លំនៅដ្ឋានសាងសង់ពីបេតុងប្រក់ស៊ីប្រូស៊ីម៉ង់តិ៍ ស្ថិតនៅក្នុងមូលដ្ឋានស្វាយមាស ក្នុងឃុំតាអុង ស្រុកចំការលើ ជាច្រើនខ្នង ត្រូវបានគេបោះបង់ចោល ដែលមើលទៅពិតជាគួរឲ្យស្រណោះ និងអាឡោះអាល័យ
ខេត្តកំពង់ចាម ៖ លំនៅដ្ឋានសាងសង់ពីបេតុងប្រក់ស៊ីប្រូស៊ីម៉ង់តិ៍ ស្ថិតនៅក្នុងមូលដ្ឋានស្វាយមាស ក្នុងឃុំតាអុង ស្រុកចំការលើ ជាច្រើនខ្នង ត្រូវបានគេបោះបង់ចោល ដែលមើលទៅពិតជាគួរឲ្យស្រណោះ និងអាឡោះអាល័យ។ ជាហេតុធ្វើឲ្យតំបន់ដែលធ្លាប់ តែគួរប្រែក្លាយទៅជាស្ងាត់ជ្រងំ ហើយនៅពេលយប់ខណៈពេលជិះកង់ ឬម៉ូតូឆ្លងកាត់តំបន់នោះ ព្រឺឆ្អឹងខ្នងគួរឱ្យខ្លាចទៀតផង។
បើតាមអ្នកស្រី ស៊ីម ងាន់ អាយុ៦២ឆ្នាំ បានប្រាប់ឲ្យដឹងនាព្រឹកថ្ងៃទី២១ ខែមេសា ឆ្នាំ២០២២ថា រាល់ថ្ងៃគាត់លក់ដូររបស់ហូប ក្នុងនោះមានភេសជ្ជៈ និងរបស់ផ្សេងទៀតនៅក្រោមម្លប់ដើមឈើក្បែរមាត់ច្រកចូលមូលដ្ឋានស្វាយមាស សម្រាប់យកថវិកាផ្គត់ផ្គង់ជីវភាពគ្រួសារប្រចាំថ្ងៃ។ ដោយគាត់បានលក់ដូរជាមួយនឹងប្ដីឈ្មោះ ធូ រ៉េត អាយុ៦៤ឆ្នាំ តែលក់មិនសូវដាច់ដូចកាលពីមុននោះទេ។
អ្នកស្រីស៊ីម ងាន់ បានរំលឹកឲ្យដឹងទៀតថា នៅក្នុងឆ្នាំ១៩៩៣ ប្ដីរបស់គាត់បានចូលបម្រើការងារក្នុងក្រុមហ៊ុនចំការកៅស៊ូចំការអណ្ដូង ដោយទទួលភារៈជាផ្នែកដឹកជញ្ជូនទឹកជ័រកៅស៊ូ ហើយក្នុងគ្រានោះ គឺគេឱ្យរស់នៅក្នុងផ្ទះបេតុងស៊ីប្រូស៊ីម៉ង់តិ៍ នៅក្បែរនឹងមាត់ច្រកចូលមូលដ្ឋានចំការស្វាយមាស រួមជាមួយនឹងផ្ទះកម្មករកម្មការិនីផ្សេងទៀតជាច្រើន ក្នុងភូមិ៣២ ឃុំតាអុង ស្រុកចំការលើ ដែលមានផ្ទៃដីទំហំ១៥គុណនឹង៣០ម៉ែត្រ ជាដីរបស់រដ្ឋ។
ប្រភពដដែលបន្តថា ក្រោយមកទៀត ពេលដែលក្រុមហ៊ុនចំការកៅស៊ូនេះ ត្រូវបានវិនិយោគទៅឱ្យឯកជននោះ ក៏ត្រូវបានគេឱ្យមករស់នៅទីតាំងថ្មីដែលមានចម្ងាយប្រមាណ៣គីឡូម៉ែត្រពីកន្លែងចាស់ សម្រាប់គ្រួសាររបស់គាត់ (ស៊ីម ងាន់) ទទួលបានដីទំហំដូចនៅកន្លែងចាស់ដោយផ្ដល់ជាកម្មសិទ្ធិស្របច្បាប់ ហើយក្រោយពីប្តីចូលនិវត្តន៍ក៏បានមកជួយលក់ដូរគាត់ផងដែរ។ តាមការកត់សម្គាល់ភូមិដែលបង្កើតថ្មីនេះ គឺមានអតីតកម្មករកម្មការិនីចំការកៅស៊ូមកពីភូមិ៣១ ៣២ និង៣៣ ដោយរស់នៅជុំគ្នាកើនរហូតដល់ជាង៣០០គ្រួសារ។
ចំណែកលោក ខែម យ៉ង់ មេឃុំតាអុង ក៏មានប្រសាសន៍ឲ្យដឹងដែរថា អតីតកម្មករកម្មការិនីរស់នៅភូមិ៣១ ៣២ និង៣៣ ក្នុងមូលដ្ឋានស្វាយមាស ឃុំតាអុងនេះ ត្រូវបានផ្លាស់ប្ដូរឲ្យទៅរស់នៅទីតាំងថ្មីក្នុងភូមិបាំង១ បាំង២ ឃុំបុសខ្នុរ ស្រុកចំការលើ ។ ក្រោយមក ដោយសារភូមិ៣១ ៣២ និង៣៣ នេះ មិនមានមនុស្សរស់នៅ ក៏ត្រូវបានក្រសួងមហាផ្ទៃលុបភូមិទាំងបីនេះចេញពីបញ្ជី។ ហើយក្នុងនាមជាអាជ្ញាធរឃុំ មិនទាន់លេចឮមានអ្នកភូមិថា ម្នាក់ៗនិយាយជិះកង់ និងម៉ូតូឆ្លងកាត់នៅពេលយប់ក្នុងតំបន់អតីតមូលដ្ឋានស្វាយមាសនេះ ត្រូវខ្មោចលងនោះទេ។
សូមបញ្ជាក់ថា តាមការកត់សម្គាល់ដោយផ្ទាល់ ក្រោយពីមានការចាកចេញរបស់កម្មករកម្មការិនីអតីតក្រុមហ៊ុនចម្ការកៅស៊ូចំការអណ្ដូង រហូតមកដល់ពេលនេះ មូលដ្ឋានស្វាយមាស នៅមិនទាន់មានការអភិវឌ្ឍ ឬដាំដុះដំណាំអ្វីគួរឲ្យកត់សម្គាល់នោះទេ គឺគេឃើញតែផ្ទះថ្មសាងសង់ផ្ទាល់ដីចាស់ៗ ហើយក្នុងនោះក៏មានភាគតិចណាស់ ដែលមិនទាន់បានចាកចេញទៅរស់នៅទីតាំងថ្មី គឺគាត់សុខចិត្តរស់នៅទីតាំងចាស់ដដែល៕
ចែករំលែកព័តមាននេះ