ខេត្តបន្ទាយមានជ័យ ៖ ក្មេងប្រុសអាយុ១៣ឆ្នាំឈ្មោះយ៉ាវ ពិការពីកំណើត រស់នៅភូមិកណ្តាល ឃុំសំរោង ស្រុកអូរជ្រៅ ដោយមានក្តីអាណិតអាសូរ នៅរសៀលថ្ងៃទី០៧ ខែតុលា ឆ្នាំ២០១៦ លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ បាននាំយករទេះសម្រាប់បម្រើឲ្យជនពិការទៅប្រគល់ឲ្យ។
នៅពេលដែលលោកឧត្តមសេនីយ៍ទោ អាត់ ខែម បាននាំយកអំណោយជារទេះនេះ គឺឪពុកក្មេងប្រុសរូបនេះ មិនបាននៅផ្ទះទេ ដោយរវល់ទៅដើរស៊ីឈ្នួលគេ គឺនៅតែអ្នកជិតខាងមកចូលរួម។
លោកឧត្តមសេនីយ៍ទោ អាត់ ខែម បានឲ្យដឹងថា ដោយមានក្តីអាណិតអាសូរទៅលើក្មេងប្រុសឈ្មោះយ៉ាវ អាយុ១៣ឆ្នាំ ពិការតាំងពីកំណើត ម្យ៉ាងបញ្ហាជីវភាពមានការលំបាក ឪពុកដើរស៊ីឈ្នួលគេ ហើយនឹងមានបំណងចង់ឲ្យក្មេងប្រុសម្នាក់នេះ អាចធ្វើដំណើរទៅសាលាបាន លោកបាននាំយករទេះ សម្រាប់ជនពិការ១គ្រឿងជាអំណោយលោកផ្ទាល់មកប្រគល់ឲ្យក្មេងប្រុសម្នាក់នេះ គ្រាន់គ្នាបានធ្វើដំណើរទៅណាមកណាបានដោយខ្លួនគេ។
បើតាមការឲ្យដឹងពីអ្នកជិតខាងនិយាយថា ក្នុងជីវភាពក្រុមគ្រួសារនេះ គឺជួបបញ្ហាលំបាក ម្តាយបានរត់ចោលតាំងពីពួកគេនៅតូចៗ។ បច្ចុប្បន្នរស់នៅជាមួយឪពុក មានបងប្អូនចំនួន៣នាក់ ក្មេងប្រុសនេះជាកូនទី២ ។ សព្វថ្ងៃឪពុកដើរស៊ីឈ្នួលគេ គ្រាន់បានកំរ៉ៃបន្តិចបន្តួចយកមកចិញ្ចឹមកូនទាំង៣ ។ ជាមួយគ្នានោះដែរ ប្រជាពលរដ្ឋក្នុងនាមអ្នកជិតខាងជំនួសឲ្យឪពុកក្មេងពិការនេះ ក៏សូមថ្លែងអំណរគុណចំពោះលោកឧត្តមសេនីយ៍ស្នងការ ដែលបានផ្តល់នូវរទេះពិការដល់ក្មេងប្រុសឈ្មោះយ៉ាវ នេះដែរ៕
ចែករំលែកព័តមាននេះ