អាមេរិក ៖ លោកយាយ Edie Simms អាយុ១០២ឆ្នាំ ត្រូវបានប៉ូលិសចាប់ខ្លួននៅក្នុងផ្ទះរបស់គាត់ ដែលតាមពិតទៅ គាត់មិនបានធ្វើអ្វីខុសច្បាប់ទេ តែលោកយាយសុំឱ្យប៉ូលិសចាប់ខ្លួនគាត់ ព្រោះចង់ស្គាល់រសជាតិនៃការចាប់ខ្លួន មុនពេលគាត់ស្លាប់ ។ គាត់សប្បាយចិត្តណាស់ នៅពេលដែលបានជិះឡានប៉ូលិស ព្រោះនេះជាអ្វីដែលគាត់ប៉ងប្រាថ្នាចង់បាន មុនពេលគាត់លាលោកនេះទៅ ។
ដោយសារតែសេចក្តីចង់បានរបស់លោកយាយ ប៉ូលិសបានជូនលោកយាយតាមសំណូមពរ ដោយចាប់លោកយាយដាក់ខ្នោះដៃ និងដឹកដៃលោកយាយដាក់ក្នុងឡានទ្រុងរបស់ប៉ូលិស បញ្ជូនទៅប៉ុស្តិ៍ កាលពីថ្ងៃទី៣០ កញ្ញា កន្លងមក ។
លោកយាយ Simms ជារឿយៗបរិច្ចាគរបស់របរផ្សេងៗជូនដល់ប៉ូលិសៗ ដោយមានខ្នើយរាប់រយ ភួយ ស្រោមដៃ ក្រណាត់ និង របស់របរផ្សេងៗទៀត កាលពីប៉ុន្មានឆ្នាំមុន ។ ប៉ូលិសមានសេចក្តីរីករាយណាស់ ដែលបានតបស្នងសងគុណលោកយាយ ដោយជួយបំពេញគោលបំណងរបស់លោកយាយឱ្យបានចាប់ខ្លួន ។
នៅពេលដែលអ្នកយកព័ត៌មានទៅសម្ភាសលោកយាយ លោកយាយបានផ្តល់ជាដំបូន្មានខ្លះៗថែមទៀតផង ។ គាត់ថា «យើងគ្រប់គ្នា គួរតែខំប្រឹងឡើង ហើយស្របពេលនោះដែរ យើងត្រូវចេះឆ្លៀតជួយការងារសង្គមផង។ ជួនកាលមនុស្ស ដែលយើងត្រូវពឹងពាក់ គឺជាមនុស្សដែលយើងធ្លាប់និយាយជាមួយ» ។ នៅពេលលោកយាយបានចាប់ខ្លួនមួយភ្លែតហើយ លោកយាយក៏បាននៅលេងល្បែងកម្សាន្ត ជាមួយប៉ូលិសនៅប៉ុស្តិ៍ទាំងអស់គ្នា ។
ចែករំលែកព័តមាននេះ