WHO ៖ ឥឡូវនេះ ប្រទេសជប៉ុន និងកាណាដា ប្រកាសរកឃើញករណីជំងឺរលាកថ្លើមដ៏អាថ៌កំបាំង ចំពោះកុមារ នៅពេលដែលការរីករាលដាលជាសកលដល់ទៅ ១៤ប្រទេសហើយ នេះបើយោងតាមសារព័ត៌មាន dailymail របស់អង់គ្លេស ។
ទីភ្នាក់ងារសុខភាពសាធារណៈរបស់ប្រទេសកាណាដា កាលពីថ្ងៃទី២៦ មេសា ២០២២ បានបង្ហាញថា ពួកគេបាន ‘ដឹងពីរបាយការណ៍នៃជំងឺរលាកថ្លើមធ្ងន់ធ្ងរ ដែលមិនស្គាល់ប្រភពដើម’ នៅក្នុងប្រទេស ហើយកំពុងស៊ើបអង្កេតបន្ថែមទៀត ដើម្បីកំណត់ថា តើវាទាក់ទងដូចនឹងករណីនៅចក្រភពអង់គ្លេស និងសហរដ្ឋអាមេរិកដែរ ឬទេ ?
យ៉ាងណា ប្រទេសកាណាដា មិនបានបង្ហាញពីចំនួនពិតប្រាកដ នៃករណីជំងឺរលាកថ្លើមធ្ងន់ធ្ងរ ដែលបានរកឃើញលើកុមារនោះទេ ។
ចំណែកឯ ក្រសួងសុខាភិបាលរបស់ប្រទេសជប៉ុន ក៏បានប្រកាសដែរថា អ្នកជំងឺអាយុក្រោម ១៦ឆ្នាំម្នាក់ ត្រូវចូលសម្រាកព្យាបាលនៅមន្ទីរពេទ្យ កាលពីថ្ងៃទី២១ ខែមេសា ដោយថ្លើមរលាកធ្ងន់ធ្ងរ ។
ជំងឺរលាកថ្លើមដ៏អាថ៌កំបាំងនេះ គេប្រទះឃើញជាលើកដំបូងកាលពីខែតុលាឆ្នាំមុន ក្នុងប្រទេសស្កុតឡែន បន្ទាប់មកនៅក្នុងចក្រភពអង់គ្លេស និងសហរដ្ឋអាមេរិក ។
កាលពីថ្ងៃទី០៥ ខែមេសា ចក្រភពអង់គ្លេស បានរាយការណ៍ពីការកើនឡើង ដែលមិននឹកស្មានដល់ នៃជំងឺរលាកថ្លើមធ្ងន់ធ្ងរ និងស្រួចស្រាវ ដែលប្រភពដើមមិនស្គាល់ ចំពោះកុមារតូចៗ ដែលអាយុក្រោម១០ឆ្នាំ ដែលពួកគេពីមុនមក មានសុខភាពល្អធម្មតា ។
ចាប់តាំងពីពេលនោះមក ការកើនឡើង នៃករណីថ្មី ត្រូវបានគេរាយការណ៍ទៅអង្គការសុខភាពពិភពលោក (WHO) ថាមានចំនួន ១៤ប្រទេសហើយ និងកុមារសរុបជិត ២០០នាក់ បានធ្លាក់ខ្លួនឈឺដោយសារជំងឺនេះ ។
WHO បាននិយាយថា កុមារដែលរងផលប៉ះពាល់មានអាយុចាប់ពី មួយខែ ដល់អាយុ ១៦ឆ្នាំ ។ ក្នុងចំណោមនោះ មានកុមារម្នាក់បានស្លាប់ និងកុមារប្រហែល ១០% ត្រូវការប្តូរថ្លើម ។
គ្រូពេទ្យមានការងឿងឆ្ងល់ចំពោះអ្វីដែលបណ្តាលឲ្យមានការរលាកថ្លើមធ្ងន់ធ្ងរខាងលើនេះ ព្រោះថា ជាធម្មតាជំងឺរលាកថ្លើម បង្កឡើងដោយមេរោគថ្លើមប្រភេទ A, B, C, D និង E ។ ខណៈដែលអ្នកជំនាញផ្នែកសុខភាពជឿជាក់ថា ជំងឺនេះអាចបង្កឡើងដោយមេរោគ adenovirus ដែលជាធម្មតាវាធ្វើឲ្យកើតជំងឺផ្តាសាយ ។
មន្ត្រីសុខាភិបាលចក្រភពអង់គ្លេស ធ្លាប់បានច្រានចោលផងដែរថា វ៉ាក់សាំងការពារជំងឺកូវីដ-១៩ ជាមូលហេតុដែលអាចកើតមាន ។ ព្រោះថា មិនមានកុមារអង់គ្លេសណាម្នាក់ ដែលមានជំងឺនេះ បានចាក់វ៉ាក់សាំងកូវីដ-១៩ទេ ដោយសារតែពួកគេនៅក្មេងនៅឡើយ ។
លោកស្រីសាស្ត្រាចារ្យ Deirdre Kelly អ្នកឯកទេសខាងជំងឺថ្លើម នៅមន្ទីរពេទ្យ Birmingham បានប្រាប់ថា ឪពុកម្តាយមិនគួរព្រួយបារម្ភអំពីជំងឺដែលប៉ះពាល់ដល់កូនរបស់ពួកគេនោះទេ គួរតែអនុវត្តតាមពិធីការអនាម័យធម្មតា ជាមួយនឹងការលាងដៃឲ្យបានល្អ។
អ្នកជំនាញផ្នែកថ្លើមរូបនេះ និយាយថា ៖ «ការរីករាលដាល នៃជំងឺរលាកថ្លើមស្រួចស្រាវ គឺពាក់ព័ន្ធ ប៉ុន្តែភាគរយដែលប៉ះពាល់ គឺមានតិចតួចបំផុត នៃកុមារអាយុក្រោម១០ឆ្នាំ ។ ៩០ភាគរយ នៃកុមារដែលរងផលប៉ះពាល់ បានជាសះស្បើយដោយឯកឯង ។ ហើយកុមារពីរបីនាក់ ដែលមានការខូចខាតថ្លើមធ្ងន់ធ្ងរ ត្រូវបានប្តូរដោយជោគជ័យ នៅចក្រភពអង់គ្លេស» ៕
ចែករំលែកព័តមាននេះ