ម្លាំងសមត្ថកិច្ចចម្រុះ១ក្រុម រួមមាន កម្លាំងអន្តរាគមន៍បង្ក្រាបសត្វព្រៃនៃរដ្ឋបាលព្រៃឈើ សហការជាមួយខណ្ឌរដ្ឋបាលព្រៃឈើ រាជធានីភ្នំពេញ និងកម្លាំងកងរាជអាវុធហត្ថលើផ្ទៃប្រទេស បានចុះទៅធ្វើការបង្ក្រាបការលក់សាច់សត្វព្រៃ ក្នុងសិប្បកម្មផលិតប្រហិតមួយកន្លែង ដោយបានធ្វើការដកហូត
រាជធានីភ្នំពេញ ៖ កម្លាំងសមត្ថកិច្ចចម្រុះ១ក្រុម រួមមាន កម្លាំងអន្តរាគមន៍បង្ក្រាបសត្វព្រៃនៃរដ្ឋបាលព្រៃឈើ សហការជាមួយខណ្ឌរដ្ឋបាលព្រៃឈើ រាជធានីភ្នំពេញ និងកម្លាំងកងរាជអាវុធហត្ថលើផ្ទៃប្រទេស បានចុះទៅធ្វើការបង្ក្រាបការលក់សាច់សត្វព្រៃ ក្នុងសិប្បកម្មផលិតប្រហិតមួយកន្លែង ដោយបានធ្វើការដកហូតសាច់សត្វព្រៃមួយចំនួនផងដែរ ប៉ុន្តែពុំបានឃាត់ខ្លួនអ្នកលក់នោះទេ ដោយគ្រាន់តែធ្វើការផាកពិន័យតាមច្បាប់ និងណែនាំកុំឲ្យមានការជួញដូរសត្វព្រៃបន្តទៀតតែប៉ុណ្ណោះ។
ប្រតិបត្តិការខាងលើនេះ បានធ្វើឡើងកាលពីវេលាម៉ោង១១ព្រឹក ថ្ងៃទី២២ ខែមេសា ឆ្នាំ២០២២ នៅចំណុចទីតាំងលក់សាច់សត្វព្រៃមួយកន្លែងខាងលើនោះ ស្ថិតនៅក្នុងភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ។
ហើយម្ចាស់ទីតាំងខាងលើនេះ ពុំត្រូវបានគេស្គាល់ឈ្មោះនោះទេ ប៉ុន្តែបើយោងតាមសមត្ថកិច្ចដែលចុះបង្ក្រាបនោះ បានប្រាប់ឲ្យដឹងថា ម្ចាស់ទីតាំងនេះ បាន Live លក់សាច់សត្វព្រៃនៅតាមប្រព័ន្ធ Online តែម្ដង។ ដោយឡែកកម្លាំងសមត្ថកិច្ចចម្រុះ បានធ្វើការស្រាវជ្រាវ រហូតកំណត់ច្បាស់ថា ទីតាំងនេះពិតជាមានលួចលក់សត្វព្រៃខុសច្បាប់ពិតប្រាកដមែន ទើបកម្លាំងចុះត្រួតពិនិត្យឆែកឆេរតែម្តង។
ប្រភពដដែលបានប្រាប់ទៀតថា ពេលនោះកម្លាំងបានរកឃើញសាច់ជ្រូកព្រៃស្រល់ចំនួន ៥,៥០គីឡូក្រាម និងសាច់សត្វឈ្លូសចំនួន១០គីឡូក្រាម ។ បន្ទាប់មកក៏បានធ្វើការដកហូតយកសាច់សត្វព្រៃទាំងនោះ ដើម្បីដុតកម្ទេចចោល ប៉ុន្តែពុំបានឃាត់ខ្លួនអ្នកលក់នេះឡើយ ដោយគ្រាន់ផាកពិន័យ និងធ្វើការអប់រំបញ្ឈប់ការជួញដូរបន្តទៀត។
ទោះបីបែបណា មន្ត្រីខាងលើក៏បានបញ្ជាក់ផងដែរថា ប្រភេទសត្វព្រៃទាំង២មុខនេះ គឺជាសត្វព្រៃប្រភេទសត្វព្រៃមានដោយបង្គួរ មិនមែនជាប្រភេទសត្វកម្រពេកនោះទេ៕
ចែករំលែកព័តមាននេះ