អគ្គិភ័យ២កន្លែង នៅទីតាំងស្តុកប្រេង និងឃ្លាំងអាវុធរបស់រុស្ស៊ី នៅជិតព្រំដែនអ៊ុយក្រែន
ម៉ូស្គូ ៖ ទីភ្នាក់ងារព័ត៌មានរុស្ស៊ី បានគេរាយការណ៍ថា អគ្គិភ័យដ៏ធំ ចំនួន២ បានកើតឡើងនៅព្រឹកថ្ងៃចន្ទ ទី២៥ ខែមេសា ឆ្នាំ២០២២…
ម៉ូស្គូ ៖ ទីភ្នាក់ងារព័ត៌មានរុស្ស៊ី បានគេរាយការណ៍ថា អគ្គិភ័យដ៏ធំ ចំនួន២ បានកើតឡើងនៅព្រឹកថ្ងៃចន្ទ ទី២៥ ខែមេសា ឆ្នាំ២០២២ នៅឯកន្លែងស្តុកប្រេង Druzhba ក្នុងទីក្រុង Bryansk នៃប្រទេសរុស្ស៊ី និងមួយកន្លែងទៀតនៅឯមូលដ្ឋានយោធារុស្ស៊ី ក្នុងឃ្លាំងអាវុធទី១២០ នៃអគ្គនាយកដ្ឋានកាំភ្លើងធំ និងគ្រាប់រ៉ុក្កែត ។
ភ្លាមៗក្រុមជួយសង្គ្រោះរបស់រុស្ស៊ី មិនបានផ្តល់ព័ត៌មានលម្អិតទេ បើតាមរបាយការណ៍បានអោយដឹងថា មានធុងស្តុកប្រេងធំ២ នៅកន្លែងនោះ បានឆេះនៅម៉ោងប្រហែល២ទៀបភ្លឺ ម៉ោងក្នុងតំបន់ ។ ប្រជាពលរដ្ឋកំពុងជួយជម្លៀសចេញពីផ្ទះ នៅក្បែរឃ្លាំងប្រេង ដែលកំពុងឆេះយ៉ាងសន្ធោសន្ធៅ ។
ទោះជាយ៉ាងណា គេសង្ស័យថា ជាការវាយប្រហារដោយឧទ្ធម្ភាគចក្រអ៊ុយក្រែន ។ កាលពីថ្ងៃទី១ ខែមេសា ទីក្រុងមូស្គូ ក៏បាននិយាយថា អ៊ុយក្រែនបានបញ្ជូនឧទ្ធម្ភាគចក្រវាយប្រហារ ឆ្លងកាត់ព្រំដែន ដើម្បីវាយប្រហារកន្លែងស្តុកប្រេង ។ ឧទ្ធម្ភាគចក្រអ៊ុយក្រែន បានវាយប្រហារអគារលំនៅដ្ឋាន និងធ្វើឲ្យមនុស្ស ០៧នាក់រងរបួស នៅក្នុងតំបន់នោះ កាលពីសប្តាហ៍មុន ។
ទីក្រុង Bryansk គឺជាមជ្ឈមណ្ឌលរដ្ឋបាល ដែលមានចម្ងាយប្រហែល ១៥៤គីឡូម៉ែត្រ ពីព្រំប្រទល់ប្រទេសអ៊ុយក្រែន និងមានចម្ងាយប្រហែល ៣៨០គីឡូម៉ែត្រ ពីទីក្រុងម៉ូស្គូ ប្រទេសរុស្ស៊ី ។
ហើយបំពង់បង្ហូរប្រេង Druzhba គឺជាបំពង់បង្ហូរប្រេងដែលវែងជាងគេបំផុតរបស់ពិភពលោក និងជាបណ្តាញបំពង់បង្ហូរប្រេងដ៏ធំបំផុតមួយ នៅក្នុងពិភពលោក ។
ប្រតិបត្តិការយោធាពិសេសរបស់ពូទីន លុកលុយអ៊ុយក្រែន ឥឡូវនេះបានឈានចូលដល់ខែទី៣ របស់ខ្លួនហើយ ដោយមនុស្សរាប់ពាន់នាក់ បានបាត់បង់ជីវិត ៕
ចែករំលែកព័តមាននេះ