«Reuter» បានផ្សាយតាមរបាយការណ៍របស់ផ្នែកឧតុនិយមជប៉ុនថា ភ្នំភ្លើង «ASO» ស្ថិតនៅកោះ Kyunshu ភាគខាងត្បូងប្រទេស បានផ្ទុះកាលពីយប់ថ្ងៃទី៨ តុលា ២០១៦ ដោយបាញ់ផ្សែងក្នុងកម្ពស់ប្រហែល១១គីឡូម៉ែត្រទៅលើលំហអាកាស ។ ក្នុងស្ថានភាពបែបនេះ អាជ្ញាធរបានប្រកាសអាសន្ននៅទីប្រជុំជនឱ្យមានការប្រុងប្រយ័ត្នកម្ទេចថ្ម និងផ្សែង ។
«ASO» ជាភ្នំភ្លើងមានកម្ពស់១.៥៩២ ម៉ែត្រ ស្ថិតនៅខេត្តគូម៉ាម៉ូតូ បានផ្ទុះជាលើកដំបូងនៅឆ្នាំ១៩៨០ ឬប្រហែល៣៦ឆ្នាំមុន ខណៈពេលអាជ្ញាធរបានប្រកាសអាសន្នឱ្យពលរដ្ឋកុំចូលក្បែរភ្នំភ្លើង និងត្រូវប្រុងប្រយ័ត្នខ្លាចកម្ទេចថ្ម និងផ្សែងធ្លាក់ទៅលើស្រុកទាំង១០ ស្ថិតនៅជុំវិញ ។
រូបភាពតាមទូរទស្សន៍នានារបស់ជប៉ុនបង្ហាញឱ្យឃើញផ្សែងធូលីភ្នំភ្លើងគ្របដណ្តប់លើរថយន្ត ផ្ទះ និងផ្លូវថ្នល់ ហើយកម្ទេចផេះបានរសាត់អណ្តែតក្នុងរយៈចម្ងាយជាង៣២០គីឡូម៉ែត ។ បច្ចុប្បន្នមិនទាន់មានរបាយការណ៍បញ្ជាក់ពីគ្រោះថ្នាក់ និងរបួសដល់ពលរដ្ឋនៅឡើយទេ ។ ក្រុមហ៊ុន «Kyushu Electric Power Co» បញ្ជាក់ថា ការផ្ទុះភ្នំភ្លើងនេះប៉ះពាល់ដល់រោងចក្រនុយក្លេអែ៊រអគ្គិសនីរបស់ពួកគេដែលនៅឆ្ងាយពីភ្នំភ្លើងប្រហែល១៦០គីឡូម៉ែត្រ និងជាផ្នែកមួយនៃចង្ក្រានផលិតចរន្តរបស់ជប៉ុន ៕
ចែករំលែកព័តមាននេះ