«The Sun» របស់អង់គ្លេសកាលពីពេល ថ្មីៗកន្លងមកផ្សាយថា នាងអាស្លេ អាល់កូតាយប៊ី អាយុ២២ឆ្នាំ ជាបុគ្គលិកនៅផ្សារទំនើបមួយក្នុងក្រុងសេសហ្វៀល ចក្រភពអង់គ្លេស ជ្រុះសក់រហូតទំពែកក្បាលក្នុងរយៈពេល៣ខែ ខណៈតប់ប្រមល់រឿងស្នេហា ។
នាងអាស្លេ អាល់កូតាយប៊ី បញ្ជាក់តាមរយៈសារព័ត៌មានក្នុងស្រុកថា បច្ចុប្បន្នសក់របស់នាងដុះដូចដើមវិញហើយក្នុងរយៈពេល៤ខែ ព្រោះបានជួបគូស្នេហ៍ថ្មី ។ នាងចាប់ផ្ដើមជ្រុះសក់នៅក្នុងខែវិច្ឆិកា ឆ្នាំ២០១៤ ហើយគ្រូពេទ្យវិនិច្ឆ័យថា នាងជ្រុះសក់ដោយកន្លែង ដោយសារភាពតានតឹងក្នុងអារម្មណ៍ ។ លុះដល់ខែកុម្ភៈ ឆ្នាំ២០១៥ សក់នៅប្រហែល៩៥%ជ្រុះអស់ ព្រោះនាងមានភាពតប់ប្រមល់ចំពោះសម្ព័ន្ធភាពជាមួយគូស្នេហ៍ដល់ថ្នាក់ចង់ធ្វើអត្ដឃាត ។
នៅពេលកំពុងស្ថិតក្នុងស្ថានភាពដ៏អាក្រក់នៃរឿងស្នេហា នាងសម្រេចចិត្ដឈប់សេពគប់ជាមួយអតីតគូស្នេហ៍ ហើយនិយាយថា គ្រប់សរសៃសក់ដែលជ្រុះប្រៀបដូជាភាពជឿជាក់ដែលបានបាត់ពីរូបនាង ។ ភាពតប់ប្រមល់ដែលកើតឡើងធ្វើឱ្យសក់របស់នាងជ្រុះជារៀងរាល់ថ្ងៃ ប៉ុន្ដែបន្ទាប់ពីនាងបោះបង់ចោលគូស្នេហ៍ចាស់ ក៏បានជួបលោកចន រ៉ូប៊ុនសុន អាយុ២៦ឆ្នាំ ជាបុគ្គលិកចែកចាយឯកសារនៅក្នុងខែមេសា ឆ្នាំ២០១៥ ហើយស្រាប់តែសក់របស់នាងដុះដូចដើម និងមានលក្ខណៈពេញលេញតែរយៈពេល៤ខែប៉ុណ្ណោះ ។
បច្ចុប្បន្ន នាងអាស្លេ អាល់កូតាយប៊ី មានសក់ដុះពេញក្បាល ដោយសារមានសេចក្ដីសុខជាមួយលោកចន រ៉ូប៊ីនសុន ។ នាងនិយាយថា «សក់ខ្ញុំអាចជ្រុះម្ដងទៀតក៏ថាបាន ប៉ុន្ដែដរាបណាលោកចន រួមរស់ជាមួយប្រកបដោយក្ដីស្រលាញ់ ប្រហែលគ្មានក្ដីទុក្ខដូចកាលពីមុនទេ» ៕
ចែករំលែកព័តមាននេះ