ប្រទេសកូរ៉េខាងត្បូង និងសហរដ្ឋអាេមរិក កាលពីថ្ងៃទី៣ មីនា បានចាប់ផ្តើមការចរចាជុំទី២ ស្តីអំពីការបន្តសន្ធិសញ្ញាកិច្ចសហប្រតិបត្តិការនុយក្លែអ៊ែរ ដែលនឹងផុតកំណត់នៅខែមីនា ឆ្នាំ២០១៤ខាងមុខ ។ ការចរចានេះធ្វើឡើងរវាងលោក Robert Einhorn ទីប្រឹក្សាពិសេសក្រសួងការបរទេសសហរដ្ឋអាមេរិក ទទួលបន្ទុកកិច្ចការមិនរីកសាយនុយក្លេអ៊ែរ និងផ្នែកគ្រប់គ្រងអាវុធ និងសមភាគីកូរ៉េខាងត្បូង លោក Cho Hyun អតីតអនុរដ្ឋមន្ត្រីការបរទេសទទួលបន្ទុកកិច្ចការពហុភាគី និងកិច្ចការជាសាកល ។
សន្ធិសញ្ញា ឬកិច្ចព្រមព្រៀងនុយក្លេអែ៊ររវាងកូរ៉េខាងត្បូង និងសហរដ្ឋអាមេរិក ដែលចុះហត្ថលេខាកាលពីឆ្នាំ១៩៧៤ ហាមប្រាមកូរ៉េខាងត្បូងមិនឱ្យកែច្នៃឡើងវិញនូវប្រេងពីរោងចក្រនុយក្លេអ៊ែរស៊ីវិល ។
កូរ៉េខាងត្បូងបានស្វះស្វែងរកមធ្យោបាយកែលំអឡើងវិញនូវខទាំងឡាយនៃកិច្ចព្រមព្រៀងនោះខណៈពេលដែលកន្លែងស្តុករបស់ខ្លួនសម្រាប់កាកសំណល់ប្រេងពីរោងចក្រថាមពលនុយក្លេអ៊ែរស៊ីវិល ត្រូវបានរំពឹងថា នឹងមានសមត្ថភាពកែច្នៃនៅឆ្នាំ២០១៦ ខាងមុខនេះ។
នៅក្នុងកិច្ចចរចាជុំទី១ ដែលរៀបចំឡើងកាលពីខែតុលា ឆ្នាំ២០១០កន្លងមក សហរដ្ឋអាេមរិក និងកូរ៉េខាងត្បូងបានឯកភាពគ្នាបើកការស្រាវជ្រាវរួមគ្នាដើម្បីឆ្លើយតបតាមការទាមទាររបស់ក្រុងសេអ៊ូល សម្រាប់ការប្រកាន់យកបច្ចេកទេសកែច្នៃមួយ ដែលត្រូវបានគេចាត់ទុកថា ជាបច្ចេកទេសមិនសូវរីកសាយនុយក្លេអ៊ែរ ។
ទីភ្នាក់ងារព័ត៌មានកូរ៉េខាងត្បូងយ៉ុនហាប់ បានដកស្រង់សម្តីមន្ត្រីក្រសួងការបរទេសកូរ៉េខាងត្បូង ដែលនិយាយថា នៅក្នុងការចរចាថ្ងៃនេះយើងមានផែនការវាយតម្លៃលទ្ធផលនៃការចរចាជុំទី១ ហើយយើងក៏មានផែនការពិភាក្សាគ្នាពីមធ្យោបាយដើម្បីជម្រុញកិច្ចសហប្រតិបត្តិការផ្នែកឧស្សាហកម្មសម្រាប់ប្រទេសទាំង២៕
ចែករំលែកព័តមាននេះ