ក្រុមចោរចំនួន៣នាក់បានធ្វើសកម្មភាពកាច់.កម៉ូតូពីប្រជាពលរដ្ឋបានសម្រេចហើយ តែត្រូវបានម្ចាស់ម៉ូតូឃើញទាន់ និងស្រែកថា «ចោរៗ» ព្រមទាំងដេញតាមចាប់បានម្នាក់ និង
ខេត្តកណ្តាល ៖ ក្រុមចោរចំនួន៣នាក់បានធ្វើសកម្មភាពកាច់.កម៉ូតូពីប្រជាពលរដ្ឋបានសម្រេចហើយ តែត្រូវបានម្ចាស់ម៉ូតូឃើញទាន់ និងស្រែកថា «ចោរៗ» ព្រមទាំងដេញតាមចាប់បានម្នាក់ និងរត់គេចខ្លួន២នាក់ ។ ហេតុការណ៍នេះ បានកើតឡើងនៅថ្ងៃទី២៥ ខែមេសា ឆ្នាំ២០២២ វេលាម៉ោង០៩និង៣០នាទីព្រឹក ថ្ងៃទី២៥ ខែមេសា ឆ្នាំ២០២២ ចំណុចមុខផ្ទះជួល ស្ថិតក្នុងភូមិព្រៃរការ ឃុំឆក់ឈើនាង ស្រុកឣង្គស្នួល ខេត្តកណ្តាល។
បើតាមសមត្ថកិច្ចបានអោយដឹងថា ជនរងគ្រោះខាងលើឈ្មោះ សុត លក្ខិណា ឣាយុ២២ឆ្នាំ មុខរបរកម្មការិនី ស្នាក់នៅភូមិព្រៃរការ ឃុំឆក់ឈើនាង ស្រុកឣង្គស្នួល ខេត្តកណ្តាល។ ចំណែកជនសង្ស័យឈ្មោះ ទៀង តុល ភេទប្រុស ឣាយុ៥០ឆ្នាំ មុខរបរមិនពិតប្រាកដ មាន ស្រុកកំណើតភូមិត្រពាំងថ្លាន់ ឃុំឃុំប្របភ្នំ ស្រុកឣង្គរជ័យ ខេត្តកំពត នឹងទើបត្រឡប់មកពីថៃ កាលពីថ្ងៃទី២៤ ខែមេសា ឆ្នាំ២០២២ ហើយក៏បានមកស្នាក់នៅសង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ បាន០១យប់ (ជាឣ្នកធ្វើសកម្មភាពកាច់.កម៉ូតូ)។ ចំណែកជនសង្ស័យចំនួន២នាក់ទៀតរត់គេចខ្លួនបាត់ស្រមោល ។
សមត្ថកិច្ចបន្តថា មុនពេលកើតហេតុ ជនរងគ្រោះបានទុកម៉ូតូនៅមុខបន្ទប់ជួល លុះរហូតដល់ម៉ោងកើតហេតុ ស្រាប់តែលេចមុខជនសង្ស័យមានគ្នា០៣នាក់ជិះម៉ូតូ០២គ្រឿង ហើយក្នុងចំណោមនោះជនសង្ស័យម្នាក់ឈ្មោះ ទៀង តុល បានចូលមកធ្វើសកម្មភាពកាច់.កម៉ូតូរបស់ជនរងគ្រោះ ។
សមត្ថកិច្ចបន្តទៀតថា ក្រោយពេលធ្វើសកម្មភាពបានសម្រេច ជនសង្ស័យរូបនេះក៏បានបើកម៉ូតូជនរងគ្រោះចេញ តែត្រូវជនរងគ្រោះឃើញទាន់ក៏បានស្រែកថា «ចោៗ» បានធ្វើឱ្យផ្អើលប្រជាពលរដ្ឋជួយដេញតាមបានចម្ងាយប្រហែល៥០ម៉ែត្រ ជនសង្ស័យក៏បានផ្តួលម៉ូតូជនរងគ្រោះចោល រួចរត់ឡើងម៉ូតូរបស់បក្សពួករបស់ខ្លួន ប៉ុន្តែម៉ូតូនោះក៏ដួលតែម្តង បន្ទាប់មកជនសង្ស័យរូបនេះក៏រត់គេចខ្លួនចូលបឹងតែម្តង ចំណែកឯជនសង្ស័យ០២នាក់ទៀតបានបើកម៉ូតូរត់គេចខ្លួនបាត់ស្រមោល។
ក្រោយពីទទួលបានព័ត៌មានភ្លាម កម្លាំងនគរបាលស្រុក និងប៉ុស្ដិ៍ឆក់ឈើនាង បានសហការជាមួយកម្លាំងអាវុធហត្ថស្រុក ចុះទៅដល់កន្លែងកើតហេតុ ហើយក៏យកបានម៉ូតូរបស់ជនសង្ស័យ០១គ្រឿង បន្ទាប់មកកម្លាំងនគរបាលស្រុកឣង្គស្នួលក៏ធ្វើការឡោមព័ទ្ធទីតាំងបឹងនោះ ហើយក៏ឃាត់ខ្លួនជនសង្ស័យបានម្នាក់។
ក្រោយពេលឃាត់ខ្លួន ជនសង្ស័យរូបនេះក៏បានឆ្លើយសារភាពថា ខ្លួនពិតជាបានធ្វើសកម្មភាពកាច់.កលួចយកម៉ូតូជនរងគ្រោះពិតប្រាកដមែន។ ចំពោះករណីខាងលើនេះ កម្លាំងជំនាញកំពុងកសាងសំណុំរឿងតាមនីតិវិធីច្បាប់ហើយ។
ចែករំលែកព័តមាននេះ