុងប៉ោយប៉ែត ប្រទេសកម្ពុជា ។
អ្នកនាំពាក្យអង្គភាពព័ត៌មាន និងប្រតិកម្មរហ័ស នៃទីស្ដីការគណៈរដ្ឋមន្ដ្រីសូមធ្វើការក្រើនរំលឹកថា ជាថ្មីម្ដងទៀត កម្ពុជាស្នើសុំយ៉ាងទទូចដល់រដ្ឋាភិបាល និងបណ្ដាញព័ត៌មានថៃឱ្យបញ្ឈប់ជាបន្ទាន់ និងទាំងស្រុងនូវ ចរិតបង្កហេតុក្នុងការផ្សព្វផ្សាយព័ត៌មាន ដែលមិនមានមូលដ្ឋានច្បាស់លាស់របៀបនេះ ព្រោះវាបណ្ដាលឱ្យមានការយល់ច្រឡំពីសំណាក់មតិសាធារណជន ក្នុង និងក្រៅប្រទេស ហើយធ្វើឱ្យទំនាក់ទំនងទ្វេភាគីដ៏ល្អ រវាងប្រទេសទាំងពីរធ្លាក់ក្នុងសភាពគ្រោះថ្នាក់ ៕
ចែករំលែកព័តមាននេះ