ចិន ៖ ទោះបីជាមិនមានការជំទាស់ ចំពោះទង្វើមិនសមរម្យមួយចំនួននៅកន្លែងធ្វើការក៏ដោយ ក៏មិនមានន័យថា ទង្វើនោះសមស្របដែរ ។ ការបំពានទៅលើផ្លូវភេទនៅកន្លែងធ្វើការ គឺជាបទល្មើសមួយ ដែលបានកើតឡើងយ៉ាងញឹកញាប់ ជាពិសេសគឺកើតឡើង ដោយអ្នកមានឋានៈខ្ពស់ ទៅរំលោភលើកូនចៅរបស់ខ្លួន ។
ជាក់ស្តែង ថៅកែក្រុមហ៊ុនស្រាបៀរមួយកន្លែងនៅទីក្រុងប៉េកាំង បានចេញច្បាប់ទម្លាប់ក្នុងក្រុមហ៊ុនរបស់ខ្លួន ដែលតម្រូវឱ្យបុគ្គលិកស្រីៗ មកបឺតមាត់ខ្លួនរាល់ព្រឹកនៅចន្លោះពីម៉ោង០៩ ដល់០៩កន្លះ ។
ការធ្វើបែបនេះ គឺក្នុងគោលបំណងបង្កើនចំណងមិត្តភាពក្នុងការងារ ។ ថៅកែបានប្រាប់ថា គាត់យករបៀបរបបនេះ មកពីសហរដ្ឋអាមេរិក ហើយគាត់ពិតជាឃើញថា បុគ្គលិករបស់គាត់មានការសហការគ្នាជាងមុនមែន ។
ប៉ុន្តែនៅពេលដែលមានការលេចវីឌីអូថតពីសកម្មភាពបឺតមាត់គ្នារវាងថៅកែ និងបុគ្គលិកបែបនេះ អ្នកទស្សនាជាច្រើនមានការស្រឡាំងកាំងយ៉ាងខ្លាំង ហើយបានហៅវាថា ជាការបៀតបៀនផ្លូវភេទ ។
ចែករំលែកព័តមាននេះ