ខេត្តសៀមរាប ៖ កិច្ចប្រជុំបច្ចេកទេសលើកទី២ នៃគណៈកម្មាធិការសម្របសម្រួលអន្តរជាតិសម្រាប់ការអភិរក្ស និងលើកតម្លៃប្រាសាទព្រះវិហារ ហៅកាត់ថា «ICC-PV» នៅសាលសន្និសីទអង្គរនៃអាជ្ញាធរជាតិអប្សរាបានបញ្ចប់នាល្ងាចថ្ងៃទី២៩ ខែកញ្ញា ឆ្នាំ ២០១៦ ។ អង្គប្រជុំនេះមានប្រទេសចិន និងឥណ្ឌាជាសហប្រធាន ក្រោមអធិបតីភាពលោកយឹម ណុលឡា ទេសរដ្ឋមន្ត្រីនិងជាប្រធានក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ តំណាងបណ្ឌិតសភាចារ្យសុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានគណៈកម្មការជាតិយូណេស្កូ និងលោកបណ្ឌិត ហាវ ពីង អនុរដ្ឋមន្ត្រីអប់រំនៃសាធារណរដ្ឋប្រជាមានិតចិន និងជាប្រធានគណៈកម្មាធិការយូណេស្កូចិន ព្រមទាំងមានការចូលរួមពីសមាជិកជាច្រើនប្រទេសដូចជា ថៃ បែលហ្ស៊ិក ជប៉ុន បារាំង សហរដ្ឋអាមេរិក កូរ៉េខាងត្បូង និងសហព័ន្ធសហភាពរុស្ស៊ី ជាអ្នកសង្កេតការណ៍ ។
លោកបណ្ឌិត គឹម សេតារា ប្រធានអាជ្ញាធរជាតិព្រះវិហារ បានថ្លែងក្នុងសន្និសីទកាសែតក្រោយពេលបញ្ចប់កិច្ចប្រជុំថា នេះជាការប្រជុំបច្ចេកទេសប្រចាំឆ្នាំលើកទី២ នៃគណៈកម្មាធិការសម្របសម្រួលអន្តរជាតិសម្រាប់ការអភិរក្ស និងលើកតម្លៃប្រាសាទព្រះវិហារ ហៅកាត់ថា «ICC-PV»។ កិច្ចប្រជុំនេះផ្តោតសំខាន់លើបច្ចេកទេសនៃការរៀបចំផែនទីហានិភ័យ និងកិច្ចការអភិរក្ស ការរៀបចំផែនទីបុរាណវិទ្យា ការអភិរក្សព្រៃឈើ ការគ្រប់គ្រងទេសចរណ៍ និងការអភិវឌ្ឍសហគមន៍ ។
កិច្ចប្រជុំពេញមួយថ្ងៃបានទទួលលទ្ធផលផ្លែផ្កាគាប់ប្រសើរជាទីបំផុត និងមានការកោតសរសើរអ្នកជំនាញយូណេស្កូ ក្រោយពីចូលទៅពិនិត្យមើលជាក់ស្តែងនៅប្រាសាទព្រះវិហារថា បន្ទាប់ពីទទួលបានអនុសាសន៍ និងមតិយោបល់របស់អ្នកជំនាញអន្តរជាតិមក អាជ្ញាធរជាតិព្រះវិហារធ្វើការបានលទ្ធផលល្អច្រើន ដោយមិនមានជំនួយថវិកាមកពីខាងណាក្រៅពីបច្ចេកទេស ។ ក្នុងនោះដែរ អ្នកជំនាញខ្មែរទាំងអស់ធ្វើការប្រកបដោយជំនាញវិជ្ជាជីវៈ ដែលធ្វើឱ្យតំបន់ព្រះវិហារមានការរីកចម្រើនខ្លាំងគួរឱ្យកត់សម្គាល់ ។
លើសពីនោះទៅទៀត អាជ្ញាធរជាតិព្រះវិហារ បានទទួលការសន្យា និងការប្តេជ្ញាចិត្តរួមដំណើរជួយសហការជួសជុលអភិរក្សប្រាសាទព្រះវិហារជាមួយកម្ពុជាផងដែរពីសមាជិកនៃអាយស៊ីស៊ី-ព្រះវិហារ ដូចជាប្រទេសចិន ប្រទេសឥណ្ឌា នឹងជួយជួសជុលគោបុរៈទី១ ទី២ ទី៣ និងទី៥ ឯសហព័ន្ធសហភាពរ៉ូស្ស៊ី ក៏មានបំណងជួយជួសជុលគោបុរៈទី៤ផងដែរ ។ ចំណែកប្រទេសថៃ ក៏នឹងជួយជួសជុលអភិរក្សប្រាសាទមួយនៅរមណីយដ្ឋានកោះកេរ។ ប្រទេសជាសមាជិកទាំងអស់ដែលសន្យាជួយ នឹងចាប់ផ្តើមសិក្សាស្រាវជ្រាវក្នុងពេល ឆាប់ៗខាងមុខទាំងនៅប្រាសាទព្រះវិហារ និងតំបន់កោះកេរ ។
ក្រៅពីការជួសជុលអភិរក្សប្រាសាទជាកិច្ចចម្បងហើយ អាជ្ញាធរជាតិព្រះវិហារក៏បានយកចិត្តទុកដាក់ជាខ្លាំងពីបញ្ហាទឹក បរិស្ថាន ព្រៃឈើ សហគមន៍ ទេសចរណ៍ ព្រោះបញ្ហាទាំងនេះជាអាយុជីវិតនៃការអភិវឌ្ឍ និងអភិរក្សបេតិកភណ្ឌពិភពលោកប្រកបដោយចីរភាព ។
ទាំងនេះជាលទ្ធផលដែលគួរឱ្យមោទនភាពបំផុត សម្រាប់ក្រុមការងារអាជ្ញាធរជាតិព្រះវិហារ ដែលមានតួនាទីគ្រប់គ្រង អភិរក្ស និងរៀបចំតំបន់ព្រះវិហារ និងកោះកេរ ដែលជាមរតកបេតិកភណ្ឌរបស់ខ្មែរ និងពិភពលោក ៕
ចែករំលែកព័តមាននេះ