គណនេយ្យ Yahoo ចំនួន500លានត្រូវគេលួច
ក្រុមហ៊ុន Yahoo Inc បាននិយាយថា យ៉ាងហោចណាស់មានគណនេយ្យអ្នកប្រើប្រាស់ សេវារបស់ខ្លួនចំនួន500លានត្រូវបានគេលួចចូលតាំងពីឆ្នាំ2014 ហើយអ្នកចូលលួចបានត្រូវគេ ជឿថាជាក្រុម hacker
ក្រុមហ៊ុន Yahoo Inc បាននិយាយថា យ៉ាងហោចណាស់មានគណនេយ្យអ្នកប្រើប្រាស់ សេវារបស់ខ្លួនចំនួន500លានត្រូវបានគេលួចចូលតាំងពីឆ្នាំ2014 ហើយអ្នកចូលលួចបានត្រូវគេ ជឿថាជាក្រុម hacker ដែលល្បីឈ្មោះមួយក្នុងពិភពលោក ។ ក្រុមចោរតាមអីុនធើរណេតនោះប្រហែលបានលួចឈ្មោះ អាសយដ្ឋានអីុម៉ែល លេខទូរស័ព្ទ ថ្ងៃខែឆ្នាំកំណើត និងលេខកូដសំងាត់។ ប៉ុន្តែទិន្នន័យកាត់ចំណាយ និងព័ត៌មានដែលទាក់ទង់នឹងគណនេយ្យធនាគារ និងព័ត៌មានទិន្នន័យដ៏មានតម្លៃផ្សេងទៀតរបស់ម្ចាស់គណនេយ្យ Yahoo មិនត្រូវបានគេលួចនោះទេ ។នេះបើតាមសម្តីរបស់ក្រុមហ៊ុនយ៉ាហ៊ូ ។
ការវាយប្រហារមកលើក្រុមហ៊ុនយ៉ាហ៊ូនេះពិតជាមានទំហំធំគឺធំជាងការវាយប្រហារលួចនៅក្នុងគេហទំព័រ eBay Inc ដល់ទៅបីដង ហើយវាជាការវាយប្រហារក្នុងពេលក្រុមហ៊ុនកំពុងស្ថិតក្នុងការលំបាកផង ។
លោកស្រី Marissa Mayer ដែលកំពុងស្ថិតក្នុងសម្ពាធយ៉ាងខ្លាំងដើម្បីស្តារក្រុមហ៊ុនដែលបានបង្កើតនៅឆ្នាំ១៩៩៤ឡើងវិញផង ហើយកាលពីខែកក្តដាក៏ទើបបានចុះកិច្ចព្រមព្រៀងលក់ក្រុមហ៊ុនទៅឲ្យក្រុមហ៊ុន Verizon Communications Inc ក្នុងតម្លៃ៤,៨៣ពាន់លានដុល្លារអាមេរិក ។
កាលពីថ្ងៃព្រហស្បតិ៍ សប្តាហ៍មុនក្រុមហ៊ុនយ៉ាហ៊ូក៏ចេញសេចក្តីប្រកាសលើកទឹកចិត្តឲ្យអ្នក ប្រើប្រាស់ ទាំងអស់ផ្លាស់ប្តូរលេខកូដសំងាត់ ប៉ុន្តែប្រសិនបើគិតថាមិនចាំបាច់មិនផ្លាស់ប្តូរក៏បានដែរ។ មានអ្នកវិភាគផ្នែកបច្ចេកវិទ្យាជាច្រើនយល់ឃើញថា ការហែកចូលលួចគណនេយ្យរបស់យ៉ាហ៊ូនាពេលនេះអាចធ្វើឲ្យក្រុមហ៊ុន Verizon ដែលនឹងទិញក្រុមហ៊ុនយ៉ាហ៊ូឈប់ទិញ ឬក៏ចរចាបញ្ចុះតម្លៃប្រហែលពី១០០លានដុល្លារអាមេរិកទៅ២០០លានដុល្លារអាមេរិកអាស្រ័យតាមចំនួនថយចុះនៃអ្នកឈប់ប្រើប្រាស់យ៉ាហ៊ូ។
ក្រុមហ៊ុន Verizon ក៏បានចេញសេចក្តីប្រកាសផងដែរថា ខ្លួនបានទទួលដំណឹងនៃការ រំលោភចូលយ៉ាហ៊ូតាំងពីពីរថ្ងៃមកម្លេ៉ះ ហើយយើងក៏ទទួលបានព័ត៌មានតិចតួចនៅឡើយពីបញ្ហានោះដែរ។ យើងនឹងតាមដានវាយតម្លៃលើការស៊ើបអង្កេតដែលកំពុងបន្ត ដោយឈរលើគោលការផលប្រយោជន៍របស់ក្រុមហ៊ុន ។
ក្រុមហ៊ុនយ៉ាហ៊ូកំពុងដាក់ពាក្យប្តឹងលើបញ្ហានោះ ហើយ FBI ក៏កំពុងបើកការស៊ើបអង្កេតដែរ ៕
ចែករំលែកព័តមាននេះ