វិញ្ញាសាថ្មី ហែលទឹកជើងទា ជាគោលដៅសម្រាប់ដណ្ដើមមេដាយពីស៊ីហ្គេមនៅវៀតណាម
រាជធានីភ្នំពេញ ៖ សហព័ន្ធខ្មែរកីឡាហែលទឹក កំពុងតែបង្កើនការហ្វឹកហាត់យ៉ាងខ្លាំងលើវិញ្ញាសាថ្មីគឺហែលទឹកជើង
រាជធានីភ្នំពេញ ៖ សហព័ន្ធខ្មែរកីឡាហែលទឹក កំពុងតែបង្កើនការហ្វឹកហាត់យ៉ាងខ្លាំងលើវិញ្ញាសាថ្មីគឺហែលទឹកជើងទា(Fin Swimminjg)ទៅដល់កីឡាករ កីឡាការិនីជម្រើសជាតិរបស់ខ្លួនចំនួន៦នាក់ ដើម្បីត្រៀមដណ្ដើមយកមេដាយពីការប្រកួតកីឡាស៊ីហ្គេមលើកទី៣១ឆ្នាំ២០២២នៅប្រទេសវៀតណាម ។ នេះបើតាមការលើកឡើងរបស់លោក ហែម គីរី អគ្គលេខាធិការសហព័ន្ធខ្មែរកីឡាហែលទឹក ។
លោក ហែម ថុនពន្លឺ គ្រូបង្វឹកកីឡាហែលទឹកជើងទាបានឱ្យដឹងថា វិញ្ញាសាថ្មីហែលទឹកជើងទា នេះទាមទារឱ្យមានការហ្វឹកហាត់ខ្លាំងពេញមួយថ្ងៃតែម្ដង គឺព្រឹក៣ម៉ោង ល្ងាច៣ម៉ោង ។ ចំពោះលក្ខណៈបច្ចេកទេសហ្វឹកហាត់វិញមានបែងចែកជាពីរគឺ ទី១ហែលជាលក្ខណៈBi Fin ដោយហែលលក្ខណៈសេរីពាក់បំពង់ មិនអនុញ្ញាតឱ្យងើបមុខនោះទេ ។
ទី២ហែលជាលក្ខណៈSurfaceត្រូវបំពាក់ជើងទាធំដូចកន្ទុយត្រី មិនតម្រូវឱ្យហែលនោះទេគឺគោះជើងសុទ្ធ និងមានពាក់បំពង់ដកដង្ហើមដូចគ្នា ។ គ្រូបង្វឹករូបនេះបានបន្តឱ្យដឹងទៀតថាFin Swimmingជាវិញ្ញាសាថ្មីបំផុតសម្រាប់កម្ពុជា ឯការហ្វឹកហាត់គឺជួបការលំបាកខ្លាំងមិនដូចហែលទឹកធម្មតានោះទេ ។ កីឡាករ កីឡាការិនីត្រូវប្រើជើងគោះទឹករាល់ថ្ងៃរហូតដល់ថ្នាក់មានរលាត់ស្បែកជើងដោយសារតែពាក់ជើងទាច្រើនពេក ។ រីឯសម្ភារហ្វឹកហាត់វិញក៏នៅមានការខ្វះខាត ដោយសារតែការបញ្ជាទិញជើងទាមិនទាន់មកដល់ ។ ប៉ុន្តែបច្ចុប្បន្នយើងទទួលបានការឧបត្ថម្ភសម្ភារជើងទាBi Finនេះចំនួន៥គូពីសហព័ន្ធកីឡាហែលទឹកសិង្ហបូរី។ ដោយឡែកសម្ភារSurFaceអត់ទាន់មាននោះទេ។
លោក ហែម ថុនពន្លឺ បញ្ជាក់ថា សម្រាប់ត្រៀមប្រកួតកីឡាស៊ីហ្គេមនៅប្រទេសវៀតណាមគឺក្រុមកីឡាហែលទឹកកម្ពុជានៅសល់ពេលហ្វឹកហាត់ត្រឹមតែជាង៣០ថ្ងៃទៀតប៉ុណ្ណោះ វាជារយៈពេលដ៏ខ្លីបំផុត។ ដោយសារតែវាជាវិញ្ញាសាថ្មីបំផុត ដូច្នេះគ្រូបង្វឹកនៅមិនទាន់មានបទពិសោធន៍គ្រប់គ្រាន់ក្នុងការបង្ហាត់ មានតែខិតខំសិក្សាស្រាវជ្រាវស្វែងរកគន្លឹះថ្មីៗមកបង្ហាត់ដល់កូនក្រុមប៉ុណ្ណោះ ។
ទោះបីនេះជាវិញ្ញាសាថ្មីសម្រាប់កម្ពុជា ដែលនឹងត្រូវចូលរួមប្រកួតប្រជែងលើកដំបូងនៅស៊ីហ្គេមប្រទេសវៀតណាម ក៏ប៉ុន្តែគ្រូបង្វឹកហែលទឹកជើងទាកម្ពុជារូបនេះ បានដាក់ក្ដីរំពឹងខ្ពស់ថា ពួកគេពិតជាធ្វើបានលទ្ធផលល្អ ហើយក៏ជាឆ្នាំដែលត្រូវវាស់ស្ទង់កម្រិតបច្ចេទេសសម្រាប់ត្រៀមប្រកួតកីឡាស៊ីហ្គេមលើកទី៣២ឆ្នាំ២០២៣ដែលកម្ពុជាទទួលធ្វើជាម្ចាស់ផ្ទះផងដែរ ។ ចំពោះកីឡាករ កីឡាការិនីជម្រើសជាតិហែលទឹកជើងទាទាំង៦នាក់ មានកីឡាករចំនួន៤នាក់គឺកីឡាករលឹម កែវឧត្តម,កីឡាករលឹម សុខវឌ្ឍន៍នន្ទ,កីឡាករទួន ទិត្យសត្យា និងកីឡាករឆោម ច័ន្ទថុន និងកីឡាការិនីពីររូបទៀតគឺកាំង ម៉ុយនីន និងឃឺន ប៊ុនពេជ្រមរកត ៕
ចែករំលែកព័តមាននេះ